Забур 19 - Сыйлы Инжил бла Забур

¹ Хорну таматасына: Дауутну зикири.

² Къайгъы кюнюнгде Раббий сени тилегинги къабыл этсин, Якъупну Аллахыны аты сени къорууласын.

³ Сыйлы юйюнден санга болушлукъ ийсин, Сиондан да санга кюч берсин.

⁴ Сени битеу къурман келтириулеринги эсине тюшюрсюн эм сени саулай кюйдюрюлген къурманларынгы да семиз этсин.

⁵ Сени жюрегинг сюйгенни санга берсин эм сени битеу муратларынгы толтурсун.

⁶ Сени къутхарылыуунга биз къууанырыкъбыз эмда бизни Аллахыбызны аты бла байракъ кётюрлюкбюз. Раббий сени битеу тилеклеринги толтурсун.

⁷ Раббий Кеси майлагъан кишини къутхаргъанын мен энди билдим; Кесини сыйлы кёклеринден Кесини онг къолуну къутхарыучу кючю бла анга жууап береди.

⁸ Бир къауумла файтонлары бла, бир къауумла атлары бла махтанадыла, биз а Раббий Аллахыбызны аты бла махтанабыз.

⁹ Ала тентирегендиле эм аугъандыла, биз а къопханбыз эмда тюз турабыз.

¹⁰ Раббий! Патчахны къутхар эмда, биз Сенден тилек этген заманда, бизни тилегибизни къабыл эт.