Забур 131 - Сыйлы Инжил бла Забур

Иерусалимге ёрлеу зикир.

¹ Я Раббий, Дауутну эмда аны битеу къыйынлыкъларын эсинге ал.

² Ол Раббийге къалай ант этгенин, Якъупну Кючлюсюне:

³ «Юйюме кирмем, тёшегиме жатмам;

⁴ Кёзлериме жукъу, кёз къабакъларыма къалкъыу бермем,

⁵ Раббийге жер, Якъупну Кючлюсюне мекям тапхынчыгъа дери», – деп ант сёз бергенин эсинге ал.

⁶ Ма, биз аны юсюнден Эфратада эшитген эдик, аны Яарны сабанларында тапхан эдик.

⁷ Аны мекямына барайыкъ, Аны аякъларыны тюбюне сежда этейик.

⁸ Я Раббий, тур, къудуретинги кюбюрчеги бла бирге тынчлыкъ журтунгда жерлеш.

⁹ Сени дин къуллукъчуларынг тюзлюкню кийсинле, Сени сыйлыларынг къууанып зикир айтсынла.

¹⁰ Кеси къулунг Дауут ючюн майлагъанынгы къабыл этмей къойма.

¹¹ Раббий Дауутха тюзлюк бла ант этгенди эмда андан таярыкъ тюйюлдю: «Сени къарын сууунгдан сени тахтанга олтуртурукъма.

¹² Сени уланларынг, Мен алагъа юйретирик, Мени кесаматымы бла Мени шартларымы тутуп турсала, аланы уланлары да ёмюрлеге да сени тахтангда олтурлукъдула», – дегенди.

¹³ Нек десенг Раббий Сионну сайлагъанды, аны Кесине мекям этерге сюйгенди:

¹⁴ «Ёмюрлеге да бу Мени мекямымды, мын мында жерлеширикме, нек десенг Мен аны сюйгенме.

¹⁵ Аны ашына уллу берекет берликме, аны факъырларын ётмекден тойдурлукъма.

¹⁶ Аны дин къуллукъчуларына къутхарыуну кийдирликме, аны сыйлылары да къууанч этерикдиле.

¹⁷ Анда Дауутха мюйюз ёсдюрлюкме, майлагъаныма чыракъ саллыкъма.

¹⁸ Аны душманларына айыпны кийдирликме, аны башында уа аны тажы жылтырарыкъды», – дегенди.