Забур 117 - Сыйлы Инжил бла Забур

¹ Раббийге махтау салыгъыз, нек десегиз Ол ахшылыкълыды, Аны мархаматы ёмюргеди.

² Израильни юйюрю энди: «Аны мархаматы ёмюргеди», – десин.

³ Харунну юйюрю энди: «Аны мархаматы ёмюргеди», – десин.

⁴ Раббийден къоркъгъанла энди: «Аны мархаматы ёмюргеди», – десинле.

⁵ Такъырлыгъымда мен Раббийден тилек этгенме, Ол мени тилегими къабыл этгенди эмда мени эркин жерге чыгъаргъанды.

⁶ Раббий мени жанлыды, къоркъурукъ тюйюлме; адам манга не этерикди?

⁷ Раббий мени жанлыды, манга болушлукъчуду, душманларыма кёл кенгдирирме.

⁸ Адамдан умут этгенден эсе, Раббийге ышанып тургъан игиди.

⁹ Бийледен умут этгенден эсе, Раббийге ышанып тургъан игиди.

¹⁰ Битеу миллетле мени къуршалагъан эдиле, алай а мен аланы Раббийни аты бла хорлагъан эдим.

¹¹ Мени тёгерегимден алгъан эдиле, мени къуршалагъан эдиле, алай а мен аланы Раббийни аты бла хорлагъан эдим.

¹² Бал чибинлеча мени тёгерегимден алгъан эдиле эмда чыгъанада отча ёчюлген эдиле. Мен аланы Раббийни аты бла хорлагъан эдим.

¹³ Мен жыгъылыр ючюн, мени бек тюртген эдиле, алай болгъанлыкъгъа Раббий манга болушхан эди.

¹⁴ Мени кючюм эм зикирим Раббийди. Ол мени къутхарылыуум болуп къалгъанды.

¹⁵ Къууанч эм къутхарылыу ауаз тюзлюклюлени мекямларындады. Раббийни онг къолу къудуретин кёргюзтеди!

¹⁶ Раббийни онг къолу бийикди, Раббийни онг къолу къудуретин кёргюзтеди!

¹⁷ Ёллюк тюйюлме, алай а жашарыкъма эм Раббийни ишлерин билдирип турлукъма.

¹⁸ Раббий манга къаты азап салды, алай а мени ёлюмге бермеди.

¹⁹ Манга тюзлюкню къабакъларын ачыгъыз; аладан кирип, Раббийге махтау саллыкъма.

²⁰ Ма Раббийни къабакълары, аладан тюзлюклюле кирликдиле.

²¹ Сен мени тилегими къабыл этгенинг эм мени къутхарылыуум болгъанынг ючюн, Санга шукур этеме.

²² Юй ишлеучюле къабыл этмей къойгъан таш, мюйюшню баш ташы болгъанды.

²³ Ол Раббийденди эм бизни кёзюбюзге сейир кёрюнеди.

²⁴ Бу кюнню Раббий болдургъанды, бу кюнде сюйюнейик эм къууанч этейик!

²⁵ Я Раббий, къутхар бизни! Я Раббий, болуш бизге!

²⁶ Раббийни аты бла келген алгъышлыды! Раббийни юйюнден сизге алгъыш этебиз.

²⁷ Аллах Раббийди, Ол бизни жарытханды. Къурманны жипле бла байлагъыз, къурман этилиучю жерни мюйюзлерине элтигиз.

²⁸ Сен мени Аллахымса, Санга шукур этерикме. Сен мени Аллахымса, Сени кётюрлюкме.

²⁹ Раббийге шукур этигиз, нек десегиз Ол ахшылыкълыды, Аны мархаматы ёмюргеди.