Забур 142 - Сыйлы Инжил бла Забур

Дауутну зикири.

¹ Раббий! Мени тилегими къабыл эт, Сени хакъ кертинг ючюн мени тилек этиуюме тынгыла, Сени тюзлюгюнг ючюн тилегими эшит.

² Эмда къулунг бла сюдге кирме, нек десенг дунияда жашагъанладан жангыз биреу да Сени аллынгда кесин ариулаяллыкъ тюйюлдю.

³ Душман жаныма зулму этеди, жашаууму жерге малтагъанды, эртте ёлгенленича, мени къарангыда жашатханды.

⁴ Сора мени кёлюм ичимде сагъышлы болду, жюрегим ичимде къурушуп къалды.

⁵ Буруннгу кюнлени эсиме тюшюреме, Сени битеу ишлеринги юсюнден сагъыш этеме, Сени къолларынгы ишлерини юсюнден ойлашама.

⁶ Къолларымы Санга узатама; мени жаным Санга, суусап болгъан жер кибик термиледи.

⁷ Мени тилегими мычымай къабыл эт, Раббий, мени кёлюм онгсуз болады. Менден бетинги жашырма, мен къабыргъа тюшгенлеге ушаш болмайым.

⁸ Манга мархаматынгы эртте эшитдир, нек десенг мен Санга ышанама. Манга барыр жолуму кёргюзт, нек десенг мен жанымы Санга кётюреме.

⁹ Раббий, душманларымдан мени къутхар, Сенден болушлукъ излейме.

¹⁰ Сени буйругъунгу толтурургъа мени юйрет, нек десенг мени Аллахым Сенсе. Сени ахшылыкълы Нюрюнг мени тюзлюкню жерине элтсин.

¹¹ Раббий, Сени атынг ючюн, мени тирилт, Сени тюзлюгюнг ючюн мени жанымы палахдан чыгъар.

¹² Эмда Кеси мархаматынг бла мени душманларымы къурутуп боша, мени жанымы унукъдургъанланы барысын да жой, нек десенг мен Сени къулунгма.