Забур 21 - Сыйлы Инжил бла Забур

¹ Хорну таматасына: «Тангны бууу» атлы макъам бла. Дауутну зикири.

² Аллахым, Аллахым! Сен мени нек атып къойдунг? Мени ынчхап айтхан сёзлерим мени къутхарылыуумдан узакъдыла.

³ Аллахым! Мен кюндюз къычырыкъ этеме, Сен да манга тынгыламайса, – кече да манга тынчлыкъ жокъду.

⁴ Сен а сыйлыса, Израильни махтау салыуларыны арасында жашайса.

⁵ Бизни аталарыбыз Санга ышаннгандыла; ышаннгандыла, Сен да аланы къутхарып тургъанса.

⁶ Ала къычырыкъ этип Сенден тилек этгендиле эмда къутхарылып тургъандыла; Санга ышаннгандыла эмда ыйлыгъыуда къалмагъандыла.

⁷ Мен а адам тюйюлме, къуртма, адамлада бедишликме эмда халкъда сансызма.

⁸ Битеу мени кёргенле мени хыликкя этедиле, башларын силкиндире, эрин-бурун чюйюре:

⁹ «Ол Раббийге ышаннганды, Раббий аны къутултсун, Ол анга ыразы эсе, къутхарсын», – дейдиле.

¹⁰ Сен а мени къарындан чыгъаргъанса, анамы ёшюнлеринде заманымдан мени ичиме ышаныу салгъанса.

¹¹ Мен туугъан заманымдан Санга берилгенме, анамы къарынында заманымдан бери мени Аллахым Сенсе.

¹² Менден узакъ болма, нек десенг къайгъы къаршыды, болушлукъчу уа жокъду.

¹³ Кёп бугъала мени тёгерегиме басыннгандыла, Башанлы семизле мени къуршалагъандыла,

¹⁴ Кийикге жутланнган эм хырылдагъан асланча, манга ауузларын ачхандыла.

¹⁵ Мен сууча тёгюлгенме, мени битеу сюеклерим жиклеринден чыкъгъандыла, мени жюрегим балауузча болуп къалгъанды, мени ичимде эригенди.

¹⁶ Мени къарыуум къошун сыныкъча къуругъанды, мени тилим мени тамагъыма жабышханды, Сен да мени ёлюм топурагъына тюшюргенсе.

¹⁷ Нек десенг итле мени къуршалагъандыла, огъурсузланы жыйыны мени тёгерегиме басыннгандыла, мени къолларыма да, аякъларыма да чанчып ётдюргендиле.

¹⁸ Битеу сюеклерими санарча болгъанма, кеслери уа манга кёзлерин аралтып къарайдыла;

¹⁹ Мени кийимлерими кеси араларында юлешедиле, абама да чёп атадыла.

²⁰ Раббий, Сен а менден узакъ болма; мени кючюм! Манга болушургъа ашыкъ.

²¹ Мени жанымы къылычдан, жашаууму итледен къутхар.

²² Асланны ауузундан мени къутхар эмда, тилегими къабыл этип, кийик бугъаланы мюйюзлеринден мени къутулт.

²³ Сени атынгы мен къарындашларыма билдирликме, жамауатны арасында Санга махтау саллыкъма.

²⁴ Раббийден къоркъгъанла! Анга махтау салыгъыз. Битеу Якъупну урлугъу! Анга хурмет этигиз. Битеу Израильни урлугъу Аны сыйлы кёрсюн!

²⁵ Нек десенг Ол къыйналып термилгенни къайгъысын сансыз этмегенди эмда эсине алмай къоймагъанды, Кесини бетин андан жашырмагъанды, алай а ол, болушлукъ излеп, къычырыкъ этген заманда анга тынгылагъанды.

²⁶ Уллу жыйылыуда мени махтауум Сени юсюнгденди; Сенден къоркъгъанланы алларында антларымы толтурлукъма.

²⁷ Жарлыла ашарыкъдыла эмда тоярыкъдыла; Раббийни излеучюле Анга махтау саллыкъдыла, сизни жюреклеригиз ёмюрлеге да жашасынла!

²⁸ Жерни тёрт жаны да муну эслерине тюшюрлюкдюле эмда Раббийге къайтышырыкъдыла эмда миллетлени битеу тайпалары Сени аллынгда сеждагъа ийилликдиле.

²⁹ Нек десенг патчахлыкъ Раббийниди, халкълагъа Ие да Олду.

³⁰ Битеу жерни байлары ашарыкъдыла эмда табынырыкъдыла, битеу жерге кирликле эм кеслерини жанларын сакълаялмагъанла Аны аллында баш урлукъдула.

³¹ Мени туудукъларым Анга къуллукъ этерикдиле эмда келлик тукъумгъа Раббийни юсюнден хапар берилликди.

³² Келликдиле эмда Раббийни тюзлюгюн, Аны этгенин, артда туугъан адамлагъа билдирликдиле.