Забур 107 - Сыйлы Инжил бла Забур

¹ Жыр. Дауутну зикири.

² Аллахым, мени жюрегим хазырды, битеу кёлюм бла зикир айтырыкъма эм махтау зикир этерикме.

³ Арфа да, саз да уяныгъыз! Мен эртте турлукъма.

⁴ Раббий, Санга халкъланы арасында шукур этерикме, Санга миллетлени арасында махтау саллыкъма.

⁵ Нек десенг Сени мархаматынг кёкледен да бийикди, Сени хакъ кертинг булутлагъа дериди.

⁶ Кёкледен да бийикге кётюрюл, Аллах, Сени махтауунг битеу жерни башы бла болсун!

⁷ Сени сюйгенле къутулур ючюн, бизни онг къолунг бла къутхар эмда мени тилегими къабыл эт.

⁸ Аллах Кесини сыйлы жеринде былай айтханды: «Бек къууанып, Шехемни юлеширикме, Сукот ёзенни да ёлчелерикме.

⁹ Гилад Меникиди, Манаше Меникиди, Эфрайим да Мени башымдагъы темир бёркдю, Яхуда Мени патчах таягъымды,

¹⁰ Моап Мени бет-къол жууучу тазымды, Эдомну юсюне чуругъуму атарыкъма, Филистияны жерини башы бла къычырлыкъма», – дегенди.

¹¹ Бегиген шахаргъа мени ким кийирир? Эдомгъа дери мени ким жетдирир?

¹² Сен тюйюлмюсе, Аллах, бизни алгъын атып къойгъан эм бизни аскерлерибиз бла чыкъмагъан?

¹³ Такъырлыкъда бизге болушлукъ бер, нек десенг адамны къоруулауу фанады.

¹⁴ Биз Аллах бла кюч кёргюзюрбюз. Ол бизни душманларыбызны агъызырыкъды.