Забур 109 - Сыйлы Инжил бла Забур

Дауутну зикири.

¹ Раббий мени Бийиме: «Мен душманларынгы Сени аякъ тюбюнге салгъынчыгъа дери, Мени онг жанымда олтур», – дегенди.

² Раббий Санга Сиондан къудурет аса таягъынгы иерикди: «Сен душманларынгы арасында бийлик эт», – дерикди.

³ Кючюнгю кёргюзтюр кюнюнгде Сени халкъынг сыйлы жасау бла аскерге сюйюп барлыкъды, Сени уланларынг тангны къарынындан туугъан чыкъча санга келликдиле.

⁴ Раббий ант этгенди эм сокъуранырыкъ тюйюлдю: «Сен Мелкиседекни чынында ёмюрге да дин къуллукъчуса», – дегенди.

⁵ Раббий Сени онг жанынгдады. Ол Кесини чамланыу кюнюнде патчахланы къырып бошарыкъды.

⁶ Миллетлеге сюд этерикди, жерни ёлюкледен толтурлукъду, жерни хар жанында да башчыланы ууатырыкъды.

⁷ Жолда шаудан суудан ичерикди эм ол себепден башын кётюрлюкдю.