Забур 143 - Сыйлы Инжил бла Забур

Дауутну зикири.

¹ Мени къолларымы сермешге, бармакъларымы урушха юйретиучю, мени таянчагъым, Раббий алгъышлыды.

² Мархамат этиучюм эм жакълаучум, мени ышыгъым эм къутхарыучум, мени къоруулаучум Олду. Мен Анга ышанама, Ол мени халкъымы манга бойсундурады.

³ Я Раббий! Адам неди, Сен аны къайгъысын этер кибик, адам улу да неди анга эсинги бурур кибик?

⁴ Адам тылпыугъа ушашды, аны кюнлери кетип баргъан ауана кибик ётедиле.

⁵ Раббий! Кёклеринги ийилтип тюш, таулагъа тий, ала тютюнленсинле.

⁶ Шыбыланы жашнат да, душманланы чач, окъларынгы жибер да аланы къуу.

⁷ Бийикден къолунгу узат, кёп сууладан, башха миллетлилени къолларындан мени къутхар эм азат эт.

⁸ Аланы ауузлары ётюрюк айтханладан эмда аланы онг къоллары хыйлачы болгъанладан мени къутхар.

⁹ Аллах, жангы зикир этерикме Санга, он къыллы къобуз бла зикир этерикме Санга.

¹⁰ Патчахлагъа къутхарыу бериучю эмда Кеси къулунг Дауутну къанлы къылычдан къутултуучу Сенсе.

¹¹ Башха миллетлилени къолларындан мени къутхар эм азат эт, аланы ауузлары ётюрюк айтханладан эмда аланы онг къоллары хыйлачы болгъанладан мени къутхар.

¹² Бизни уланларыбыз, аланы жаш заманларында бек ёсген ёсюмлюклеча болсунла, бизни къызларыбыз да тоханалада уста ишленнген чигинжилеча субай болсунла.

¹³ Бизни кюфлерибиз хар тюрлю мирзеуден сыйыннгысыз толу болсунла, бизни къойларыбыз да жайлыкъларыбызда мингле бла эм тул-туманла бла кёп болуп барсынла.

¹⁴ Бизни тууарларыбыз семиз болсунла; не ташлау, не тас болуу, не бизни орамларыбызда ачы къычырыкъла болмасынла.

¹⁵ Бу затла анда болгъан халкъ насыплыды. Аны Аллахы Раббий болгъан миллет насыплыды.