Забур 15 - Сыйлы Инжил бла Забур

Дауутну жыры.

¹ Аллах, мени сакъла, нек десенг мен Санга ышанама.

² Мен Раббийге: «Мени Раббийим Сенсе», – дегенме, менде болгъан ахшылыкъла бары да Сендендиле.

³ Мени битеу талпыуум, жер башында болгъан Сени сыйлыларынга эмда аламатларынгады.

⁴ Башха аллахха ышаннганланы жарсыулары кёп болур; мен аланы къанлы къурманларына къатышмам, ауузум бла аланы атларын да сагъынмам.

⁵ Мени мюлк эм аякъ юлюшюм Раббийди. Мени жазыууму Сен тутуп тураса.

⁶ Мени чеклерим аламат жерлени юсю бла ётгендиле, мени мюлк жерим да манга ариу кёрюнеди.

⁷ Манга акъыл берген Раббийге махтау саллыкъма; кече окъуна мени ичим мени юйретеди.

⁸ Мен хар заманда да Раббийни аллымда кёргенме; Ол мени онг жанымда болгъаны ючюн тентирерик тюйюлме.

⁹ Аны ючюн мени жюрегим къууаннганды, тилим да сюйюннгенди эм мени чархым окъуна ышаныуда тынчайырыкъды;

¹⁰ Нек десенг Сен мени жанымы ахыратда къоймазса эмда Сени сыйлынга чиримекликни сынатмазса.

¹¹ Сен манга жашауну жолун кёргюзтюрюксе; къууанчланы толулугъу Сени аллынгдады, ёмюрде да зауукълукъ Сени онг къолунгдады.