Забур 100 - Сыйлы Инжил бла Забур

Дауутну зикири.

¹ Мархаматны, тюзлюкню юсюнден зикир айтырыкъма, Раббий, Санга зикир айтырыкъма.

² Айыпсыз жолну юсюнден ойлашырыкъма. Сен манга къачан келликсе? Юйюмю ортасында жюрегими тазалыгъы бла жюрюрюкме.

³ Кёзлерими аллына керексиз затны саллыкъ тюйюлме. Аллахдан тайгъанланы ишлерин кёрюп болмайма, ол манга жабышырыкъ тюйюлдю.

⁴ Бузукъ жюрекли менден кетерилликди, огъурсузну мен танырыкъ тюйюлме.

⁵ Кесини жууугъундан жашыртын тил этиучюню кетерликме, ёхтем кёзлюге бла эсирик жюреклиге тёзюп къоярыкъ тюйюлме.

⁶ Мени кёзлерим жерни тюз ниетли адамларындады, ала мени къатымда жашарыкъдыла. Айыпсыз жол бла жюрюген адам, манга къуллукъ этерикди.

⁷ Аманлыкъ этиучю мени юйюмде жашарыкъ тюйюлдю, жалгъан айтыучу мени кёзлерими аллында къаллыкъ тюйюлдю.

⁸ Танг аласындан башлап жерни битеу аман адамларын жокъ этерикме, сора битеу законсузлукъ этиучюлени Раббийни шахарындан къоратырыкъма.