Забур 18 - Сыйлы Инжил бла Забур

¹ Хорну таматасына: Дауутну зикири.

² Кёкле Аллахны махтауун айтып билдиредиле, кёкню жайылгъаны Аны къолларыны этген ишлерин кёргюзтеди.

³ Кюн кюннге хапарын жаяды, кече да кечеге билим ачады.

⁴ Сёлешиу жокъду, сёзле да жокъдула, аланы ауазлары уа эшитилмейди.

⁵ Аланы ауазлары битеу жерни юсюнде эшитиледи эм аланы сёзлери дунияны чегине дери жетеди. Аллах аланы ичинде кюннге мекям салгъанды;

⁶ Кюн кесини некях тоханасындан чыкъгъан киеуге, къууанч бла жолун чабып ётюучю пелиуаннга ушайды;

⁷ Кёклени бир къыйырындан чыгъады эм аланы экинчи къыйырына дери барады, бир зат да аны жылыуундан бугъунуп къалмайды.

⁸ Раббийни закону тамамды, жаннга кюч береди. Раббийни юйретиулери тюздюле, хыйласызланы терен акъыллы этедиле.

⁹ Раббийни буйрукълары тюзлюклюдюле, жюрекни къууандырадыла. Раббийни фарызы жарыкъды, кёзлени жарытады.

¹⁰ Раббийден къоркъуулукъ тазады, ёмюрде да болуп турады. Раббийни хукмулары – хакъ кертиди, бары да тюзлюклюдюле.

¹¹ Ала алтындан да, кёп таза алтындан да бек кюселедиле, балдан да эм таракъ балны тамгъанындан да татлыдыла;

¹² Сени къулунг да ала бла сакъланады, аланы тутууда уллу саугъа барды.

¹³ Кесини жангылычларын ким эслерикди? Мени таша терсликледен тазала.

¹⁴ Биле-биле этилген гюняхладан да Сени къулунгу тый, ала мени хорламасынла. Ол заманда мен уллу бузулуудан айыпсыз эм таза боллукъма.

¹⁵ Мени ауузуму сёзлери да, мени жюрегими ойлашыуу да Сени ыразы этсинле, Раббий, мени къаям эм мени къутхарыучум!