Забур 104 - Сыйлы Инжил бла Забур

¹ Раббийге шукур этигиз, Аны атын чакъырыгъыз, Аны ишлерин халкъла арасында билдиригиз.

² Анга зикир этигиз эмда Анга махтау зикир айтыгъыз, Аны битеу сейирлик ишлерин айтып билдиригиз.

³ Аны сыйлы аты бла махтаныгъыз, Раббийни излегенлени жюреклери къууансынла.

⁴ Раббийни эмда Аны кючюн излегиз, хар заманда Аны бетин излегиз.

⁵ Аны этген сейирликлерин, Аны илишанларын эмда Аны ауузу бла этген хукмуларын эсигизге алыгъыз.

⁶ Сиз, Ибрахимни урлугъу, Аны къулларысыз, Якъупну уланлары, Аны сайлагъанларысыз.

⁷ Ол бизни Раббий Аллахыбызды, Аны хукмулары битеу жер башындадыла.

⁸ Кесини кесаматын, минг тукъумлагъа фарыз этген сёзюн,

⁹ Ибрахим бла этген кесаматын, Исхакъгъа ант бла айтханын ёмюрге эсинде тутады.

¹⁰ Ол аны Якъупха закон этип, Израил бла ёмюрлюк кесамат этип салгъанды.

¹¹ «Кенанны жерин сизге жер юлюшге санга берликме», – деп айтханды.

¹² Ала алыкъа аз, бек аз санлы болгъан заманда, ала ол жерде тыш къыраллыла эдиле

¹³ Эмда бир миллетден бир миллетге, бир патчахлыкъдан башха халкъгъа кёчюп жюрюгендиле.

¹⁴ Бир кишиге да аланы жанларына тиерге къоймагъанды эмда патчахланы тыйып, аланы юсюнден:

¹⁵ «Майлагъанларыма тиймегиз, файгъамбарларыма да аманлыкъ этмегиз», – деп айтханды.

¹⁶ Сора жерге ачлыкъ келтиргенди, хар тюрлю мирзеу чёпню къурутханды.

¹⁷ Аланы алларында адам ийгенди: Юсюп жесирликге сатылгъанды.

¹⁸ Аны аякъларын бугъоула бла къысхандыла, аны жаны темирге киргенди.

¹⁹ Аны сёзю толгъунчугъа дери алай къалгъанды, Раббийни сёзю аны сынап тургъанды.

²⁰ Патчах, адам ийип, аны эркин этдиргенди, халкъланы иеси аны азат этгенди.

²¹ Кесини юйюне аны ие этип, кесини битеу къыралына да оноучу этип салгъанды.

²² Кесини ёзюрлерине ол сюйгенча насийхат берирге, кесини таматаларына да акъыл юйретирге эркинлик бергенди.

²³ Ол заманда Израиль Мисирге келгенди, Якъуп Хамны жерине кёчгенди.

²⁴ Сора Аллах Кесини халкъын бек кёп этгенди эмда аны душманларындан эсе кючлю этгенди.

²⁵ Аланы жюреклеринде Кесини халкъына къажау кёрюп болмаулукъ эм Кесини къулларына къажау хыйлалыкъ къозгъагъанды.

²⁶ Кесини къулу Мусаны, кеси сайлагъан Харунну ийгенди.

²⁷ Ала мисирлилени арасында Аллахны илишанларын, Хамны жеринде Аны сейирлик ишлерин кёргюзтгендиле.

²⁸ Ол къарангылыкъны ийгенди эмда жерни къарангы этгенди, сора Аны сёзюне къажау туралмагъандыла.

²⁹ Аланы сууларын къаннга бургъанды эмда аланы чабакъларын жойгъанды.

³⁰ Аланы жерлери аланы патчахларыны жукълаучу отоуларында окъуна мардасыз кёп макъа чыгъаргъанды.

³¹ Ол айтханлай, аланы битеу жерлерине тул-тубан чибинле, ургъуйла келгендиле.

³² Жауунну орунуна алагъа буз, аланы жерлерине кюйдюрген от ийгенди.

³³ Сора аланы жюзюмлерин, инжир тереклерин къурутханды эмда аланы жерлеринде хар тюрлю тереклени ууатханды.

³⁴ Ол айтханлай, мачала, эсепсиз кёп мача къуртла келгендиле.

³⁵ Аланы жерлеринде битеу кырдыкны ашап бошагъандыла, аланы сабанларында битеу битимлерин да ашагъандыла.

³⁶ Ол аланы жерлеринде хар тюнгючню, аланы эркекликлерини биринчи туугъанларыны барын да къыргъанды.

³⁷ Сора Израильчилени алтын бла эм кюмюш бла чыгъаргъанды, аланы тукъумларында ауругъан да болмагъанды.

³⁸ Мисир аланы чыкъгъанларына къууаннганды, нек десенг аладан анга къоркъуу тюшгенди.

³⁹ Аланы жабаргъа булут, алагъа кече жарыкъ этерге да от жайгъанды.

⁴⁰ Тилегендиле, Ол алагъа бёденеле ийгенди, Израильчилени кёкню ётмеги бла тойдургъанды.

⁴¹ Ташны жарып, суула агъызгъанды, баргъан суу болуп къургъакъ жерле бла агъып тебирегендиле.

⁴² Нек десенг Ол Кесини къулу Ибрахимге берген сыйлы сёзюн эсине тюшюргенди.

⁴³ Эмда Кесини халкъын къууанч бла, Кеси сайлагъанланы жарыкълыкъ бла чыгъаргъанды.

⁴⁴ Алагъа миллетлени жерлерин бергенди, ала башха халкъланы къыйынларына ие болуп къалгъандыла,

⁴⁵ Ала Аны жорукъларын тутар ючюн эм Аны законларын сакълар ючюн. Халелуя!