Забур 26 - Сыйлы Инжил бла Забур

Дауутну зикири.

¹ Мени жарыгъым эм мени къутхарыучум Раббийди: мен кимден къоркъурукъма? Мени жашаууму кючю Раббийди: мен кимден абызырап турлукъма?

² Жауларым эмда душманларым болгъан аманлыкъчыла, мени этими ашап къояр ючюн манга чабыуул этселе да, ала кеслери абынып жыгъыллыкъдыла.

³ Манга аскер къажау турса да, мени жюрегим къоркъурукъ тюйюлдю; манга къажау уруш чыкъса да, ол заманда да Аллахха ышанырыкъма.

⁴ Бир затны тилегенме мен Раббийден, жаланда аны излейме: мени битеу жашау кюнлеримде мен Раббийни юйюнде турайым, Раббийни ариулугъуна сюйюнюп къарайым эмда Аны сыйлы юйюнде акъыл алайым;

⁵ Нек десенг палах кюнде Ол мени Кесини чатырында жашырыр, Кесини мекямыны таша жеринде мени букъдурур, мени къаягъа чыгъарыр.

⁶ Ол заманда мени тёгерегимден алып тургъан душманларыма мени башым кётюрюлюр, мен да Аны чатырында къууанч бла къычырып къурманла келтирирме, Раббийни аллында зикир эм махтау назму айтып башларма.

⁷ Раббий, мени тилек этген ауазымы къабыл эт, манга жазыкъсын эмда манга жууап бер.

⁸ «Мени бетими излегиз», – дегенсе; мени жюрегим Санга: «Бетинги излерикме, Раббий», – дейди.

⁹ Бетинги менден жашырма, къулунгу чамланыуунгда атма. Сен мени болушлукъчум болгъанса; мени атма эмда мени къойма, мени Къутхарыучу Аллахым!

¹⁰ Нек десенг мени атам бла мени анам мени къойгъандыла, Раббий а мени къабыл этерикди.

¹¹ Раббий, мени жолунга юйрет эмда душманларым амалтын мени тюз жол ызгъа тюзет.

¹² Душманларымы эркинлигине берип къойма мени, нек десенг жалгъан шагъатла манга къажау тургъандыла эмда дерт этедиле.

¹³ Алай болгъанлыкъгъа мен Раббийни ахшылыгъын сауланы жеринде кёрлюкме деп ийнанама.

¹⁴ Раббийге ышан, киши бол, сени жюрегинг кючлю болсун, Раббийге ышан.