Забур 17 - Сыйлы Инжил бла Забур

¹ Хорну таматасына: Раббийни къулу Дауутнуду. Раббий аны битеу душманларыны къолларындан эм Шауулну къолундан къутхаргъан заманда, Дауут бу зикирни сёзлерин Раббийге айтханды. Сора ол былай айтханды:

² Эй кючюм, Раббий, Сени сюйюп турлукъма!

³ Раббий мени къаламды эм ышыгъымды, мени къутхарыучумду; мени Аллахым, мени къаямды, мен Анга ышанама; мени къоруулаучумду, мени къутхарыучу мюйюзюм эм мени бегиген жерим Олду.

⁴ Махтау тийишли Раббийни чакъырлыкъма да душманларымдан къутуллукъма.

⁵ Мени ёлюм азапла алгъан эдиле эмда законсузлукъ ырхыла мени къоркъутхан эдиле;

⁶ Ахыратны сынжырлары манга кийдирилген эдиле, ёлюм аула да мени тутхан эдиле.

⁷ Такъырлыгъымда мен Раббийни чакъырдым эмда, болушлукъ излеп, Аллахыма къычырыкъ этдим. Ол да Кесини юйюнден мени ауазымы эшитди, мени къычырыгъым да Аны къулагъына жетди.

⁸ Сора Аллах чамланнганы себепли, жер тепди эм титиреди, тауланы мурдорлары къалтырадыла эм къымылдадыла;

⁹ Аны чамланыуундан тютюн, Аны ауузундан да ашап бошаучу от чыкъды, Андан жаннган кесеуле чачылдыла.

¹⁰ Ол кёклени ийилтип тюшдю – къарангылыкъ да Аны аякъларыны тюбюнде.

¹¹ Сора керуплагъа минип учду эмда желни къанатларында учуп кетди.

¹² Къарангыны да Кесине жабыу этди, кёкледеги булутланы сууларыны къарангылыгъын Кесини тёгерегине чатыр этди.

¹³ Аны аллындагъы жылтыраудан булутла чачыла эдиле, буз бла от кесеуле жауа эдиле.

¹⁴ Раббий кёкледе кюкюреди, Уллу Аллах Кесини ауазын берди, бузну бла от кесеулени жаудурду.

¹⁵ Кесини садакъ окъларын жиберип, душманларын чачды, кёп шыбылаларын жиберип, аланы къаушатды.

¹⁶ Раббий, Сен аланы тыйып чамланыуунгу жели бла ургъан заманда тенгизни тюбю кёрюндю, дунияны мурдорлары да ачылдыла.

¹⁷ Ол, бийикден къолун узатып, мени алды, уллу сууладан чыгъарды.

¹⁸ Мени кючлю душманымдан эмда менден къарыулу болгъан, мени кёрюп болмагъанладан мени къутхарды.

¹⁹ Мени къыйынлыкъ кюнюмде ала манга къажау тургъан эдиле, алай а Раббий мени таянчагъым болду.

²⁰ Ол мени эркин жерге чыгъарды эмда мени къутхарды, нек десенг Ол мени иги кёреди.

²¹ Мени тюзлюгюме кёре берди Раббий манга, мени къолларымы тазалыгъына кёре мени саугъалады.

²² Нек десегиз мен Раббийни жолларын тутханма эмда, аманлыкъ этип, Аллахымдан таймагъанма;

²³ Нек десегиз Аны битеу фарызлары мени аллымдадыла эмда Аны жорукъларындан мен чыкъмагъанма.

²⁴ Мен Аны аллында айыпсыз болгъанма эмда мен гюнях этмез ючюн сакъ болгъанма.

²⁵ Сора мени тюзлюгюме кёре, Аны кёзлерини аллында мени къолларымы тазалыгъына кёре берди Раббий манга.

²⁶ Мархаматлыгъа Сен мархамат этесе, халал кишиге халаллыкъ,

²⁷ Тазагъа – тазалыкъ, хыйлачыгъа уа аны хыйлачылыгъына кёре этесе.

²⁸ Нек десенг Сен унукъдурулгъан халкъланы къутхараса, кеслерин уллудан кёрген кёзлени уа ыйлыкъдыраса.

²⁹ Раббий, Сен мени чырагъымы жандыраса, мени Аллахым къарангылыгъымы жарытады.

³⁰ Сени бла мен аскерни хорлайма, Аллахым бла къабыргъагъа чыгъама.

³¹ Аллах! Айыпсызды Аны жолу, Раббийни сёзю тазады, Анга ышаннганланы барына да Ол къоруулаучуду.

³² Нек десегиз Раббийден башха Аллах кимди, бизни Аллахыбыздан башха, къоруулаучу да кимди?

³³ Аллах манга кюч береди эмда манга тюз жол къурайды.

³⁴ Мени аякъларымы бууну аякълары кибик женгил этеди эмда мени бийик жерледе турдурады;

³⁵ Мени къолларымы урушха юйретеди, мени билеклерим да багъыр садакъ жаяны ууатадыла.

³⁶ Сен, мени къоруулар ючюн, манга къутхарыу сауутунгу бергенсе, Сени онг къолунг да манга болушады, Сени ахшылыгъынг да мени сыйымы кётюреди.

³⁷ Сен мени атламымы мени аллымда кенг этесе, мени аякъларым да тентиремейдиле.

³⁸ Мен душманларымы ызларындан къууама, аланы жетип тутама эмда аланы къырып бошагъынчы къайтмайма.

³⁹ Аланы хорлайма, ала ёрге турургъа болалмайдыла, мени аякъ тюбюме тюшедиле.

⁴⁰ Нек десенг къазауат этерге манга кюч берген эмда манга къажау тургъанланы мени аякъ тюбюме салгъан Сенсе;

⁴¹ Сен мени душманларымы арт жанларын манга айландыргъанса, мен да мени кёрюп болмагъанланы къырама:

⁴² Ала болушлукъ излеп къычырыкъ этедиле, алай а къутхарыучу жокъду; Раббийге къычырадыла, алай а Ол алагъа жууап бермейди.

⁴³ Мен аланы желни аллында букъуча чачама, орамны балчыгъын малтагъанча, аланы малтайма.

⁴⁴ Халкъны къозгъалыуундан Сен мени къутхардынг, мени башха миллетлилеге башчыгъа салдынг; мен билмеген халкъ, манга къуллукъ этеди.

⁴⁵ Мени юсюмден жангыз да хапар эшитиулери бла манга бойсунадыла, башха миллетлиле мени аллымда ариу тиллилик этедиле.

⁴⁶ Башха миллетлиле къуруп, кеслерини бегиген жерлеринден къалтырап чыгъадыла.

⁴⁷ Раббий сауду, мени къоруулаучу алгъышлыды! Мени къутхарыучу Аллах кётюрюлсюн.

⁴⁸ Мени ючюн дерт жетдирген эмда халкъланы манга бойсундургъан

⁴⁹ эмда мени душманларымдан къутхарыучу Аллах! Манга къажау тургъанланы башлары бла мени ёрге кётюрген эмда кюйсюз адамдан мени къутхаргъан Сенсе.

⁵⁰ Аны ючюн Санга миллетлени арасында шукур этерикме, Раббий эм Сени атынга зикир айтырыкъма.

⁵¹ Патчахны аламат къутхарыучу, Кесинг майлагъан Дауутха эм аны туудукъларына ёмюрге да мархамат этиучю Сенсе.