Забур 134 - Сыйлы Инжил бла Забур

Халелуя!

¹ Раббийни атын махтагъыз, Раббийни къуллары, махтагъыз,

² Раббийни юйюнде, бизни Аллахыбызны юйюню арбазларында тургъанла!

³ Раббийни махтагъыз, нек десегиз Раббий ахшылыкълыды. Аны атына зикир айтыгъыз, нек десегиз бу татлыды.

⁴ Нек десегиз Якъупну Раббий Кесине сайлагъанды, Израильни Кесиники этгенди.

⁵ Мен, Раббий уллу экенин билдим, бизни Раббийибиз жалгъан аллахланы барысындан да уллуду.

⁶ Раббий битеу сюйген затын этеди, кёкледе да, жерде да, тенгизледе да эм тюпсюзлени барында да.

⁷ Жерни этегинден булутланы кётюреди, жауун заманда шыбыла этеди, Кесини асыраучу жерлеринден жел чыгъарады.

⁸ Ол, адамдан малгъа дери, Мисирни тюнгючлерин къыргъанды.

⁹ Мисир, сени ичинге, фыргъаууннга да битеу аны къулларына да илишанла бла сейир ишле ийгенди.

¹⁰ Кёп халкъланы къурутханды эмда кючлю патчахланы къырып бошагъанды:

¹¹ Аморлуланы патчахы Сихонну, Башанны патчахы Огну эм битеу Кенанны патчахлыкъларын.

¹² Аланы жерлерин Кесини халкъы Израильге юлюшге бергенди.

¹³ Раббий, Сени атынг ёмюргеди. Раббий, тукъумдан тукъумгъа Сени эсде тутарыкъдыла.

¹⁴ Нек десенг Раббий Кесини халкъына сюд этерикди эмда Кесини къулларына мархамат этерикди.

¹⁵ Мажюсюлени идоллары – алтын бла кюмюш – адамны къолларыны ишиди.

¹⁶ Аланы ауузлары барды, сёлешген а этмейдиле; аланы кёзлери барды, кёрген а этмейдиле;

¹⁷ Аланы къулакълары барды, эшитген а этмейдиле, аланы ауузларында тылпыулары да жокъду.

¹⁸ Аланы этиучюле эм алагъа ышаннган хар адам, ала кибик болуп къаллыкъдыла.

¹⁹ Израильни юйюрю! Раббийге шукур этигиз. Харунну юйюрю! Раббийге шукур этигиз.

²⁰ Левийни юйюрю! Раббийге шукур этигиз. Раббийден къоркъгъанла! Раббийге шукур этигиз.

²¹ Иерусалимде туруучу Раббийге Сиондан шукур болсун! Халелуя!