Маттай 24 - Сыйлы Инжил бла Забур

Ахыр заманны илишанлары

¹ Сора Исса табыныучу юйден чыгъып, кетип бара эди. Ол юйню мекямларын Анга кёргюзтюр ючюн, сохталары Аны къатына келдиле.

² Исса уа алагъа: «Кёремисиз быланы барын да? Кертисин айтама сизге: мында таш юсюнде таш да къаллыкъ тюйюлдю; бары да чачыллыкъды», – деди.

³ Ол, Зейтун тауда олтургъан заманда уа, сохтала кеслери жангыз, Аны къатына келип: «Бу ишле къачан боллукъдула? Эмда Сени келлигинги бла бу ёмюрню ахырыны не илишаны боллукъду? Аны бизге айт», – деп сордула.

⁴ Исса алагъа жууапха: «Сакъ болугъуз, сизни бир киши да жангылтмасын.

⁵ Нек десегиз кёпле Мени атым бла: „Масих Менме“ деп келликдиле эмда кёплени жангылтырыкъдыла.

⁶ Аны кибик къазауат тауушланы эм уруш хапарланы эшитирсиз. Къарагъыз, къоркъмагъыз; нек десегиз была бары да болургъа керекди. Алай а ол алыкъа дунияны ахыры тюйюлдю.

⁷ Нек десегиз миллет миллетге, патчахлыкъ патчахлыкъгъа къажау къазауат этерикди; ачлыкъла, ёлетле эм жер-жерледе жер тебиуле боллукъдула;

⁸ Была уа бары да аурууланы башланнганыды.

⁹ Ол заманда сизни азапха берликдиле, сизни ёлтюрлюкдюле; эмда Мени атым ючюн сизни битеу миллетле кёрюп боллукъ тюйюлдюле.

¹⁰ Ол заманда кёпле иймандан таярыкъдыла, бир-бирлерин сатарыкъдыла эм бирбирлерин кёрюп боллукъ тюйюлдюле.

¹¹ Кёп жалгъан файгъамбарла чыгъарыкъдыла, кёплени жангылтырыкъдыла.

¹² Законсузлукъланы кёбейгенини себебинден, кёпледе сюймеклик сууурукъду.

¹³ Ахырына дери тёзген а къутхарыллыкъды.

¹⁴ Эмда Аллахны Патчахлыгъыны бу Хайыр Хапары битеу дунияда, битеу миллетлеге шагъатлыкъгъа билдирилликди; сора ол заманда ахыры келликди.

¹⁵ Алай бла, Даниял файгъамбар айтханча, халеклик келтириучю жийиргенчли зат сыйлы жерде тургъанын кёрген заманыгъызда – окъугъан ангыласын –

¹⁶ Ол заманда Иудеяда болгъанла таулагъа къачсынла.

¹⁷ Юй башында болгъан адам да, юйюнден бир зат алыргъа энишге тюшмесин.

¹⁸ Аулакъда болгъан адам да, кийимлерин алыргъа артха айланмасын.

¹⁹ Ол кюнледе бууаз къатынлагъа бла эмчек ичиргенлеге уа къыйынлыкъ боллукъду.

²⁰ Къачхынчылыгъыгъыз къышхыда, неда шабат кюн болмаз ючюн, тилек этигиз.

²¹ Нек десегиз ол заманда, дуния жаратылгъандан эндиге дери да болмагъан эмда болмазлыкъ, аллай палах боллукъду.

²² Ол кюнле аз этилмеселе эди, бир адам да къутулмаз эди; алай а сайланнганла ючюн ол кюнле аз этилликдиле.

²³ Ол заманда биреу сизге: „Ма, Масих мындады“ неда „Андады“ десе, ийнанмагъыз.

²⁴ Нек десегиз жалгъан масихле эм жалгъан файгъамбарла чыгъарыкъдыла; амал болса, сайланнганланы окъуна жангылтыр ючюн уллу илишанла бла сейирликле кёргюзтюрюкдюле.

²⁵ Ма, Мен сизге алгъындан айтдым.

