Забур 24 - Сыйлы Инжил бла Забур

¹ Я Раббий, жанымы Санга кётюреме.

² Эй Аллахым! Санга ышанама, айыплы болмайым, мени душманларым манга кёл кенгдирмесинле.

³ Санга ышаннган бир адам да айыплы боллукъ тюйюлдю, Сени сан этмей къойгъанла уа айыплы боллукъдула.

⁴ Я Раббий, Сени жолларынгы манга кёргюзт эмда Сени жол ызларынга мени юйрет.

⁵ Мени Сени хакъ кертинге тюзет эмда мени юйрет, нек десенг Сен мени къутхарыучу Аллахса; Санга ышанама хар кюнде да.

⁶ Раббий, ырахматынгы эмда мархаматлылыгъынгы эсинге ал, нек десенг ала ёмюрдендиле.

⁷ Мени жаш заманымдагъы гюняхларымы эмда терсликлерими эсинге келтирме; Сени ахшылыгъынг ючюн, Сени мархаматлылыгъынг бла мени эсинге тюшюр, Раббий!

⁸ Раббий ахшылыкълыды эм тюзлюклюдю; ол себепден гюняхлыланы жолгъа тюзетеди,

⁹ Сабырланы тюзлюкге бурады, сабырланы Кесини жолларына юйретеди.

¹⁰ Раббийни битеу жоллары мархаматдыла эм хакъ кертидиле Аны кесаматына тюз къалып, Аны фарызларын тутханлагъа.

¹¹ Раббий, Сени атынг ючюн, мени гюнях этгеними кеч, нек десенг ол бек уллуду.

¹² Раббийден къоркъгъан адам кимди? Ол анга къайсы жолну сайларыгъын кёргюзтюрюкдю.

¹³ Аны жаны ахшылыкъда турлукъду, аны туудукълары да жерден юлюшлю боллукъдула.

¹⁴ Раббий сырын Андан къоркъгъанлагъа билдиреди, Кесини кесаматын да алагъа ачады.

¹⁵ Мени кёзлерим хар заманда да Раббийге къарайдыла, нек десенг Ол мени аякъларымы тузакъдан чыгъарады.

¹⁶ Манга къара эмда манга жазыкъсын, нек десенг мен жангызма эмда унугъуп турама.

¹⁷ Мени жюрегими къайгъылары кёп болгъандыла, къыйынлыкъларымдан мени чыгъар.

¹⁸ Мени термилиуюме эм онгсузлугъума къара эмда битеу гюняхларымы кеч.

¹⁹ Мени душманларыма къара, ала къалай кёпдюле эмда къалай къанлы кёрюп болмау бла ала мени кёрюп болмайдыла!

²⁰ Мени жанымы сакъла эмда мени къутхар, мен Санга ышаннганым ючюн айыплы болмайым.

²¹ Айыпсызлыкъ бла тюзлюк мени сакъласынла, нек десенг мен Санга ышанама.

²² Аллах, Израильни битеу къайгъыларындан къутхар!