Забур 148 - Сыйлы Инжил бла Забур

¹ Халелуя! Раббийни кёкледен махтагъыз, Аны бийикледе махтагъыз!

² Аны битеу мёлеклери, Аны махтагъыз, Аны битеу кёкдеги аскерлери, Аны махтагъыз.

³ Кюн бла ай, Аны махтагъыз, битеу жарыкъ жулдузла, Аны махтагъыз.

⁴ Кёклени кёклери эм кёкледен да бийикде болгъан суула, Аны махтагъыз.

⁵ Раббийни атын махтасынла, нек десенг Ол буюргъанлай жаратылгъандыла.

⁶ Аланы ёмюрледен ёмюрлеге да салгъанды, тюрленмезлик жорукъ бергенди.

⁷ Раббийни жерден махтагъыз, уллу чабакъла да эм битеу тюпсюзле да,

⁸ От бла буз да, къар бла булутла да, аны сёзюн толтуруучу къаты жел да,

⁹ Таула бла битеу дуппурла да, битим берген терекле бла битеу кедрле да,

¹⁰ Жаныуарла бла хар тюрлю мал да, сюркелип жюрюгенле бла къанатлыла да,

¹¹ Жерни патчахлары бла битеу миллетле да, бийле бла жерни битеу башчылары да.

¹² Жашла бла къызла да, къартла бла сабийле да

¹³ Раббийни атын махтасынла, нек десегиз жангыз Аны аты кётюрюлгенди, Аны махтауу жерден да, кёкледен да бийикди.

¹⁴ Ол Кесини халкъыны мюйюзюн, Кесини битеу сыйлыларыны махтауун – Израильни уланларыны, Анга жууукъ болгъан халкъны махтауун – кётюргенди. Халелуя!