²⁶ Алай бла, сизге: „Ма, Ол къум тюздеди“ деселе, чыкъмагъыз; „Ма, Ол таша отоуладады“ деселе, ийнанмагъыз.

²⁷ Нек десегиз шыбыла кюн чыкъгъан жанында чыгъып, кюн батхан жанына дери окъуна кёрюннгени кибик, Адам Улуну келиую да алай боллукъду.

²⁸ Нек десегиз мыллык болгъан жерге къушла жыйылырла.

²⁹ Эмда билмей тургъанлай, ол палахлы кюнледен сора кюн мутхуз боллукъду, ай да кесини жарыгъын берлик тюйюлдю, жулдузла да кёкден къуюллукъдула, кёкдеги къудуретле да къозгъалырыкъдыла.

³⁰ Ол заманда кёкде Адам Улуну илишаны кёрюнюрюкдю; ол заманда битеу жерни халкълары жилярыкъдыла, Адам Улуну, уллу къудурети бла эм аламатлыгъы бла кёк булутланы юсюнде келгенин кёрлюкдюле.

³¹ Ол Кесини мёлеклерин уллу ауазлы сур быргъы бла иерикди, ала Аны сайлагъанларын дунияны тёрт жанындан, кёклени бир къыйырындан бирси къыйырына дери жыярыкъдыла.

³² Инжир терекден юлгю алыгъыз: аны бутакълары жумушап, чапыракъ ийгенде, жай жууукъ болгъанын билесиз,

³³ Ол халда, сиз быланы барын да кёрген заманыгъызда, Адам Улу энди жууукълашханын, эшик къатында болгъанын билигиз.

³⁴ Кертисин айтама сизге, бу тукъум озгъунчу бу затла бары да боллукъдула.

³⁵ Кёк бла жер жокъ болсала да, Мени сёзлерим а къаллыкъдыла».

Билинмеген кюн бла сагъат

³⁶ «Ол кюнню бла сагъатны уа бир киши да билмейди, не кёкдеги мёлекле, не Улан, жаланда жангыз Мени Атам биледи.

³⁷ Алай а Нухну заманында къалай болгъан эсе да, Адам Улуну келгенинде да алай боллукъду.

³⁸ Суу къыяманы аллында кюнледе, Нух кемеге миннген кюннге дери, адамла ашап, ичип, къатын алып, эрге барып

³⁹ Эмда суу къыяма келип, барын да къыргъынчы, акъылларына келтирмегенлери кибик, Адам Улуну келгени да алай боллукъду.

⁴⁰ Ол заманда экеулен аулакъда боллукъдула: бири алынырыкъды, экинчиси уа къалдырыллыкъды.

⁴¹ Эки тиширыу тирмен тарта боллукъдула: бири алынырыкъды, экинчиси уа къалдырыллыкъды.

⁴² Алай бла сагъайып туругъуз, нек десегиз Раббийигиз къайсы сагъатда келлигин билмейсиз.

⁴³ Алай а сиз муну билесиз: юйню иеси, гудучуну не заманда келлигин билсе эди, жукъламай сакъ болур эди эм юйюн тонаргъа къоймаз эди.

⁴⁴ Ол себепден сиз да хазыр болуп туругъуз, нек десегиз Адам Улу, сиз ойламагъан сагъатда келир.

⁴⁵ Аны бийи, кесини жумушчуларына тамата этип алагъа заманында аш берирге салгъан ышаннгылы эм акъыллы къул ким эсе?

⁴⁶ Аны бийи, келип, аны алай эте тургъанлай тапса, ол къул насыплыды.

⁴⁷ Кертисин айтама сизге, бийи аны битеу мюлкюне тамата этерикди.

⁴⁸ Ол къул а, огъурсуз болгъаны себепли, кесини жюрегинде: „Бийим терк келмез“ деп,

⁴⁹ Кесини нёгерлерин тюйюп, ичгичиле бла ашап, ичип башласа,

⁵⁰ Ол къулну бийи, ол сакъламагъан кюнде, ол ойламагъан сагъатда келир,

⁵¹ Аны тюйюп ырмах этер, сора аны эки бетлиле бла бир болумгъа салыр. Анда уа жиляу бла тишлени къыжылдатыу болур».