Забур 102 - Сыйлы Инжил бла Забур

Дауутну зикири.

¹ Эй жаным, Раббийге махтау сал эм битеу ичим Аны сыйлы атына шукур эт.

² Эй жаным, Раббийге шукур эт эмда Аны битеу этген ахшылыкъларын унутма.

³ Ол сени битеу законсузлукъларынгы кечеди, битеу аурууларынгы сау этеди.

⁴ Сени жанынгы къабырдан къутхарады, санга мархаматы бла эм ырахматы бла ахшылыкъ этеди.

⁵ Сени кюсеуюнгю ахшылыкъладан тойдурады, сени жашлыгъынг къушха ушаш жангырады.

⁶ Битеу зулмулукъ кёргенлеге Раббий тюзлюк бла хукму этеди.

⁷ Ол Кесини жолларын Мусагъа, Кесини ишлерин Израильни уланларына кёргюзтгенди.

⁸ Ырахматлыды эм хатерлиди Раббий, уллу тёзюмлюдю эм кёп мархаматлыды.

⁹ Ачыуланыуу хар заманнга тюйюлдю, чамланыуу да ёмюрге тюйюлдю.

¹⁰ Бизге гюняхларыбызгъа кёре этмегенди, законсузлукъларыбызгъа кёре айыбыбызгъа тюбетмегенди.

¹¹ Нек десегиз кёк жерден къалай бийик эсе да, Раббийни мархаматы да Андан къоркъгъанлагъа алай уллуду.

¹² Кюн чыкъгъан кюн батхандан къалай узакъ эсе да, Ол бизни терсликлерибизни бизден алай узакъ этгенди.

¹³ Ата сабийлерине къалай мархамат эте эсе да, Раббий да Андан къоркъгъанлагъа алай мархамат этеди.

¹⁴ Нек десегиз Ол бизни неден къуралгъаныбызны биледи, биз топуракъ болгъаныбызны эсинде тутады.

¹⁵ Адамны жашау кюнлери кырдык кибикди, аулакъда гокка ханс кибик, ол алай чагъады.

¹⁶ Анга жел урса, ол жокъ болады, энди аны жери да билинирик тюйюлдю.

¹⁷ Раббийни мархаматы уа Андан къоркъгъанлагъа ёмюрден ёмюргеди,

¹⁸ Аны тюзлюгю да, Аны кесаматын тутханланы эмда Аны буйрукъларын эслеринде тутуп аланы толтургъанланы сабийлерини сабийлеринеди.

¹⁹ Раббий кёкледе Кесини тахтасын салгъанды, Аны патчахлыгъы барына да иеди.

²⁰ Аны сёзюню ауазына бойсунуп, Аны сёзюн толтуруучу, Аны уллу кючлю мёлеклери Раббийге шукур этигиз.

²¹ Аны буйругъун толтуруучу, Анга къуллукъ этген, Аны битеу аскерлери Раббийге шукур этигиз.

²² Аны патчахлыгъыны хар жеринде, Аны битеу ишлери Раббийге шукур этигиз. Эй жаным, Раббийге шукур эт!