Забур 126 - Сыйлы Инжил бла Забур

Иерусалимге ёрлеу зикир. Сюлеменни.

¹ Юйню Раббий къурамаса, аны ишлегенле бош кюрешедиле; шахарны Раббий сакъламаса, къалауур жукъламай сакъ болуп бош турады.

² Сиз керексизге эртте къобасыз, кечге дери олтурасыз, къайгъы ётмек ашайсыз, нек десегиз Ол Кесини сюйгенине жукъу береди.

³ Ма, сабийле Раббийни берген мюлкюдюле, къарын бала Аны саугъасыды.

⁴ Жигитни къолунда садакъ окъла къалай эселе, адамны жашлыгъында туугъан сабийлери да алайдыла.

⁵ Кесини садакъ орунун аладан толтургъан адам насыплыды! Ала душманлары бла къабакъ аллында сёлешген заманларында айыплы боллукъ тюйюлдюле.