Забур 144 - Сыйлы Инжил бла Забур

Дауутну махтау зикири.

¹ Эй Аллахым, эй Патчахым, Сени кётюрлюкме эм ёмюрледен ёмюрлеге да Сени атынга шукур этип турлукъма.

² Хар кюнден Санга шукур этип эмда Сени атынгы ёмюрледен ёмюрлеге да махтап турлукъма.

³ Раббий уллуду эмда кёп махтау тийишли Олду, Аны уллулугъуну чеги жокъду.

⁴ Тукъум тукъумгъа Сени ишлеринги махтап эмда Сени уллу кючюнгю билдирип турлукъду.

⁵ Мен а Сени аламатлыгъынгы бийик махтаууну юсюнден эмда Сени сейир ишлеринги юсюнден ойлашып турлукъма.

⁶ Сени къоркъунчлу ишлеринги къудуретини юсюнден айтып турлукъдула, мен да Сени уллулугъунгу билдирип турлукъма.

⁷ Сени уллу ахшылыгъынгы унутулмазлыкъ ишин халкъгъа билдирип эмда Сени тюзлюгюнге зикир этип турлукъдула.

⁸ Хатерлиди эм ырахматлыды Раббий, уллу тёзюмлюдю эм кёп мархаматлыды.

⁹ Раббий барына да игиликлиди, Аны ырахматы Аны битеу ишлерини юсю бла кёрюнеди.

¹⁰ Сени битеу ишлеринг Санга махтау салсынла, Раббий, эмда Сени сыйлыларынг Санга шукур этсинле.

¹¹ Сени патчахлыгъынгы аламатлыгъын билдирсинле эмда Сени къудуретинги юсюнден айтсынла.

¹² Адам улулагъа Сени къудуретли ишлеринги эмда Сени патчахлыгъынгы махтаулу уллулугъун ангылатсынла.

¹³ Сени патчахлыгъынг битеу ёмюрлени патчахлыгъыды, Сени бийлигинг битеу тукъумлагъады. Раббий берген сёзлерини барына да тюздю, битеу жаратханларына мархаматлыды.

¹⁴ Раббий битеу жыгъыла тургъанланы жыгъылтмай тутады эмда битеу жыгъылгъанланы къобарады.

¹⁵ Барыны да кёзлери Сенден умут этип турадыла, Сен аланы ашларын алагъа кезиуюнде бересе.

¹⁶ Къолунгу ачып, битеу жашагъанланы тойдураса.

¹⁷ Раббий битеу жолларында тюзлюклюдю эмда битеу ишлеринде ахшылыкълыды.

¹⁸ Раббий, Андан тилек этиучюлени барына да, Аны кертилик бла чакъырыучуланы барына да жууукъду.

¹⁹ Андан къоркъгъанланы тилегенлерин Ол толтурады, аланы тилеклерин къабыл этеди эмда аланы къутхарады.

²⁰ Раббий Аны сюйгенлени барын да сакълайды, аман адамланы уа барын да къырып бошарыкъды.

²¹ Мени ауузум Раббийни махтауун айтып турлукъду, ёмюрледен ёмюрлеге да хар адам да Аны сыйлы атына шукур этип турсун.