Забур 123 - Сыйлы Инжил бла Забур

Иерусалимге ёрлеу зикир. Дауутну.

¹ «Раббий бизни бла болмаса эди, – деп айтсын Израиль –

² Адамла бизге къажау тургъан заманда, Раббий бизни бла болмаса эди,

³ Аланы ачыулары бизге жаннган заманда, ала бизни саулай жутуп къояр эдиле;

⁴ Суула басып къояр эдиле бизни, жаныбызны юсю бла ырхы барыр эди;

⁵ Къутургъан суула жаныбызны юсю бла барыр эдиле».

⁶ Бизни аланы тишлерине ашха бермеген Раббий алгъышлыды!

⁷ Бизни жаныбыз, тутуучуланы ауларындан къанатлы къутулгъанча къутулгъанды; ау жыртылгъанды, биз да къутулгъанбыз.

⁸ Бизни болушлугъубуз кёкню бла жерни жаратхан Раббийни атындады.