Забур 25 - Сыйлы Инжил бла Забур

Дауутну зикири.

¹ Раббий, мени ариула, нек десенг мен айыпсыз жашагъанма эмда, тентиремей, Раббийге ышанып тургъанма.

² Раббий, мени жокъла эмда мени сынап кёр, мени ичими да, жюрегими да эритип къара.

³ Нек десенг Сени мархаматынг мени кёзлерими аллындады, мен сени хакъ керти жолунгда жюрюгенме.

⁴ Мен ётюрюкчю адамла бла олтурмагъанма, эки бетлиле бла да барлыкъ тюйюлме.

⁵ Мен харам ниетлилени жыйымдыгъын кёрюп болмагъанма, аман адамла бла да олтурлукъ тюйюлме.

⁶ Терссизлигими кёргюзтюр ючюн, къолларымы жууарыкъма,

⁷ Шукур этиу ауазым бла Сени битеу сейирлик ишлеринги айтыр эм билдирир ючюн, Сени къурман этилиучю жеринги тёгерегине айланырыкъма, Раббий.

⁸ Раббий! Мен Сени юйюнгю мекямын эмда Сени махтауунгу жашагъан жерин сюйгенме.

⁹ Мени жанымы гюняхлыла бла, жашаууму къан ичиучюле бла жойма,

¹⁰ Аланы къолларында аманлыкъ этиу болгъанла бла эм аланы онг къоллары ултха алыудан толу болгъанла бла жойма.

¹¹ Мен а айыпсыз жашайма; мени къутхар эмда манга жазыкъсын.

¹² Мени аягъым тюз жолда турады, жыйылыулада Раббийге махтау саллыкъма.