Забур 149 - Сыйлы Инжил бла Забур

¹ Халелуя! Раббийге жангы зикир айтыгъыз; сыйлыланы жыйылыуунда Анга махтау болсун.

² Израиль аны жаратхан Аллахына сюйюнсюн, Сионну уланлары кеслерини Патчахларына къууансынла.

³ Аны атына тепсеп махтау салсынла, дауурбаз бла, саз бла Анга зикир айтсынла.

⁴ Нек десегиз Раббий Кесини халкъын иги кёреди, унукъгъанланы къутхарып махтаулу этеди.

⁵ Сыйлыла махтауда къууанч этсинле, кеслерини жатхан жерлеринде сюйюнюп зикир айтсынла.

⁶ Аллахха уллу ауаз бла махтау салсынла, эки ауузлу къылыч да аланы къолларында болсун

⁷ Миллетлеге дерт жетдирир, халкъланы азапха жолукъдурур ючюн,

⁸ Аланы патчахларын тутмакъгъа, аланы асылларын да темир бугъоулагъа салыр ючюн,

⁹ Жазылгъан хукмуну алагъа этер ючюн. Бу эркинлик Аны битеу сыйлыларынады. Халелуя!