Забур 16 - Сыйлы Инжил бла Забур

Дауутну тилеги.

¹ Раббий, тюзлюгюмю эшит, мени къычырыгъыма тынгыла, жалгъан айтмаучу ауузумдан тилекни къабыл эт.

² Манга хукму Сени Кесингден болсун, Сени кёзлеринг тюзлюкге къарасынла.

³ Сен мени жюрегими сынагъанса, кече мени жокълап келгенсе, мени сынап билгенсе эм бир зат да тапмагъанса: мен ауузум бла гюнях этмезге бегим этгенме.

⁴ Адамланы ишлеринде, зулмучуну жолларындан, Сени ауузунгу сёзю бла, мен кесими сакълагъанма.

⁵ Мени атламларымы Сени жолларынгда тут, мени аякъларым тентиремесинле.

⁶ Къычырыкъ этип Сенден тилек этеме мен, нек десенг Аллах, Сен мени тилегими къабыл этериксе; манга къулагъынгы сал, мени сёзлерими эшит.

⁷ Санга ышаннганланы алагъа къажау тургъанладан онг къолунг бла Къутхарыучу, манга аламат шафауатынгы кёргюзт;

⁸ Мени кёзню гинжисин сакълагъанча сакъла, къанатларынгы тюбюнде мени букъдур.

⁹ Манга чабыуул этген аман адамладан, мени къуршалап тургъан мени жанымы душманларындан мени букъдур.

¹⁰ Ала жюреклерин къатдыргъандыла, ауузлары бла ёхтем сёлешедиле.

¹¹ Энди хар атламыбызда бизни къуршалайдыла, бизни жерге жыгъар ючюн, ала кёзлерин бизге аралтхандыла;

¹² Ала аш излеген асланнга ушайдыла, жашырын жерледе бугъуп тургъан жаш асланнга ушайдыла.

¹³ Я Раббий, тур, аланы тый, аланы къорат! Къылычынг бла мени жанымы аман адамдан къутхар.

¹⁴ Раббий, аллай адамладан – юлюшлери бу жашауда болгъан дуния адамларындан – къолунг бла къутхар! Аланы къарынларын хазналарынгдан толтураса; аланы уланлары токъдула эмда кеслерини сабийлерине къалгъанын къоярыкъдыла.

¹⁵ Мен а тюзлюк бла Сени бетинге къарарыкъма, уянып, Сени сыфатынгдан токъ боллукъма.