Забур 118 - Сыйлы Инжил бла Забур

Алеф

¹ Жолларында айыпсызла, Раббийни законунда жюрюучюле насыплыдыла.

² Аны кесаматыны шартларын тутханла, Аны битеу жюреклери бла излегенле насыплыдыла.

³ Ала законсузлукъ этмейдиле, Аны жоллары бла жюрюйдюле.

⁴ Сен буйрукъларынгы къаты тутаргъа фарыз этгенсе.

⁵ Ой, мени жолларым Сени жорукъларынгы тутаргъа айлансала эди уа!

⁶ Сора мен Сени битеу фарызларынга эс бёлюп, айыплы болмаз эдим.

⁷ Мен, Сени тюз хукмуларынга юйрене, жюрегими тюзлюгю бла Санга махтау салыр эдим.

⁸ Сени жорукъларынгы тутуп турлукъма, мени атып къойма. Бейт

Бейт

⁹ Жаш адам кесини жолун къалай таза туталсын? Сени сёзюнгде кесин сакълау бла.

¹⁰ Битеу жюрегим бла Сени излейме, мени фарызларынгдан тайдырма.

¹¹ Мен Санга къажау гюнях этмез ючюн, Сени сёзюнгю жюрегимде жашыргъанма.

¹² Алгъышлыса Сен, Раббий! Мени жорукъларынга юйрет.

¹³ Сени ауузунгу битеу хукмуларын мен тилим бла билдиргенме.

¹⁴ Сени кесаматынгы шартларыны жолуна, хар тюрлю байлыкъгъа къууаннганча къууанама мен.

¹⁵ Сени буйрукъларынгы юсюнден ойлашама эмда Сени жолларынга къарап турама.

¹⁶ Сени жорукъларынг бла зауукъланама, Сени сёзюнгю унутмайма. Гимел

Гимел

¹⁷ Мен къулунга ахшылыкъ кёргюзт, сора жашарма эм Сени сёзюнгю тутарма.

¹⁸ Мени кёзлерими ач, сора Сени законунгу сейирлик ишлерин кёрюрме.

¹⁹ Мен жер башында жолоучума, фарызларынгы менден жашырма.

²⁰ Хар заманда да Сени хукмуларынгы кюсеуюмден мени жаным онгсуз болгъанды.

²¹ Ёхтемлени, налатланы, Сени фарызларынгдан тайгъанланы Сен жууашдыргъанса.

²² Сёгюлюуню бла бедишликни мени юсюмден кетер, нек десенг мен Сени кесаматынгы шартларын тутама.

²³ Бийле, олтурушуп, манга къажау бир тилли боладыла, Сени къулунг а Сени жорукъларынгы юсюнден ойлашады.

²⁴ Сени кесаматынгы шартлары мени зауукъландырадыла, манга акъыл юйретедиле. Далет

Далет

²⁵ Мени жаным жерге жыгъылгъанды, Кеси сёзюнг бла мени тирилт.

²⁶ Мен жолларымы ачыкъ этеме, Сен мени тилегими къабыл этгенсе; жорукъларынга мени юйрет.

²⁷ Манга буйрукъларынгы жолун ангылат, сора Сени сейирлик ишлеринги юсюнден ойлашырма.

²⁸ Мени жаным къайгъыдан эрип барады, сёзюнг бла мени кючлендир.

²⁹ Ётюрюкню жолун менден кери эт эмда законунг бла манга ахшылыкъ эт.

³⁰ Мен тюз жолну сайлагъанма, Сени хукмуларынгы унутмагъанма.

³¹ Мен Сени кесаматынгы шартларына жабышып къалгъанма, Раббий, мени уялтма.

³² Сен мени жюрегими кенгертсенг, Сени фарызларынгы жолу бла жюрюрме. Хе

Хе

³³ Раббий, Сени жорукъларынгы жолун манга кёргюзт, мен аны ахырына дери тутарма.

³⁴ Манга акъыл бер, сора Сени законунгу тутарма эмда аны битеу жюрегим бла толтурурма.

³⁵ Мени фарызларынгы жолунда жюрют, нек десенг мен аны бла зауукъланама.

³⁶ Мени жюрегими, малкёзлюкге тюйюл, Сени кесаматынгы шартларына айландыр.

³⁷ Мени кёзлерими бош затха къаратма, Кеси жолунгда мени тирилт.

³⁸ Сёзюнгю – Сенден къоркъуучулагъа берген сёзюнгю – мен къулунга бегит.

³⁹ Мен андан къоркъгъан, мени аманнга чыгъарылыууму тый, нек десенг Сени хукмуларынг ахшылыкълыдыла.

