Забур 101 - Сыйлы Инжил бла Забур

¹ Термилгенни тилеги; ол онгсуз болгъан эм Раббийни аллында кесини къайгъысын тёкген заманда жазылгъанды.

² Раббий! Мени тилегими къабыл эт, мени ачы къычырыгъым Санга эшитилсин.

³ Менден бетинги букъдурма, мени къайгъы кюнюмде манга къулагъынгы сал; мен Сенден тилек этген кюнде, мени тилегими терк къабыл эт.

⁴ Нек десенг мени кюнлерим тютюнча думп болуп кетгендиле, Мени сюеклерим да кесеуча кюйгендиле.

⁵ Мени жюрегим бузулгъанды эм кырдыкча къуругъанды, мен ётмегими ашаргъа да унутуп къояма.

⁶ Мени ынчхагъан тауушумдан сюеклерим этиме жабышып къалгъандыла.

⁷ Мен къум тюзде пеликаннга ушап къалгъанма, мен оюлгъан юйледе укуча болуп къалгъанма.

⁸ Юй башында жангыз тургъан къанатлыча, кёзюме жукъу кирмей турама.

⁹ Мени душманларым хар кюн сайын манга аман айтадыла, манга къанлары къайнагъанла да мени айтып къаргъайдыла.

¹⁰ Сени ачыуланыуунгдан эм Сени чамланыуунгдан ётмек орунуна кюл ашайма, суусунуму да жилямукъларым бла къатышдырама.

¹¹ Нек десенг Сен мени кётюргенсе эмда мени энишге атханса.

¹² Мени кюнлерим кетип баргъан ауана кибикдиле; мен, кырдыкча, къуруп къалгъанма.

¹³ Раббий, Сен а ёмюрге да тураса, тукъумдан тукъумгъа Сени эсде тутарыкъдыла.

¹⁴ Сен, туруп, Сионнга жазыкъсынырыкъса, нек десенг анга мархамат этер заман болгъанды, белгиленнген кезиу келгенди.

¹⁵ Аны ташлары да Сени къулларынга багъалыдыла, аны топурагъына да жанлары ауруйду.

¹⁶ Сора миллетле Раббийни атындан, жерни битеу патчахлары да Сени аламатлыгъынгдан къоркъурукъдула.

¹⁷ Нек десенг Раббий Сионну къурарыкъды эмда Кесини аламатлыгъы бла кёрюнюрюкдю.

¹⁸ Къарыусузланы тилеклерине къарарыкъды, аланы тилек этиулерин да сансыз этип къоярыкъ тюйюлдю.

¹⁹ Муну юсюнден артда келлик тукъумгъа жазыллыкъды, келлик тёлю да Раббийге махтау саллыкъды.

²⁰ Нек десенг Ол Кесини сыйлы бийиклигинден эсин ийгенди, Раббий кёкледен жерге къарагъанды.

²¹ Тутмакъланы ынчхагъанларын эшитип, ёлтюрюлюп азап чегерик адамланы азат этгенди.

²² Сора халкъла бла патчахлыкъла Раббийге къуллукъ этер ючюн бирге жыйылгъан заманда,

²³ Раббийни аты Сионда, Аны махтауу да Иерусалимде билдирилликди.

²⁴ Ол жолда мени къарыууму алгъанды, мени кюнлерими къысхартханды.

²⁵ Мен былай айтханма: «Эй Аллахым! Мени ёмюрюмю жарымында мени алып кетме. Сени жылларынг ёмюрледен ёмюрлегедиле.

²⁶ Башланнганда Сен жерни къурагъанса, кёкле да Сени къолларынгы ишиди.

²⁷ Ала жоюллукъдула, Сен а хар заманда да турлукъса. Ала бары да кийим кибик эски боллукъдула эм къапталныча Сен аланы алышындырлыкъса, ала тюрленирикдиле.

²⁸ Сен а ол бир халдаса, Сени жылларынг тауусуллукъ тюйюлдюле.

²⁹ Сени къулларынгы уланлары жашарыкъдыла, аланы урлукълары да Сени аллынгда бегирикдиле».