Забур 113 - Сыйлы Инжил бла Забур

¹ Израиль Мисирден, Якъупну юйюрю башха тилли халкъны ичинден чыкъгъан заманда,

² Яхуда Аны сыйлы жери, Израиль Аны бийлеген къыралы болуп къалгъанды.

³ Тенгиз кёрюп, агъып кетгенди, Иордан артха айланнганды.

⁴ Таула къочхарлача, дуппурла да къозулача секире эдиле.

⁵ Тенгиз, санга не болгъанды, сен агъып кетерча? Иордан, санга да не болгъанды сен артха айланырча?

⁶ Таула, сиз къочхарлача нек секиресиз? Дуппурла, сиз да къозулача нек секиресиз?

⁷ Жер, Раббийни аллында, Якъупну Аллахыны аллында титире.

⁸ Ол, къаяны кёлге, ташны да шаудан суугъа буруп къойгъанды.

⁹ Бизге тюйюл, Раббий, бизге тюйюл, алай а Кеси атынга махтау бер, Сени мархаматынг ючюн, Сени хакъ кертинг ючюн.

¹⁰ «Аланы Аллахлары къайдады да?» – деп, мажюсю миллетле бир заманда да айтмасынла.

¹¹ Бизни Аллахыбыз кёкледеди, битеу не сюйсе, аны этеди.

¹² Аланы табыннган суратлары уа – алтын бла кюмюш, адамны къолларыны ишиди.

¹³ Аланы ауузлары барды, сёлешген а этмейдиле. Аланы кёзлери барды, кёрген а этмейдиле.

¹⁴ Аланы къулакълары барды, эшитген а этмейдиле. Аланы бурун тешиклери барды, ийис а ангыламайдыла.

¹⁵ Аланы къоллары барды, сезген а этмейдиле. Аланы аякълары барды, жюрюген а этмейдиле эмда ала тамакълары бла ауаз чыгъармайдыла.

¹⁶ Аланы этиучюле да, битеу алагъа ышаннганла да ала кибик болуп къалырла.

¹⁷ Израилни юйюрю! Раббийге ышаныгъыз, бизни болушлукъчубуз эм къоруулаучубуз Олду.

¹⁸ Харунну юйюрю! Раббийге ышаныгъыз, бизни болушлукъчубуз эм къоруулаучубуз Олду.

¹⁹ Раббийден къоркъгъанла! Раббийге ышаныгъыз, бизни болушлукъчубуз эм къоруулаучубуз Олду.

²⁰ Раббий бизни эсинде тутады, бизге алгъыш этеди, Израильни юйюрюне алгъыш этеди, Харунну юйюрюне алгъыш этеди.

²¹ Раббийден къоркъгъанланы гитчелерине да, уллуларына да алгъыш этеди.

²² Раббий сизге кёпден кёп къошсун, сизге да, сизни сабийлеригизге да.

²³ Кёкню бла жерни жаратхан Раббий сизни алгъышлы этсин.

²⁴ Кёк жангыз Раббийниди, жерни уа Ол адам улуларына бергенди.

²⁵ Ёлюклени – къабыргъа тюшюрюле тургъанланы – бири да махтау салмаз Раббийге.

²⁶ Алай а биз энди да, ёмюрге да Раббийге шукур этип турлукъбуз. Халелуя!