Забур 138 - Сыйлы Инжил бла Забур

Хорну таматасына. Дауутну зикири.

¹ Раббий! Сен мени сынагъанса эм билесе.

² Сен билесе не заманда олтургъанымы эм не заманда тургъанымы. Мени сагъышларымы Сен узакъдан ангылайса.

³ Мен бара эсем да, солуй эсем да, Сен мени кёресе, мени битеу жолларым да Санга белгилидиле.

⁴ Мени тилимде сёзюм болгъунчу окъуна, Раббий, Сен аны тамам билесе.

⁵ Арт жанымдан да, ал жанымдан да Сен мени къуршалайса эмда мени юсюме къолунгу салып тураса.

⁶ Сени билиминг манга сейирликди, аны ангыларгъа болалмайма!

⁷ Сени Нюрюнгден къайры кетерикме, Сени бетингден да къайры къачарыкъма?

⁸ Кёкге чыкъсам да, Сен андаса, ахыратха тюшсем да, анда да Сенсе.

⁹ Танг жарыгъыны къанатларын алып, тенгизни ары жанына кёчсем да,

¹⁰ Анда да Сени къолунг мени жюрютюрюкдю эмда Сени онг къолунг мени тутуп турлукъду.

¹¹ «Мени къарангылыкъ жашырыр эсе уа, тёгерегимдеги жарыкъ кече болуп къалыр эсе уа», – десем да,

¹² Алай а къарангылыкъ да Санга къарангы тюйюлдю, кече да кюнча жарыкъды: къарангылыкъ да, жарыкъ да Санга бирдиле.

¹³ Сен мени ичими къурагъанса эмда мени анамы къарынында болдургъанса.

¹⁴ Мен сейир, аламат къуралгъаным ючюн санга шукур этеме. Сени ишлеринг аламатдыла, мени жаным муну толу ангылайды.

¹⁵ Мен ташада болдурулгъан, къарынны теренинде къуралгъан заманда мени сюеклерим Сенден жашыртын тюйюл эдиле.

¹⁶ Сени кёзлеринг, мени къарында жаратылгъанымы кёргендиле. Битеу манга буюрулгъан кюнле, аладан бири да болгъунчу окъуна Сени китабынгда жазылып эдиле.

¹⁷ Аллах, Сени ойлашыуларынг манга къалай багъалыдыла эмда аланы саны къалай кёпдю!

¹⁸ Аланы санап башласам да, ала юзмезден да кёпдюле; мен уяннган заманымда да, дагъыда Сени блама.

¹⁹ Эй Аллах, Сен аман адамны урсанг эди! Къан тёгюучюле, менден кери болугъуз!

²⁰ Ала Санга къажау аман сёз айтадыла, Сени душманларынг атынгы бошуна айтадыла.

²¹ Я Раббий, Сени кёрюп болмагъанланы мен кёрюп болмай эмда Санга къажау тургъанладан жийиргенмей къалай къалайым?

²² Аланы толу кёрюп болмаулукъ бла кёрюп болмайма, ала манга душманладыла.

²³ Аллах, мени сына эмда жюрегими бил, мени сынап кёр эмда сагъышларымы бил.

²⁴ Сора Сени ыразы этмеген затым бар эсе кёр эмда мени ёмюрлюк жолгъа тюзет.