Забур 10 - Сыйлы Инжил бла Забур

Хорну таматасына: Дауутну зикири.

¹ Раббийге ышанама, манга: «Къанатлы кибик, тауугъузгъа учуп кет.

² Нек десенг ма аман адамла садакъны тартхандыла, къарангыда тюз жюреклилеге атар ючюн, окъларын жаягъа салгъандыла.

³ Мурдорла оюлгъан заманда, тюзлюклю не этерикди?» – деп къалай айтасыз?

⁴ Раббий Кесини сыйлы юйюндеди, Раббийни тахтасы кёкледеди, Аны кёзлери кёредиле, Аны кёз къабакълары адам улуланы сынайдыла.

⁵ Раббий тюзлюклюню сынайды, аман адамны бла зорлукъ этерге сюйюучюню уа Ол кёрюп болмайды.

⁶ Жаннган кесеулени – отну бла кукуртну – Ол аман адамлагъа жауунча къуярыкъды, кюйдюрген жел да аланы аякъдан юлюшлериди.

⁷ Нек десегиз Раббий тюзлюклюдю, тюзлюкню сюеди, Аны бетин тюзлюклю адам кёрлюкдю.