Маттай 5 - Сыйлы Инжил бла Забур

Керти насыплылыкъ

¹ Исса, халкъны кёрюп, таугъа ёрледи; Ол олтургъан заманда, Аны сохталары Аны къатына келдиле.

² Ол, сёзюн башлап, аланы былай айтып юйрете эди:

³ «Нюрден жарлыла насыплыдыла; нек десегиз Кёклени Патчахлыгъы аланыды.

⁴ Жилягъанла насыплыдыла; нек десегиз ала жапсарыллыкъдыла.

⁵ Жууашла насыплыдыла; нек десегиз ала жерни иелери боллукъдула.

⁶ Тюзлюкге жутлукъ этип термилгенле насыплыдыла; нек десегиз ала тоярыкъдыла.

⁷ Мархаматлыла насыплыдыла; нек десегиз алагъа мархамат этилирикди.

⁸ Таза жюреклиле насыплыдыла; нек десегиз ала Аллахны кёрлюкдюле.

⁹ Жарашыулукъ этиучюле насыплыдыла, нек десегиз алагъа Аллахны уланлары деп аталлыкъды.

¹⁰ Тюзлюк ючюн зулмулукъ кёргенле насыплыдыла; нек десегиз Кёклени Патчахлыгъы аланыды.

¹¹ Мени ючюн сизни сёкселе эм сизге зулму этселе эм хар тюрлю тюзлюксюз аман айтсала, сиз насыплысыз.

¹² Сюйюнюгюз эмда къууанч этигиз; кёкледе сизни аллыкъ саугъагъыз уллуду. Сизден алгъын болгъан файгъамбарлагъа да алай зулму этгендиле».

Туз бла жарыкъ

¹³ «Сиз – жерни тузусуз. Тузну кючю кетсе уа, сора аны не бла тузлу этериксе? Ол энди тышына атылып адамланы аякъ тюплеринде малтаннгандан башха бир затха да жарамайды.

¹⁴ Сиз – дунияны жарыгъысыз. Тау башындагъы шахар кёрюнмей туралмаз.

¹⁵ Чыракъны жандырып, аны юй сауутну тюбюне салмайдыла, алай а чырахтаннга саладыла, андан ол юйдегилени барына да жарытады.

¹⁶ Сизни жарыгъыгъыз да адамланы алларында, ала сизни ахшы ишлеригизни кёрюп, сизни Кёкдеги Атагъызгъа махтау салырча, алай жарытсын».

Таурат Закон

¹⁷ «Мен Тауратны неда файгъамбарланы хукмуларын бузаргъа келген сунмагъыз; Мен бузаргъа келмегенме, алай а толтурургъа келгенме.

¹⁸ Нек десегиз кертисин айтама сизге: кёк бла жер жокъ болгъунчу, бары да толгъунчу, Тауратдан бир тамгъачыкъ неда бир сызлыкъ жокъ болмаз.

¹⁹ Алай бла, бу эм гитче фарызладан бирин кеси бузуп, адамланы алай ким юйретсе, ол Кёклени Патчахлыгъында эм гитчеге саналыр; аланы кеси толтуруп ким юйретсе уа, ол Кёклени Патчахлыгъында уллугъа саналыр.

²⁰ Мен сизге айтама, сизни тюзлюклюлюгюгюз дин алимлени бла фарисейлени тюзлюклюлюклеринден озмаса, сиз Кёклени Патчахлыгъына кирлик тюйюлсюз».

Ачыуланыу бла адам ёлтюрюу

²¹ «Буруннгулагъа: „Ёлтюрме; ёлтюрген адамгъа уа, сюд этилирге тийишлиди“ деп айтылгъанны сиз эшитгенсиз.

²² Мен а сизге: кесини къарындашына керексиз ачыуланнган хар адамгъа, сюд этилирге тийишлиди деп айтама; кесини къарындашына: „Ракъа“, деген адам а синедрионнга тийишлиди; „Акъылсыз“ деген адам а жаханим отуна тийишлиди.

²³ Алай бла, сен къурманынгы къурман этилиучю жерге келтирип, сени къарындашынгы бир зат ючюн санга ыразы болмагъанын анда эсинге тюшюрсенг,

²⁴ Къурманынгы анда, къурман этилиучю жерни аллында къой да, барып, алгъа къарындашынг бла жараш, сора ол заманда кел да къурманынгы келтир.

