Забур 23 - Сыйлы Инжил бла Забур

Дауутну зикири.

¹ Жер да, жерни юсюнде болгъан хар зат да, дуния да эм анда жашагъанланы бары да Раббийникиледиле.

² Нек десенг Ол аны тенгизлени юсюнде къурагъанды эмда аны сууланы юсюнде бегитгенди.

³ Раббийни таууна ким чыгъаллыкъды неда Аны сыйлы жеринде ким тураллыкъды?

⁴ Айыпсыз къоллу, таза жюрекли, жалгъан тейриге табынмагъан эмда ётюрюкге ант этмеген адам, ол –

⁵ Ол Раббийден ыразылыкъ аллыкъды эмда аны Къутхарыучу Аллах аны ариуларыкъды.

⁶ Аны излегенлени – Якъупну Аллахы, Сени бетинги излегенлени тукъуму алайды!

⁷ Къабакъла, башыгъызны кётюрюгюз, ёмюрлюк эшикле да, кётюрюлюгюз, сора махтаулу Патчах кирликди!

⁸ Кимди бу, махтаулу Патчах? Къарыулу эм кючлю Раббийди, урушда кючлю Раббийди.

⁹ Къабакъла, башыгъызны кётюрюгюз, ёмюрлюк эшикле да, кётюрюлюгюз, сора махтаулу Патчах кирликди!

¹⁰ Кимди бу, махтаулу Патчах? Неге да кючю жетген Раббий, махтаулу Патчах Олду.