⁴⁰ Ма, мен буйрукъларынгы кюсейме, тюзлюгюнг бла мени тирилт. Уау

Уау

⁴¹ Раббий, манга Сени мархаматларынг келсинле, Кеси сёзюнг бла Сени къутхарыуунг келсин.

⁴² Сора мен манга аман айтханнга жууап берирме, нек десенг Сени сёзюнге ышанама.

⁴³ Мени ауузумдан хакъ керти сёзню сыйырып къойма, нек десенг мени умутум Сени хукмуларынгады.

⁴⁴ Сора ёмюрден ёмюрге да, хар заманда да Сени законунгу тутарыкъма.

⁴⁵ Эркин жюрюп турлукъма, нек десенг Сени буйрукъларынгы тутаргъа излейме.

⁴⁶ Патчахланы алларында Сени кесаматынгы шартларыны юсюнден айтырыкъма, уяллыкъ да тюйюлме.

⁴⁷ Сени фарызларынг бла зауукъланып турлукъма, аланы бек сюеме.

⁴⁸ Мен Сени фарызларынгы сюеме, алагъа къолларымы узатырыкъма эмда жорукъларынгы юсюнден ойлашырыкъма. Зайин

Зайин

⁴⁹ Мен къулунга айтып, мени ышандыргъан сёзюнгю эсинге ал.

⁵⁰ Сени сёзюнг мени тирилтгени, бу мени къыйынлыгъымда жюрек жапсарылыуумду.

⁵¹ Ёхтемле мени бек хыликкя этген эдиле, алай болгъанлыкъгъа, мен Сени законунгдан таймагъанма.

⁵² Раббий, Сени ёмюрден бола келген хукмуларынгы эсиме тюшюрюп, жапсарылып тургъанма.

⁵³ Сени законунгу къойгъан аман адамланы кёрген заманымда, мени чамланыу алады.

⁵⁴ Мени жолоучулукълада айланнган жеримде Сени жорукъларынг мени зикирлерим болгъан эдиле.

⁵⁵ Мен кечегиде Сени атынгы эсиме тюшюрюп тургъанма, Раббий, эм законунгу тутханма.

⁵⁶ Ол мени болуп къалгъанды, нек десенг Сени буйрукъларынгы толтурама. Хет

Хет

⁵⁷ Раббий, мени юлюшюм Сенсе, Сени сёзюнгю тутаргъа айтханма мен.

⁵⁸ Мен битеу жюрегим бла Сенден тилек этеме, Кеси сёзюнге кёре манга мархамат эт.

⁵⁹ Жолларымы юсюнден ойлашханма эмда аякъларымы Сени кесаматынгы шартларына бургъанма.

⁶⁰ Сени фарызларынгы тутаргъа ашыкъгъанма, мычымагъанма.

⁶¹ Аман адамланы тузакълары мени къуршалагъан эдиле, алай болгъанлыкъгъа мен Сени законунгу унутмай эдим.

⁶² Сени тюзлюклю хукмуларынг ючюн кече арасында Санга шукур этерге къобуп турама.

⁶³ Битеу Сенден къоркъуучулагъа эм Сени буйрукъларынгы тутуучулагъа мен нёгерме.

⁶⁴ Раббий, Сени мархаматынгдан жер толуду, жорукъларынга мени юйрет. Тет

Тет

⁶⁵ Кесинг сёз бергенингча, къулунга ахшылыкъ этгенсе Сен, Раббий.

⁶⁶ Ахшы ангылаугъа эм билимге юйрет мени, нек десенг Сени фарызларынга мен ийнанама.

⁶⁷ Мен азап чегиуюмден алгъа ажаша эдим, энди уа Сени сёзюнгю тутама.

⁶⁸ Ахшы эмда ахшылыкъ этиучю Сенсе, жорукъларынга мени юйрет.

⁶⁹ Ёхтемле манга къажау ётюрюкню тизип айтадыла, мен а битеу жюрегим бла Сени буйрукъларынгы толтурлукъма.

⁷⁰ Аланы жюреклери сезимсиз болгъанды, мен а Сени законунг бла зауукъланама.

⁷¹ Мени азап чекгеним, манга ахшы болду, Сени жорукъларынга юйренир ючюн болду.

⁷² Сени ауузунгдан чыкъгъан закон манга кёп минг алтындан бла кюмюшден да игиди. Йод

Йод

⁷³ Сени къолларынг жаратхандыла мени эм къурагъандыла мени; мени акъылландыр, сора Сени фарызларынга юйренирикме.