²⁵ Даучунг бла, сен алыкъа аны бла жолда болгъан заманда теркирек жараш; алайсыз даучунг сени сюдюге берир, сюдю уа сени къалауургъа берир, сен тюрмеге атылырса.

²⁶ Кертисин айтама санга: ахыргъы кодрантынгы бергинчи, сен андан чыгъарыкъ тюйюлсе».

Зийна бла къатынын къоюу

²⁷ «Буруннгулагъа: „Зийна этме“ деп айтылгъанны сиз эшитгенсиз.

²⁸ Мен а сизге: тиширыугъа сукъланып къарагъан хар адам, кесини жюрегинде аны бла зийна этгенди деп айтама.

²⁹ Сени онг кёзюнг сени гюняхха тюшюре эсе уа, аны тартып ал да кесингден кери ат; нек десенг сени битеу чархынг жаханимге атылгъандан эсе, сени санларынгдан бири жоюлгъаны игиди санга.

³⁰ Сени онг къолунг сени гюняхха тюшюре эсе, аны, уруп тюшюр да, кесингден кери ат; нек десенг сени битеу чархынг жаханимге атылгъандан эсе, сени санларынгдан бири жоюлгъаны игиди санга.

³¹ Дагъыда „Кесини къатынындан айырыллыкъ адам, анга айырылгъан къагъыт берсин“ деп айтылгъанды.

³² Мен а сизге айтама: зийна этген терсликден башха сылтау бла кесини къатынындан ким айырылса да, ол къатынына зийна этерге сылтау береди; айырылгъан къатынны алгъан адам да зийна этеди».

Ант этиу

³³ «Дагъыда буруннгулагъа: „Антларынгы бузма, алай а Раббийге этген антларынгы толтур“ деп айтылгъанны сиз эшитгенсиз.

³⁴ Мен а сизге айтама: чыртда ант этме, не кёк бла, нек десенг ол Аллахны тахтасыды;

³⁵ Не жер бла, нек десенг ол Аны аякъ тюбюдю; не Иерусалим бла, нек десенг ол уллу Патчахны шахарыды;

³⁶ Не башынг бла ант этме, нек десенг бир чач тюгюнгю да акъ неда къара эталлыкъ тюйюлсе.

³⁷ Алай а сизни сёзюгюз: „Хау, хау“, „Угъай, угъай“ болсун; андан артыгъы уа хыйлачыданды».

Кёз ючюн – кёз, тиш ючюн – тиш

³⁸ «Сиз: „Кёз ючюн – кёз, тиш ючюн – тиш“ деп айтылгъанны эшитгенсиз.

³⁹ Мен а сизге айтама: огъурсузгъа къажау турма. Алай а сени онг жаягъынга ким урса да, анга экинчисин да бур.

⁴⁰ Биреу сени бла сюдге кирип, кёлегинги алыргъа излесе, анга тыш кийиминги да бер.

⁴¹ Санга биреу кеси бла бир чакъырым барыргъа зорлукъ этсе, аны бла экиге бар.

⁴² Сенден тилегеннге бер, сенден ёнгкюч алыргъа излегенден артха турма».

Душманларыгъызны сюйюгюз

⁴³ «Сиз: „Жууугъунгу сюй, душманынгы кёрюп болма“ деп айтылгъанны эшитгенсиз.

⁴⁴ Мен а сизге айтама: душманларыгъызны сюйюгюз, сизге къаргъыш этгенлеге алгъыш этигиз, сизни кёрюп болмагъанлагъа ахшылыкъ этигиз, сизни жюреклеригизни къыйнагъанла ючюн, сизге зулму этгенле ючюн тилек этигиз.

⁴⁵ Алай этсегиз, сиз Кёкдеги Атагъызны уланлары болурсуз; нек десегиз Ол Кесини кюнюне, огъурсузлагъа да, огъурлулагъа да жарытыргъа буюрады, тюзлюклюлеге да тюзлюксюзлеге да жауун береди.

⁴⁶ Ол себепден, сиз жаланда сизни сюйгенлени сюерик эсегиз, сизге не саугъа? Жасакъ жыйыучула да алай этмеймидиле?

⁴⁷ Сиз жаланда къарындашларыгъыз бла саламлаша эсегиз, махтарча не зат этесиз? Мажюсюле да алай этмеймидиле?

⁴⁸ Алай бла, сизни Кёкдеги Атагъыз тамамча, тамам болугъуз».