Забур 106 - Сыйлы Инжил бла Забур

БЕШИНЧИ КИТАП

¹ «Раббийге шукур этигиз; нек десегиз Ол ахшылыкълыды, Аны мархаматы ёмюргеди!» –

² Деп алай айтсынла Раббий къутхаргъанла. Ол аланы душманны къолундан къутхаргъанды

³ Эмда къыралладан, кюн чыкъгъандан эм кюн батхандан, шималдан эм къыбыладан жыйгъанды.

⁴ Ала къум тюзде адам жюрюмеген жолда ажашып айланнгандыла эмда кеслерине жашаргъа шахар тапмагъандыла.

⁵ Ачлыкъ эм суусаплыкъ сынагъандыла, аланы жанлары аланы ичлеринде эригенди.

⁶ Ол заманда кеслерини къайгъыларында Раббийден тилек этгендиле, сора Ол аланы къыйынлыкъларындан къутхаргъанды

⁷ Эмда, ала жашар шахаргъа барыр ючюн, аланы тюз жол бла элтгенди.

⁸ Аны адам улулагъа мархаматы эмда сейир ишлери ючюн Раббийге шукур этсинле!

⁹ Нек десегиз Ол термилген жанны тойдургъанды, ач болгъан жанны да ахшылыкъладан толтургъанды.

¹⁰ Ала, мудахлыкъ бла эм темир сынжырла бла бугъоуланып, къарангыда эм ёлюм ауанада олтургъандыла.

¹¹ Нек десегиз Аллахны сёзлерине боюн салмагъандыла, Уллу Аллахны буйругъун сан этмей къойгъандыла.

¹² Ол аланы жюреклерин ауур ишле бла бойсундургъанды, ала онгсуз болгъандыла, алагъа болушхан адам болмагъанды.

¹³ Ол заманда кеслерини къайгъыларында Раббийден тилек этгендиле, сора Ол аланы къыйынлыкъларындан къутхаргъанды.

¹⁴ Аланы къарангыдан эм ёлюм ауанадан чыгъаргъанды эмда аланы бугъоуларын ууатханды.

¹⁵ Аны адам улулагъа мархаматы эмда сейир ишлери ючюн Раббийге шукур этсинле!

¹⁶ Нек десегиз Ол багъыр къабакъланы ууатханды эм темир къылычланы сындыргъанды.

¹⁷ Оюмсузла кеслерини законсузлукъ жоллары эм терсликлери ючюн азап чекгендиле.

¹⁸ Хар тюрлю ашдан аланы кёллери чыкъгъанды, сора ала ёлюмню къабакъларына жууукълашхандыла.

¹⁹ Ол заманда кеслерини къайгъыларында Раббийден тилек этгендиле, сора Ол аланы къыйынлыкъларындан къутхаргъанды;

²⁰ Кесини сёзюн ийип, аланы сау этгенди эмда аланы тюшген уруларындан къутхаргъанды.

²¹ Аны адам улулагъа мархаматы эмда сейир ишлери ючюн Раббийге шукур этсинле!

²² Анга шукур къурман келтирсинле эмда Аны ишлерини юсюнден зикир айтып билдирсинле!

²³ Тенгизде кемеле бла жюрюучюле, уллу суулада саудюгерлик этиучюле

²⁴ Тенгизни теренинде Раббийни этгенлерин эм Аны сейирлик ишлерин кёргендиле.

²⁵ Ол айтханлай, уллу жел къопханды, тенгизни толкъунларын бийикге кётюргенди.

²⁶ Кёклеге дери чыкъгъандыла, тюпсюзге дери тюшгендиле, аланы жанлары къыйынлыкъда эригенди.

²⁷ Ала, эсиргенлеча, тёгерек айланнгандыла эм тентирегендиле, аланы акъыллары башларындан кетгенди.

²⁸ Ол заманда кеслерини къайгъыларында Раббийден тилек этгендиле, сора Ол аланы къыйынлыкъларындан къутхаргъанды.

²⁹ Ол уллу желни шошлукъгъа бургъанды, тенгиз толкъунла да тохтагъандыла.

³⁰ Сора толкъунланы тыннганларына къууаннгандыла, Ол аланы сюйген пристаньларына келтиргенди.

³¹ Аны адам улулагъа мархаматы эмда сейир ишлери ючюн Раббийге шукур этсинле!

³² Халкъны жамауатында Аны кётюрсюнле эмда таматаланы жыйылыуунда Анга махтау салсынла!

³³ Ол баргъан сууланы къум тюзге, суу чыкъгъан жерлени да къургъакъ жерге,

³⁴ Битимли жерни тузлу жерге айландырып къояды, анда жашагъанланы аманлыкълары ючюн.

³⁵ Ол къум тюзню кёлге, къуругъан жерни да шаудан суулагъа айландырып къояды

³⁶ Эмда анда ач болгъанланы жерлешдиреди, ала да анда жашаргъа шахар ишлейдиле.

³⁷ Сабанлагъа урлукъ себедиле, жюзюм бахчала орнатадыла, ала уа алагъа уллу битим бередиле.

³⁸ Ол алагъа берекет береди, ала бек кёбеедиле, аланы малларын да аз этмейди.

³⁹ Ала азайгъандыла, унугъуудан, къыйынлыкъдан эм къайгъыдан аууп къалгъандыла.

⁴⁰ Ол бийлени сансыз этеди эмда аланы жол болмагъан жерде, къум тюзде ажашып айланыргъа къояды.

⁴¹ Жарлыны уа къыйынлыкъдан чыгъарады эмда аны тукъумун къой сюрюуча кёп этеди.

⁴² Тюзлюклюле муну кёрюп къууанадыла, хар бир законсузлугъ’а ауузун къысады.

⁴³ Акъыллы адам быланы эслер эмда Раббийни мархаматын ангылар.