⁷⁴ Мен Сени сёзюнге ышаннганымы кёрюп, Сенден къоркъуучула къууанырла.

⁷⁵ Раббий, Сени хукмуларынг тюзлюклю болгъанларын билеме, Сен манга тийишлисича тюз азап салгъанса.

⁷⁶ Къулунга сёз бергенингча, Сени мархаматынг мени жапсарсын.

⁷⁷ Манга Сени мархаматынг келсин, сора мен жашап турурма, нек десенг Сени законунг бла зауукъланама.

⁷⁸ Мени терслигим болмагъанлай унукъдургъанлары ючюн, ёхтемле уялсынла, мен Сени буйрукъларынгы юсюнден ойлашама.

⁷⁹ Сенден къоркъгъанла эм Сени кесаматынгы шартларын билгенле манга къошулсунла.

⁸⁰ Мени жюрегим Сени жорукъларынгда бузукъсуз болсун, сора мен айыплы болмам. Каф

Каф

⁸¹ Сени къутхарыуунгу тилеп, жаным эрийди; Сени сёзюнге ышанама.

⁸² Сени сёзюнгю кюсегенимден кёзлерим эрийдиле; мен: «Сен мени къачан жапсарлыкъса?» – дейме.

⁸³ Мен, тютюн ичинде кёрюкча болуп къалгъанма, алай болгъанлыкъгъа Сени жорукъларынгы унутмагъанма.

⁸⁴ Мен къулунгу жашау кюнлери ненчадыла? Манга зулму этгенлеге къачан сюд этериксе?

⁸⁵ Сени законунга да къарамай, ёхтемле манга уру къазгъандыла.

⁸⁶ Сени битеу фарызларынг хакъ кертидиле. Терслигим болмагъанлай, манга артыкълыкъ этедиле, манга болуш!

⁸⁷ Жер башында мени жояргъа аздан къойдула, алай болгъанлыкъгъа Сени буйрукъларынгдан таймагъанма.

⁸⁸ Мархаматынг бла мени тирилтип тур, сора Сени ауузунг айтхан кесаматынгы шартларын тутуп турлукъма. Ламед

Ламед

⁸⁹ Я Раббий, Сени сёзюнг ёмюрлеге да кёкледе бегигенди.

⁹⁰ Сени хакъ кертинг тукъумдан тукъумгъады. Жерни Сен салгъанса, ол турады.

⁹¹ Сени хукмуларынг бла хар неда бюгюннге дери да турады, нек десенг хар неда Санга къуллукъ этеди.

⁹² Сени законунг мени жапсарылыуум болмаса эди, мен къыйынлыгъымда жоюлур эдим.

⁹³ Сени буйрукъларынгы ёмюрге да унутурукъ тюйюлме, нек десенг Сен мени ала бла тирилтесе.

⁹⁴ Мен Сеникиме, мени къутхар! Нек десенг мен Сени буйрукъларынгы излегенме.

⁹⁵ Аман адамла, жояр ючюн, мени марап турадыла, мен а Сени кесаматынгы шартларыны юсюнден терен ойлашама.

⁹⁶ Мен хар тамамлыкъны чеги барын кёргенме. Сени фарызынг а чексиз кенгди. Мем

Мем

⁹⁷ Сени законунгу мен къалай бек сюеме! Сау кюнню аны юсюнден ойлашып турама.

⁹⁸ Сени фарызларынг мени душманларымдан эсе мени терен акъыллы этгендиле; ала хар заманда да мени биргемедиле.

⁹⁹ Битеу устазларымдан эсе мен ангылаулу болдум, нек десенг Сени кесаматынгы шартларыны юсюнден ойлашып турама.

¹⁰⁰ Сени буйрукъларынгы тутханым себепли мен къартладан эсе билимлиме.

¹⁰¹ Сени сёзюнгю тутар ючюн аякъларымы хар тюрлю аман жолдан тыяма.

¹⁰² Сен мени юйретип тургъанынг себепли Сени хукмуларынгдан таймайма.

¹⁰³ Сени сёзлеринг мени тамагъыма къалай татлыдыла! Мени ауузума балдан да татлыдыла.

¹⁰⁴ Мен Сени буйрукъларынгдан акъыл алдым, ол себепден хар тюрлю жалгъан жолну кёрюп болмайма. Нун

Нун

¹⁰⁵ Сени сёзюнг мени аягъыма чыракъды эм мени жолума жарыкъды.

¹⁰⁶ Сени тюзлюклю хукмуларынгы тутаргъа ант этгенме, аны толтурлукъма.

¹⁰⁷ Бек унукъгъанма мен, Раббий; Кесинг сёз бергенингча, мени тирилт.

