Римлилеге 11 - Сыйлы Инжил бла Забур

Аллах Кесине сайлагъан адамла

¹ Алай бла сорама: Аллах Кесини халкъын атыпмы къойгъанды? Чыртда угъай! Нек десегиз мен да Израильлиме, Ибрахимни урлугъунданма, Беняминни тукъумунданма.

² Аллах Кесини алгъындан билген халкъын атмагъанды. Неда Сыйлы Китапда Илиясны юсюнден не айтылгъанын ол Израильден Аллахха къалай тарыгъып:

³ «Раббий! Сени файгъамбарларынгы ёлтюргендиле, Санга къурман этилиучю жерлени бузгъандыла; жангыз мен къалгъанма, мени жанымы да алыргъа излейдиле», – деп айтханын билмеймисиз?

⁴ Аллах а жууабында анга не айтады? «Баалны аллында тобукъланмагъан жети минг адамны Мен Кесиме сакълагъанма», – дейди.

⁵ Аны кибик эндиги заманда да, Аллахны шафауаты бла сайланнган гитче жамауат барды.

⁶ Шафауат бла болгъан эсе уа, сора сууап ишледен тюйюлдю, алайсыз шафауат энди шафауат болмаз эди.

⁷ Сора не? Израиль нени излеген эсе да, анга жетмегенди; сайланнганла уа жетгендиле, къалгъанлары уа терсакъыл болгъандыла.

⁸ Китапда жазылгъаны кибик: «Аллах бюгюннге дери окъуна алагъа жукълатыу халны, кёрмеген кёзлени эм эшитмеген къулакъланы бергенди».

⁹ Дауут да: «Аланы ашлары алагъа тузакъ, къапхан болсун, уругъа жыгъылып, азапларына тюшсюнле!

¹⁰ Аланы кёзлери кёрмез кибик къарангы болсун. Аркъаларын да ёмюрлюкге гуппур эт!» – деп айтханды.

Жалгъаннган бутакъла

¹¹ Алай бла сорама: ала тайып къалырчамы абынып тыйылгъандыла? Чыртда угъай! Алай а алада эришиулюк чыгъарыр ючюн, аланы этген терсликлеринден, башха миллетлеге къутхарылыу берилгенди.

¹² Сора аланы терсликлери дуниягъа байлыкъ келтирген эсе, аланы жарлы болуулары да башха миллетлеге байлыкъ келтирген эсе, тамамлыкълары уа андан да уллу байлыкъ келтирликди!

¹³ Сизге, башха миллетлилеге айтама: миллетлени абустолуча, къуллукъ этиуюмю мен махтаулу этеме.

¹⁴ Алай бла кеси миллетлилеримде эришиулюк чыгъарып, аладан бир къауумларын къутхарыргъа болурма деп умут этеме.

¹⁵ Нек десегиз аланы къоюлуулары дуниягъа Аллах бла жарашыулукъ келтирген эсе, къабыл этилликлери уа ёлюмден жашаугъа кёчюу тюйюл эсе, неди?

¹⁶ Тылыны башламы сыйлы эсе, саулай да сыйлыды; эм терекни тамыры сыйлы эсе, бутакълары да сыйлыдыла.

¹⁷ Бутакъладан бир бёлеги сыннган эселе уа, сен а, кийик зейтун терек, аланы жерлерине жалгъанып, зейтун терекни тамырына бла суууна ала бла бирча къошулгъан эсенг,

¹⁸ Сора бутакъланы алларында асыры бек махтанма; махтана эсенг а, тамырны сен тутмай, алай а тамыр сени тутханын эсинге тюшюр.

¹⁹ Сен а: «Мен жалгъаныр ючюн сыннгандыла бутакъла», – деп айтырса.

²⁰ Тюздю. Ала иймансызлыкъдан сыннгандыла, сен а ийманынг бла тураса: ёхтем болма, алай а къоркъ.

²¹ Нек десенг Аллах терекни кеси бутакъларын аяп къоймагъан эсе, сора сакъ бол, сени аяп къоярмы?

²² Алай бла Аллахны ахшылыгъын эм къатылыгъын кёресе. Ол тайып къалгъанлагъа къатыды; санга уа, Аны ахшылыгъында турсанг, ахшылыкълыды; турмасанг а, сен да кесилип тюшериксе.

²³ Алай а ала да ийнанмауда турмасала, жангыдан жерлерине жалгъанырыкъдыла; нек десегиз аланы дагъыда жалгъаргъа Аллахны кючю барды.

²⁴ Ол себепден сен, табийгъатда кийик зейтун терекден кесилип, сени табийгъат халингде болмагъан иги зейтун терекге жалгъаннган эсенг, сора бегирек да ол керти бутакъла кеслерини зейтун тереклерине жалгъанырла!

Битеу Израиль къутхарыллыкъды

²⁵ Къарындашла, сиз кесигизни уллудан кёрмез ючюн, бу тасханы сизге билдирмей къояргъа сюймейме: Израильни терсакъыл болгъаны жангыз бир заманнга дери, башха миллетлиледен къутхарыллыкъланы саны толгъунчугъа дериди.

²⁶ Алай бла битеу Израиль къутхарыллыкъды, Китапда: «Къутхарыучу Сиондан келликди эмда Якъупдан аллахсызлыкъны кетерликди.

²⁷ Аланы гюняхларын къурутхан заманымда Мени ала бла этерик кесаматым буду», – деп жазылгъаны кибик.

²⁸ Хайыр Хапарны бериу жанындан, сизни ючюн ала жауладыла; сайланыуну жанындан а, аталарыны хурметинден Аллах сюйгенледиле.

²⁹ Нек десегиз Аллахны саугъалары бла чакъырыуу ызына алынмайдыла.

³⁰ Сиз да бир заманлада Аллахха бойсунмай эдигиз, энди уа аланы бойсунмаулары бла Ол сизге мархамат этгенди.

³¹ Муну кибик, Ол, сизге мархамат этгенича, алагъа да мархамат этер ючюн, ала да энди бойсунмаучу болгъандыла.

³² Нек десегиз Аллах, барысына да мархамат этер ючюн, барысын да бойсунмаугъа жесир этгенди.

Аллахха шукурла

³³ Эй, Аллахны байлыгъы, терен акъыллылыгъы эм билими къалай чексиз уллуду! Аны къадарлары акъылгъа сыйынмазча, Аны жоллары да тинтип билмезча къалай сейирликдиле!

³⁴ «Раббийни акъылын ким билгенди? Неда Анга ёзюр ким болгъанды?»

³⁵ «Неда алгъындан Анга ким зат бергенди, Ол къайтарып берирге борчлу болур кибик?»

³⁶ Нек десегиз хар неда Анданды, Аны юсю блады эмда Аны ючюндю. Ёмюрледе да махтау Анга болсун. Амин.