Забур 105 - Сыйлы Инжил бла Забур

¹ Халелуя! Раббийге махтау салыгъыз, нек десегиз Ол ахшылыкълыды, Аны мархаматы ёмюргеди.

² Раббийни къудуретли ишлерин ким айталлыкъды, Аны битеу махтауун ким айтып билдираллыкъды?

³ Хар заманда да тюз хукмуну тутуучула эм тюзлюк этиучюле насыплыдыла!

⁴ Эй Раббий, халкъынга ыразылыкъ этген кезиуюнгде мени эсинге тюшюр, мени келип къутхар.

⁵ Эмда мен Сени сайлагъанларынгы зауукъ жашагъанларын кёрейим, Сени халкъынгы къууанчы бла къууанайым, Сени туудукъларынг бла махтанайым.

⁶ Биз аталарыбызча гюняхлы болгъанбыз, законсузлукъ этгенбиз, аманлыкъ этгенбиз.

⁷ Бизни аталарыбыз Мисирде Сени сейирлик ишлеринги ангыламагъандыла, Сени кёп ахшылыкъларынгы эслеринде тутмагъандыла эмда тенгизни къатында, Къызыл тенгизни къатында, къозгъалгъандыла.

⁸ Алай болгъанлыкъгъа Раббий, Кесини къудуретин кёргюзтюр ючюн, аланы Кесини атыны хатеринден къутхаргъанды.

⁹ Къызыл тенгизге къаты айтханынлай, ол къуруп къалгъанды, сора аланы тюпсюзле бла, къургъакъ жерни юсю бла ётдюргенча ётдюргенди.

¹⁰ Аланы кёрюп болмагъанны къолундан къутхаргъанды, душманны къолундан аланы къутултханды.

¹¹ Аланы душманларын суула басхандыла, аладан бирлери да къалмагъанды.

¹² Сора ала Аны сёзлерине ийнаннгандыла эмда Анга махтау зикир этгендиле.

¹³ Алай болгъанлыкъгъа, Аны ишлерин терк унутхандыла, Аны муратыны толурун сакъламагъандыла.

¹⁴ Къум тюзде кеслерин тыйгъысызлыкъгъа бергендиле, къуу жерде Аллахны сынагъандыла.

¹⁵ Ол аланы тилегенлерин толтургъанды, алай болгъанлыкъгъа аланы жанларына ауруу ийгенди.

¹⁶ Сора ыстауатда Мусагъа бла Раббийни сыйлысы Харуннга зарланнгандыла.

¹⁷ Жер, жарылып, Датанны жутуп къойгъанды, Абирамны жыйымдыгъын басханды.

¹⁸ Сора аланы жыйымдыкъларында от жаннганды, аман адамланы жаннган от кюйдюрюп къойгъанды.

¹⁹ Хорепни къатында тана сурат ишлегендиле эм ол эритилип къуюлгъан суратха баш ургъандыла

²⁰ Эмда Аллахны махтауун, кырдык ашаучу ёгюзню суратына алышхандыла.

²¹ Аланы къутхарыучу Аллахны, Мисирде уллу ишле,

²² Хамны жеринде сейирлик затла, Къызыл тенгизни къатында къоркъунчлу ишле этген Аллахны унутхандыла.

²³ Сора аланы къырып бошаргъа айтхан эди. Ол сайлагъан Муса, аланы жойдурмазгъа, Аны чамланыуун тыяр ючюн, къая жарылгъанда Аны аллына турмаса эди, Ол алай этер эди.

²⁴ Сора ала, кюселген жерни сан этмей къойгъандыла, Аны сёзюне ийнанмагъандыла.

²⁵ Эмда кеслерини чатырларында тарыкъгъандыла, Раббийни ауазына тынгыламагъандыла.

²⁶ Сора Ол, Кесини къолун алагъа кётюрюп, аланы къум тюзде къоратыргъа,

²⁷ Миллетле арасында аланы тёлюлерин къоратып, аланы жер-жерлеге чачаргъа ант этгенди.

²⁸ Ала Баалпеоргъа жабышып къалгъандыла эмда жансызлагъа этилген къурманланы ашагъандыла.

²⁹ Кеслерини ишлери бла Аллахны чамландыргъандыла, сора алагъа ёлет киргенди.

³⁰ Пинехас, туруп, сюд этгенди, – сора ёлет тохтагъанды.

³¹ Бу иш анга тукъумдан тукъумгъа да, ёмюрге да тюзлюклюлюкге саналгъанды.

³² Сора Мерибаны сууларыны къатында Аллахны чамландыргъандыла, Муса да ала амалтын къыйынлыкъ кёргенди.

³³ Нек десенг ала аны жанын къыйнагъандыла, сора ол ауузу бла оюмсуз сёлешгенди.

³⁴ Раббий алагъа буюргъанча, халкъланы къырмагъандыла.

³⁵ Алай а миллетле бла къатыш болуп къалгъандыла эмда аланы адетлерине юйреннгендиле.

³⁶ Аланы таш суратларына къуллукъ этгендиле, ол да алагъа тузакъ болгъанды.

³⁷ Эмда кеслерини жашларын бла къызларын жинлеге къурманнга келтирип тургъандыла.

³⁸ Терслиги болмагъан къанны Кенанлы идоллагъа къурманнга келтирип, кеслерини жашларыны бла къызларыны къанларын тёгюп тургъандыла, сора жер къандан харам болгъанды.

³⁹ Кеслерини ишлери бла кеслерин харам этгендиле, кеслерини этиулери бла саякълыкъ этгендиле.

⁴⁰ Сора Раббийни Кеси халкъына къаты ачыуу чыкъгъанды, Кесини юлюшюнден Аны кёлю чыгъып къалгъанды.

⁴¹ Сора аланы миллетлени къолларына берип къойгъанды, аланы кёрюп болмагъанла да алагъа ие болуп къалгъандыла.

⁴² Аланы душманлары аланы унукъдургъандыла, ала да аланы къолларыны тюбюнде бойсуннгандыла.

⁴³ Ол аланы кёп кере къутхаргъанды. Ала уа Аны, кеслерини къажыкъмаулукълары бла чамландыргъандыла эмда кеслерини законсузлукълары ючюн ыспассыз болгъандыла.

⁴⁴ Алай болгъанлыкъгъа Ол аланы къычырыкъларын эшитген заманында аланы къайгъыларына къарагъанды.

⁴⁵ Кесини ала бла кесаматын эсине тюшюргенди эм Кесини кёп мархаматы бла сокъураннганды.

⁴⁶ Аланы жесир этгенлени барын да, алагъа жазыкъсындыргъанды.

⁴⁷ Эй Раббий Аллахыбыз, бизни къутхар эмда бизни миллетле арасындан жый, Сени сыйлы атынга шукур этейик, Сени махтауунг бла махтанайыкъ.

⁴⁸ Израилни Раббий Аллахы, ёмюрден ёмюрге да алгъышлыды! Битеу халкъ: «Амин!» – десин. Халелуя!