¹⁰⁸ Мени ауузуму сюйюп этген шукур къурманларын къабыл эт, Раббий, эмда хукмуларынга мени юйрет.

¹⁰⁹ Мени жаным дайым къоркъуудады, алай болгъанлыкъгъа Сени законунгу унутмайма.

¹¹⁰ Аман адамла манга тузакъ салгъандыла, алай болгъанлыкъгъа мен Сени буйрукъларынгдан таймагъанма.

¹¹¹ Сени кесаматынгы шартларын мен мюлкча ёмюрюме къабыл этдим, нек десенг ала мени жюрегими къууанчыдыла.

¹¹² Сени жорукъларынгы ёмюрге, ахыргъа дери да толтурургъа жюрегими ийилтдим. Самех

Самех

¹¹³ Адамланы жалгъан ойлашыуларын кёрюп болмайма, Сени законунгу уа сюеме.

¹¹⁴ Сен мени жакълаучумса эм къоруулаучумса. Сени сёзюнге ышанама.

¹¹⁵ Законсузла, менден тайыгъыз, мен Аллахымы фарызларын тутарыкъма.

¹¹⁶ Мен сау турур ючюн, Кеси сёзюнг бла мени кючлендир, мени ышаныуумда мени уялтма.

¹¹⁷ Манга болуш, мен къутулайым эмда тохтаусуз Сени жорукъларынга тюшюнюп турайым.

¹¹⁸ Сени жорукъларынгдан тайгъанланы барын да Сен къоратаса, нек десенг аланы хыйлалыкълары бошду.

¹¹⁹ Сен жерни аман адамларын, барысын да, магъаданны кюлюн сибиргенча сибирип къояса; ол себепден мен Сени кесаматынгы шартларын сюеме.

¹²⁰ Сени къоркъутууунгдан мени чархым титирейди эмда Сени хукмуларынгдан мен къоркъама. Айин

Айин

¹²¹ Мен тюзлюк эмда тюз хукму этгенме, манга зулму этиучюлеге мени берип къойма.

¹²² Мен къулунгу къоруула, манга ахшылыкъ эт; ёхтемле Мени унукъдурмасынла.

¹²³ Сени къутхарыуунгу эм Сени тюзлюклю сёзюнгю сакълай, мени кёзлерим эрип барадыла.

¹²⁴ Мен къулунга мархаматынга кёре эт эмда жорукъларынга мени юйрет.

¹²⁵ Мен Сени къулунгма; манга анг бер, сора Сени кесаматынгы шартларын билирме.

¹²⁶ Раббий, Санга этер заман болгъанды, Сени законунгу бузгъандыла.

¹²⁷ Мен а Сени фарызларынгы алтындан да, эм таза алтындан да бек сюеме.

¹²⁸ Сени битеу буйрукъларынгы битеу тюзге санайма, хар тюрлю жалгъан жолну кёрюп болмайма. Пе

Пе

¹²⁹ Сени кесаматынгы шартлары аламатдыла, ол себепден мени жаным аланы тутады.

¹³⁰ Сени сёзлеринги ачылыуу жарыкъ береди, хыйласызланы акъылландырады.

¹³¹ Ауузуму ачып ахтынама, нек десенг Сени фарызларынгы кюсейме.

¹³² Сени атынгы сюйгенлеге этгенингча, манга къарап, манга да мархамат эт.

¹³³ Аякъларымы Сени сёзюнгде жюрют эм бир тюрлю законсузлукъгъа да мени бийлерге къойма.

¹³⁴ Адамны унукъдурууундан мени къутхар, сора Сени буйрукъларынгы тутарма.

¹³⁵ Мен къулунгу Кеси бетинги жарыгъы бла жарыт эмда мени жорукъларынга юйрет.

¹³⁶ Адамла Сени законунгу тутмагъанлары ючюн, мени кёзлеримден суу ырхыла тёгюледиле. Цаде

Цаде

¹³⁷ Тюзлюклюсе Сен, Раббий, Сени хукмуларынг да тюздюле.

¹³⁸ Сен фарыз этген кесаматынгы шартлары тюздюле эм тамам хакъ кертидиле.

¹³⁹ Душманларым Сени сёзлеринги унутуп къойгъанлары ючюн эришлигим мени ашап къояды.

¹⁴⁰ Сени сёзюнг бек тазады, Сени къулунг аны сюеди.

¹⁴¹ Гитчеме мен эм сансызма, алай болгъанлыкъгъа Сени буйрукъларынгы унутмайма.

¹⁴² Сени тюзлюгюнг ёмюрлюк тюзлюкдю, Сени законунг да хакъ кертиди.

