Римлилеге 9 - Сыйлы Инжил бла Забур

Аллахны сайлагъанлары

¹ Мен Масихни болуп, тюзюн айтама, ётюрюк айтмайма. Сыйлы Нюрню оноуунда болгъан мени жюрегим да айтханларым тюз болгъанына манга шагъатлыкъ этеди.

² Манга уллу жарсыу барды, мени жюрегим тохтаусуз къыйналып турады.

³ Мени туугъан къарындашларым ючюн – мени бла бир тукъумлу болгъан Израильлиле ючюн – мен кесим, налат болуп, Масихден къысталыргъа сюер эдим.

⁴ Аллах аланы Кесине уланла этгенди, алагъа Кесини аламатлыгъын кёргюзтгенди, ала бла кесаматларын этгенди, алагъа Тауратны, Кесине къуллукъ этдириу низамны эмда ант сёзлени бергенди.

⁵ Уллу атала аланы аталарыдыла. Масих да чархына кёре аладанды. Ол а ёмюрледе да алгъышлы, барыны да башында болгъан Аллахды. Амин.

⁶ Алай а бу, Аллахны сёзю толмагъанды демек тюйюлдю. Нек десегиз Израильден болгъанланы бары тюйюлдю Израильли.

⁷ Ибрахимни урлугъундан болгъанланы да, бары тюйюлдю Ибрахимни сабийлери; алай а: «Сени урлугъунг Исхакъ бла бардырыллыкъды», – деп айтылгъанды.

⁸ Алай демеклик Аллахны сабийлери чархдан жаратылгъан сабийле тюйюлдюле, алай а ант сёз бла берилген сабийле Ибрахимни урлугъуна саналадыла.

⁹ Ант бла берилген сёз а былайды: «Келлик жыл тамам бу заманда келликме эмда Сараны уланы боллукъду».

¹⁰ Эмда жангыз ол тюйюлдю; алай а Рабийгъатны къарынына да атабыз Исхакъдан эки улан бир кезиуге тюшген заманда алай болгъанды.

¹¹ Нек десегиз ала туугъунчу эм не ахшы, не аман этгинчи, Аллах аланы бирин сайлагъанда Аны мураты адамланы этген ишлерине кёре тюйюл, алай а Кесини чакъырыууна кёре болур ючюн,

¹² Рабийгъатха: «Таматасы кичисине къул боллукъду», – деп айтылгъанды,

¹³ Китапда: «Мен Якъупну сюйгенме, Эсауну уа кёрюп болмагъанма», – деп жазылгъаны кибик.

¹⁴ Сора не айтайыкъ? Аллахда тюзсюзлюкмю барды? Чыртда угъай!

¹⁵ Нек десегиз Ол Мусагъа: «Мархамат этеригиме мархамат этерме, жазыкъсынырыгъыма жазыкъсынырма», – деп айтады.

¹⁶ Алай бла сайланыу адамны сюйгенинден неда кюрешгенинден тюйюлдю, мархамат этиучю Аллахданды.

¹⁷ Ол себепден Китап фыргъаууннга: «Сени юсюнгде къудуретими кёргюзтюр ючюн эм битеу жерни юсюнде Мени атым билдирилир ючюн салгъанма Мен сени», – деп айтады.

¹⁸ Алай бла Аллах мархамат этерге сюйгенине мархамат этеди, терсакъыл этерге сюйгенин а терсакъыл этеди.

¹⁹ Сен а манга: «Сора дагъыда не ючюн терслейди? Нек десенг Аны буйругъуна ким къажау туралыр?» – деп айтырса.

²⁰ Адам, сен а кимсе, Аллах бла даулашырча? Ишленнген зат аны ишлегеннге: «Сен мени былай нек этдинг?» – деп айтырмы?

²¹ Къошун ишлеучю, бир балчыкъдан окъуна бир сауутну энчи жюрютюуге, башхасын а сансыз жюрютюуге этерге топурагъына эркин тюйюлмюдю?

²² Сора Аллах, чамланыууна тюберик, жоюлургъа хазырланнган сауутлагъа уллу тёзюмлюк бла чыдагъан эсе, не айтайыкъ?

²³ Ол, махтаулу болургъа алгъындан хазырлап, алагъа мархамат этерик адамларына Кесини махтаууну байлыгъын билдирир ючюн алай этген эсе, не айтайыкъ?

²⁴ Биз да Аллах жангыз иудейлиледен тюйюл, алай а башха миллетледен да чакъыргъан ол адамлабыз,

²⁵ Хошея файгъамбарны китабында да: «Мени халкъым болмагъаннга, „Мени халкъым“ деп, сюйюлюнмегеннге да „сюйюлюннген“ деп атарма»

²⁶ Эм: «Алагъа: „Сиз Мени халкъым тюйюлсюз“ деп айтылгъан жерде, „жашау бериучю Аллахны Уланлары“ деп аталлыкъдыла», – деп айтылгъаны кибик.

²⁷ Иешая уа Израильни юсюнден: «Израиль улуланы саны тенгизни юзмези чакълы окъуна болсада, жангыз да артда къалгъан бек азы къутхарыллыкъды.

²⁸ Нек десегиз Раббий сюд ишин къысха заманда тюзлюк бла этип бошарыкъды, жер башында кесгин иш этерикди», – деп ачыкъ айтады,

²⁹ Дагъыда Иешая: «Неге да кючю жетген Раббий бизге туудукъла къалдырмаса эди, биз Содомча болур эдик эм Гоморагъа ушар эдик», – деп алгъындан билдиргени кибик.

Израильни ийнанмаулугъу

³⁰ Сора не айтайыкъ? Тюзлюклюлюкню излемеген миллетле тюзлюклюлюкге, иймандан келген тюзлюклюлюкге жетгендиле.

³¹ Тюзлюклюлюк бериучю закон излеген Израиль а, бу законнга жетмегенди.

³² Не ючюн? Ийман бла тюйюл, Тауратны Законуну буюргъанларын этиу бла ариуланыргъа кюрешгендиле.

³³ Нек десегиз Китапда: «Ма, Сионда чырмау къая эмда абындырыучу таш салама; Анга ийнаннган ким болсада айыплы боллукъ тюйюлдю», – деп жазылгъаны кибик, ала абындырыучу ташха абыннгандыла.