Забур 135 - Сыйлы Инжил бла Забур

¹ Раббийге шукур этигиз, нек десегиз Ол ахшылыкълыды, Аны мархаматы ёмюргеди.

² Аллахланы Аллахына шукур этигиз, Аны мархаматы ёмюргеди.

³ Бийлени Бийине шукур этигиз, Аны мархаматы ёмюргеди.

⁴ Бир Кеси уллу сейир ишле этеди, Аны мархаматы ёмюргеди.

⁵ Кёклени уста жаратханды, Аны мархаматы ёмюргеди.

⁶ Жерни сууланы юсюнде бегитгенди, Аны мархаматы ёмюргеди.

⁷ Уллу жарыкъ бериучюлени жаратханды, Аны мархаматы ёмюргеди.

⁸ Кюнню – кюндюзгю кюнню жюрютюр ючюн, Аны мархаматы ёмюргеди.

⁹ Айны бла жулдузланы – кечени жюрютюр ючюн, Аны мархаматы ёмюргеди.

¹⁰ Мисирни тюнгючлерин къыргъанды, Аны мархаматы ёмюргеди.

¹¹ Сора Израильни аны ичинден чыгъаргъанды, Аны мархаматы ёмюргеди.

¹² Кючлю къолу бла эм узатылгъан билек кючю бла – Аны мархаматы ёмюргеди –

¹³ Къызыл тенгизни экиге юлешгенди, Аны мархаматы ёмюргеди.

¹⁴ Сора аны ичи бла Израильни ётдюргенди, Аны мархаматы ёмюргеди.

¹⁵ Сора фыргъауунну бла аны аскерин Къызыл тенгизге батдыргъанды, Аны мархаматы ёмюргеди.

¹⁶ Кесини халкъын къум тюзню юсю бла ётдюргенди, Аны мархаматы ёмюргеди.

¹⁷ Уллу патчахланы къыргъанды: Аны мархаматы ёмюргеди.

¹⁸ Эмда кючлю патчахланы ёлтюргенди – Аны мархаматы ёмюргеди –

¹⁹ Аморлуланы патчахы Сихонну – Аны мархаматы ёмюргеди –

²⁰ Башанны патчахы Огну, Аны мархаматы ёмюргеди.

²¹ Эмда аланы жерлерин мюлк юлюшге бергенди – Аны мархаматы ёмюргеди –

²² Кесини къулу Израильге юлюшге, Аны мархаматы ёмюргеди.

²³ Бизни сыйыбыз тюшюрюлгенде бизни эсине келтиргенди, Аны мархаматы ёмюргеди.

²⁴ Эмда душманларыбыздан бизни къутхаргъанды, Аны мархаматы ёмюргеди.

²⁵ Хар жаратылгъаннга аш береди, Аны мархаматы ёмюргеди.

²⁶ Кёклени Аллахына шукур этигиз, Аны мархаматы ёмюргеди.