Забур 140 - Сыйлы Инжил бла Забур

Дауутну зикири.

¹ Раббий! Сенден тилек этеме, манга ашыкъ; Сенден тилек этген заманымда, мени ауазыма тынгыла.

² Мени дууам бухурча, къолларымы кётюрюп этген тилегим да, ингирлик къурманча, Сени аллынга барсынла.

³ Раббий, мени ауузума къалауур сал эмда мени ауузуму эшиклерин сакъла.

⁴ Мени жюрегими, законсузлукъ этиучю адамла бла бирге гюнях ишле этер ючюн, хыйла сёзлеге тайыудан сакъла эмда мен аланы татыулу ашларындан ашамайым.

⁵ Тюзлюклю манга азап салсын: ол ахшылыкъды. Мени айыпласын, ол мени башыма заран этмезлик эм иги зейтун жауду. Мени тилегим а аманлыкъ этиучюлени ишлерине къажауду.

⁶ Аланы башчылары къаяладан атылгъандыла, мени сёзлерими тюз болгъанларын ангыларыкъдыла.

⁷ Бизни жерни жаргъан кибик жарадыла эм ууатадыла, бизни сюеклерибиз ахыратны жаякъларында чачыладыла.

⁸ Алай болгъанлыкъгъа, я Раббий Аллах, кёзлерим Сендедиле. Санга ышанама, мени жанымы атып къойма!

⁹ Мени манга салыннган тузакъладан, законсузланы башы жабылгъан уруларындан, сакъла.

¹⁰ Аман адамла кеслерини тузакъларына тюшерикдиле, мен а ётерикме.