Маттай 4 - Сыйлы Инжил бла Забур

Исса сыналады

¹ Андан сора Сыйлы Нюр, ибилисге сынатыр ючюн, Иссаны къум тюзге элтди.

² Анда Исса, къыркъ кюн бла къыркъ кече ораза тутхандан сора, ахырында ач болду.

³ Сора терилтиучю, Анга жууукълашып: «Сен Аллахны Уланы эсенг, бу ташлагъа ётмекле болургъа буюр», – деди.

⁴ Исса уа анга жууапха: «„Адам жаланда ётмек бла жашарыкъ тюйюлдю, алай а Аллахны ауузундан чыкъгъан хар сёз бла жашарыкъды“ деп жазылгъанды», – деди.

⁵ Андан сора ибилис, Аны сыйлы шахаргъа алып, Аны табыныучу юйню башыны къыйырына сюеп,

⁶ Анга: «Сен Аллахны Уланы эсенг, энишге секир; нек десенг: „Аллах Сени Кесини мёлеклерине аманат этерикди“, „Ала Сени къолларында элтирикдиле, аягъынг ташха да абынмаз“ деп жазылгъанды», – деди.

⁷ Исса анга: «Аны кибик: „Раббий Аллахынгы сынама“ деп да жазылгъанды», – деди.

⁸ Дагъыда ибилис Аны бек бийик таугъа алды, Анга битеу дунияны патчахлыкъларын бла аланы аламатлыкъларын кёргюзтюп,

⁹ Анга: «Сен, аууп, манга сежда этсенг, быланы барын да Санга берирме», – деди.

¹⁰ Ол заманда Исса анга: «Мени къатымдан кет, шайтан! Китапда: „Раббий Аллахынга сеждагъа бар эмда жангыз Анга къуллукъ эт“ деп жазылгъанды», – деди.

¹¹ Андан сора ибилис Иссаны къойду; сора мёлекле келип, Иссагъа къуллукъ эте эдиле.

Исса Хайыр Хапарны билдирип башлайды

¹² Ахияны тутулгъанын эшитгенинде уа, Исса Галилеягъа кетди.

¹³ Сора, Назаретни къоюп, Забулонну бла Нафталини жерлеринде кёл боюнундагъы Кафарнахум шахаргъа келип жерлешди.

¹⁴ Бу, Иешая файгъамбарны юсю бла айтылгъан бу сёз къабыл болур ючюн болду:

¹⁵ «Забулонну жери, Нафталини жери, тенгиз боюнуну жолунда, Иорданны ары жанындагъы мажюсю Галилея!

¹⁶ Къарангыда олтургъан халкъ уллу жарыкъ кёрдю, ёлюм ауана басып тургъан къыралда олтургъанлагъа да жарыкъ жарыды».

¹⁷ Ол замандан башлап, Исса ууаз берип: «Тобагъа къайтышыгъыз, Кёклени Патчахлыгъы жууукълашханды», – деп айтып башлады.

Исса биринчи сохталарын сайлайды

¹⁸ Галилея кёлню къаты бла бара туруп, Исса эки къарындашны, Петер аталгъан Шимонну эм аны къарындашы Эндрейни, чабакъ ауну кёлге ата тургъанлай кёрдю; нек десегиз ала чабакъчыла эдиле.

¹⁹ Исса алагъа: «Мени ызымдан келигиз, Мен сизни адамланы тутуучула этерме», – деди.

²⁰ Ала олсагъат, чабакъ ауларын къоюп, Аны ызындан тебиредиле.

²¹ Андан ары бара, Ол башха эки къарындашны, Зебедейни жашы Якъупну эм аны къарындашы Ахияны, аталары Зебедей бла къайыкъда чабакъ ауларын жамай тургъанлай кёрюп, аланы да чакъырды.

²² Ала да олсагъат къайыкъны да аталарын да къоюп, Аны ызындан тебиредиле.

Исса ауругъанланы сау этеди

²³ Сора Исса, битеу Галилеяда, аланы синагогаларында юйрете, Кёклени Патчахлыгъыны юсюнден Хайыр Хапарны билдире эм халкъны арасында хар тюрлю аурууну эм хар тюрлю къарыусузлукъну сау эте айланды.

²⁴ Аны юсюнден хапар битеу Сириягъа жайылды; Анга битеу къарыусузланы, тюрлю ауруулары эм тутхан ауруулары болгъанланы, жинлилени, аймёлеклени эм санлары къурушханланы келтире эдиле, Ол аланы сау эте эди.

²⁵ Галилеядан, Оншахардан, Иерусалимден, Иудеядан эм Иорданны ары жанындан бек кёп халкъ Аны ызындан жюрюй эдиле.