¹⁴³ Манга къайгъы бла къыйынлыкъ жетгенди, Сени фарызларынг мени жапсарылыуумду.

¹⁴⁴ Сени кесаматынгы шартлары ёмюрге да тюздюле, мени акъылландыр, сора мен сау турурма. Къоф

Къоф

¹⁴⁵ Битеу жюрегим бла тилек этеме: мени тилегими къабыл эт, Раббий; Сени жорукъларынгы тутарыкъма.

¹⁴⁶ Сенден тилек этеме: мени къутхар; Сени кесаматынгы шартларын тутарыкъма.

¹⁴⁷ Тангдан алгъа туруп, Сенден болушлукъ излеп къычырыкъ этеме, Сени сёзюнге ышанама.

¹⁴⁸ Сау кече жукъламай, Сени сёзюнгю юсюнден ойлашып турама.

¹⁴⁹ Я Раббий, мархаматынг бла мени ауазымы эшит, хукмунг бла мени тирилт.

¹⁵⁰ Харам ниет тутуучула жууукълашхандыла, ала Сени законунгдан узакъдыла.

¹⁵¹ Сен жууукъса, Раббий, Сени фарызларынг хакъ кертидиле.

¹⁵² Сен кесаматынгы шартларын ёмюрлеге да бегитгенинги мен эрттеден билгенме. Реш

Реш

¹⁵³ Мени инжилиуюмю кёрюп, мени къутхар, нек десенг мен Сени законунгу унутмайма.

¹⁵⁴ Мени ишими жакълап, мени къоруула, Кеси берген сёзюнг бла мени тирилт.

¹⁵⁵ Къутхарылыу аман адамладан узакъды, нек десенг ала Сени жорукъларынгы излемейдиле.

¹⁵⁶ Раббий, Сени ырахматынг кёпдю, хукмуларынг бла мени тирилт.

¹⁵⁷ Манга зулму этиучю душманларым кёпдюле, алай болгъанлыкъгъа Сени кесаматынгы шартларындан таймайма.

¹⁵⁸ Иймандан тайгъанланы кёрюп жарсыйма, нек десенг ала Сени сёзюнгю тутмайдыла.

¹⁵⁹ Мен Сени буйрукъларынгы къалай сюйгеними кёр, Раббий, мархаматынг бла мени тирилт.

¹⁶⁰ Сени сёзюнгю мурдору хакъ кертиди, Сени тюзлюклю хукмуларынг бары да ёмюргедиле. Син / Шин

Син / Шин

¹⁶¹ Бийле терслигим болмагъанлай, манга зулму этедиле, алай болсада жюрегим Сени сёзлерингден къоркъады.

¹⁶² Сени сёзюнге уллу хазна тапханча къууанама.

¹⁶³ Ётюрюкню кёрюп болмайма эм андан жийиргенеме, Сени законунгу уа сюеме.

¹⁶⁴ Сени тюзлюклю хукмуларынг ючюн Санга кюнден жети кере махтау салама.

¹⁶⁵ Сени законунгу сюйгенлени ырахатлыкълары уллуду, ала бир заманда да тентиремезле.

¹⁶⁶ Сени къутхарыуунга ышанама, Раббий, эм Сени фарызларынгы толтурама.

¹⁶⁷ Мени жаным Сени кесаматынгы шартларын тутады, мен аланы бек сюеме.

¹⁶⁸ Сени буйрукъларынгы бла Сени кесаматынгы шартларын тутама, нек десенг битеу жолларымы Сен кёресе. Тау

Тау

¹⁶⁹ Мени къычырыкъ этип этген тилегим Сени аллынга жууукълашсын, Раббий; Кеси сёзюнг бла мени акъылландыр.

¹⁷⁰ Мени тилегим Сени аллынга жетсин, Кеси берген сёзюнг бла мени къутхар.

¹⁷¹ Сен мени жорукъларынга юйретсенг, мени ауузум махтау салыр.

¹⁷² Мени тилим Сени сёзюнгю билдирир, Сени битеу фарызларынг тюзлюклюдюле.

¹⁷³ Сени къолунг манга болушуп турсун, нек десенг Сени буйрукъларынгы сайлагъанма.

¹⁷⁴ Сени къутхарыуунга термилеме, Раббий, Сени законунг бла зауукъланама.

¹⁷⁵ Мени жаным сау туруп, Санга махтау салып турсун, Сени хукмуларынг манга болушсунла.

¹⁷⁶ Мен тас болгъан къойча ажашханма. Мен къулунгу излеп тап, нек десенг мен Сени фарызларынгы унутмагъанма.