Забур 20 - Сыйлы Инжил бла Забур

¹ Хорну таматасына: Дауутну зикири.

² Раббий! Патчах Сени кючлендиргенинге сюйюнеди эм Сени къутхарыуунга хыйсапсыз уллу къууанады.

³ Сен анга аны жюреги сюйгенни бергенсе, аны ауузу тилегенни да къабыл этмей къоймагъанса.

⁴ Нек десенг Сен аны ахшылыгъынгы алгъышлары бла сыйлагъанса, аны башына таза алтындан таж салгъанса.

⁵ Ол Сенден жашау тилегенди, – Сен анга ёмюрден ёмюрге да кёп жашау кюнле бергенсе.

⁶ Сени къутхарыуунг себепли аны махтауу уллуду, Сен анга хурмет эм уллулукъ бергенсе.

⁷ Сен ёмюрлеге да анга ахшылыкъла салгъанса, Кесинги бетинги къууанчы бла аны сюйюндюргенсе.

⁸ Нек десенг патчах Раббийге ышанады эмда Уллу Аллахны ахшылыгъындан тентирерик тюйюлдю.

⁹ Сени къолунг Сени битеу душманларынгы табарыкъды, Сени онг къолунг Сени кёрюп болмагъанланы табарыкъды.

¹⁰ Сени чамланыуунгу заманында Сен аланы жаннган ёртен кибик этериксе; Кесини ачыуланыуунда Раббий аланы жоярыкъды эмда аланы от ашап бошарыкъды.

¹¹ Сен аланы къарын сууларын жер башындан, аланы туудукъларын да адам улуланы арасындан къурутурукъса.

¹² Нек десенг ала Санга къажау аманлыкъ этерге кюрешгендиле, аман ниетле этгендиле, алай а аланы толтуралмагъандыла.

¹³ Сен аланы сыртларын ары бурдурлукъса, садакъ жаянга окъ салып, аланы бетлерин илишаннга тутарыкъса.

¹⁴ Раббий, кючюнг бла кётюрюл; биз да Сени къудуретинги юсюнден зикир айтырыкъбыз эм махтау саллыкъбыз.