Маттай 8 - Сыйлы Инжил бла Забур

Исса келепен ауруулу адамны сау этеди

¹ Исса таудан тюшген заманда уа, Аны ызындан кёп халкъ бара эди.

² Анда келепен ауруулу бир адам келип, Анга баш уруп: «Раббий! Сюйсенг, мени тазаларгъа болаллыкъса», – деди.

³ Исса, къолун узатып, анга тийип: «Сюеме, тазалан!» – деди. Сора олсагъат ол келепенинден тазаланды.

⁴ Исса анга: «Сакъ бол, бир кишиге да айтма; алай а барып, дин къуллукъчулагъа кёрюнюп, адамлагъа шагъатлыкъгъа, Муса буйрукъ этген къурманны элт», – деди.

Римли аскерчини ийнаныуу

⁵ Исса Кафарнахумгъа кирген заманда уа, бир жюзбашчы, Аны къатына келип, Андан:

⁶ «Раббий! Мени жумушчум, санлары къурушуп, юйде жатады эм бек термиледи», – деп тиледи.

⁷ Исса анга: «Мен келип, аны сау этерме», – деди.

⁸ Жюзбашчы уа жууап эте: «Раббий! Сен мени мекямыма кирирге мен тийишли тюйюлме; алай а жаланда сёз айт, сора мени жумушчум сау болур.

⁹ Мен кесим да бой салып тургъан адамма, алай болгъанлыкъгъа манга бойсуннган аскерчилерим барды. Бирине: „Бар“ дейме, барады; башхасына да: „Кел“ дейме, келеди; къулума да: „Муну эт“ дейме, этеди», – деди.

¹⁰ Муну эшитгенде, Исса, сейирсинип, ызындан баргъанлагъа: «Кертисин айтама сизге, Израильде да тапмагъанма Мен быллай ийманны.

¹¹ Кёпле, кюн чыкъгъандан эм кюн батхандан келип, Ибрахим бла, Исхакъ бла эм Якъуп бла Кёклени Патчахлыгъында олтурушурукъдула.

¹² Патчахлыкъны уланлары уа тышхы къарангыгъа атыллыкъдыла. Анда жиляу бла тишлени къыжылдатыу боллукъду деп айтама сизге», – деди.

¹³ Сора Исса жюзбашчыгъа: «Бар, сени ийнаннганынгча болсун санга», – деди. Сора аны жумушчусу олсагъат сау болду.

Исса кёп ауругъанланы сау этеди

¹⁴ Петерни юйюне келип, Исса, Петерни къайын анасы къызыу ауруп жатханын кёрдю.

¹⁵ Исса ол тиширыуну къолуна тийгенлей, аны аурууу кетип къалды; сора тиширыу, туруп, алагъа шапалыкъ этди.

¹⁶ Ингир болгъанда уа, Иссагъа кёп жинлилени келтирдиле. Ол, жинлени сёзю бла къыстады, битеу ауругъанланы да сау этди.

¹⁷ Бу, Иешая файгъамбарны юсю бла: «Ол бизни къарыусузлукъларыбызны Кесини юсюне алды, аурууларыбызны да кётюрдю», – деп айтылгъан сёз къабыл болур ючюн болду.

Иссаны ызындан барыуну багъасы

¹⁸ Исса, Кесини тёгерегинде кёп халкъны кёрюп, сохталарына ары жанына жюзерге буйрукъ берди.

¹⁹ Ол заманда бир дин алим, келип, Анга: «Устаз! Сен къайры барсанг да, мен Сени ызынгдан барлыкъма», – деди.

²⁰ Анга Исса: «Тюлкюлени тешиклери, кёкдеги къанатлыланы да уялары барды; Адам Улуну уа, башын салыр жери да жокъду», – деди.

²¹ Аны сохталарындан бири уа Анга: «Раббий! Алгъа барып атамы асыраргъа манга эркинлик бер», – деди.

²² Исса уа анга: «Мени ызымдан кел, ёлгенлеге кеслерини ёлюлерин асыраргъа къой», – деди.

Исса желни тохтатады

²³ Исса къайыкъгъа миннгенде, Аны сохталары да Аны ызындан тебиредиле.

²⁴ Сора ма, кёлде уллу жел болду, алай бла къайыкъны толкъунла баса эдиле; Исса уа жукълай эди.

²⁵ Ол заманда Аны сохталары къатына келип, Аны уятып: «Раббий! Къутхар бизни! Жоюлабыз!» – дедиле.

²⁶ Исса алагъа: «Сиз былай къоркъакъ нексиз, ийнаныулары азла?» – деди. Андан сора туруп желни да, кёлню да тыйды, сора терен шошлукъ болду.

²⁷ Адамла уа, сейирсинип: «Бу кимди да, Анга жел да, кёл да бойсуннган?» – дей эдиле.

Жинли эки адамны сау этилиую

²⁸ Сора Исса кёлню ары жанына Гадара къыралгъа келгенде, къабыр дорбунладан чыкъгъан эки жинли адам Аны аллына тюбедиле. Ала бек къутургъанла эдиле, ол себепден ол жол бла ётерге бир киши да базынмай эди.

²⁹ Сора ала: «Аллахны Уланы Исса, Сени бизни бла не ишинг барды? Сен бизге замандан алгъа азап берирге келгенсе бери!» – деп къычырдыла.

³⁰ Аладан арлакъда уа уллу тонгуз сюрюу отлай эди.

³¹ Жинле Иссадан: «Бизни къыстарыкъ эсенг, бизге тонгуз сюрюуге кирирге эркинлик бер», – деп тилей эдиле.

³² Ол алагъа: «Барыгъыз!» – деди; ала, чыгъып, тонгуз сюрюуге кирдиле. Сора битеу тонгуз сюрюу тикден кёлге атылып, суугъа батып жоюлду.

³³ Сюрюучюле уа, чабып кетип, шахаргъа келип, барын да, жинлилеге болгъанны да айтдыла.

³⁴ Сора битеу шахар Иссаны аллына тюберге чыкъды; Аны кёрюп, Ол аланы тийрелеринден кетерин тиледиле.