Маттай 21 - Сыйлы Инжил бла Забур

Иссаны Иерусалимге кириую

¹ Сора ала, Иерусалимге жууукълашып, Бейтпагейге, Зейтун таууна жетгенлей, Исса сохталарындан экисин ийип,

² Алагъа: «Бу аллыгъыздагъы элге барыгъыз; сора олсагъат, тагъылып тургъан эшекни гылыуу бла табарсыз; тешип Манга келтиригиз.

³ Сизге биреу бир зат айтса уа, „Ала Раббийге керекдиле“ деп жууап этигиз; ол аланы олсагъат берип иер», – деди.

⁴ Бу бары да файгъамбарны юсю бла:

⁵ «Сионну къызына: „Ма, сени Патчахынг, эшекге, жегилген эшекни гылыууна минип, санга жууашлыкъ бла келеди“ дегиз», – деп айтылгъан сёз толур ючюн болду.

⁶ Сохтала барып, Исса алагъа айтханча этдиле.

⁷ Эшекни гылыуу бла келтирип, аланы юслерине кеслерини кийимлерин салдыла, Исса да гылыугъа минди.

⁸ Кёп халкъ кеслерини кийимлерин жолгъа жая эдиле, башхала уа терекледен бутакъла кесип алып, жолгъа жая эдиле;

⁹ Аллында бла ызындан баргъан халкъ а: «Хозана Дауут Улуна! Раббийни аты бла Келген алгъышлыды! Эм Бийикдегине хозана!» – деп къычыра эдиле.

¹⁰ Исса Иерусалимге кирген заманда, битеу шахар къозгъалып: «Бу кимди?» – дей эдиле.

¹¹ Халкъ а: «Бу, Галилеяны Назарет шахарындан болгъан Исса файгъамбарды», – дей эди.

Исса сатыу-алыу этгенлени табыныучу юйден къыстайды

¹² Сора Исса, Аллахны сыйлы юйюне келгенлей, анда сатыу-алыу этгенлени барысын да къыстады, ахча алышындырыучуланы столларын да, кёгюрчюн сатханланы шиндиклерин да аудурду.

¹³ Сора алагъа: «„Мени юйюме тилек юй деп аталлыкъды“ деп жазылгъанды; сиз а аны тонаучуланы уясы этгенсиз», – деди.

¹⁴ Ол заманда табыныучу юйде Аны къатына сокъурла, акъсакъла келдиле, Ол да аланы сау этди.

¹⁵ Дин къуллукъчула бла дин алимле уа, Ол этген къудуретли ишлени эмда табыныучу юйде сабийлени: «Дауут Улуна хозана!» – деп къычыргъанларын кёрюп, ачыуландыла

¹⁶ Эмда Анга: «Аланы не айтханларын эшитемисе?» – дедиле. Исса уа алагъа: «Хау! Сиз бир заманда да: „Къоюндагъыланы, эмчек ичген сабийлени ауузларындан Сен Кесинги махтатдынг“ дегенни окъумагъанмысыз?» – деди.

¹⁷ Сора аланы къоюп, шахардан чыгъып, Бейтхиниге кетди эм кечени анда ашырды.

Къуруп къалгъан инжир терек

¹⁸ Эрттенликде уа, шахаргъа къайтып келе туруп, ач болду.

¹⁹ Жол жанында бир инжир терек кёрюп, аны къатына келди; жаланда чапыракъладан башха анда бир зат да тапмагъанында, анга: «Мындан ары ёмюрде да сенден кёгет болмасын!» – деди. Сора инжир терек олсагъат къуруп къалды.

²⁰ Муну кёргенде, сохтала сейирсинип: «Инжир терек олсагъатдан къалай къуруду?» – дей эдиле.

²¹ Исса уа алагъа жууапха: «Кертисин айтама сизге: ийнаныуугъуз бар эсе эмда ишекленмей эсегиз, инжир терекге этилгенни этген бла да къалмай, алай а бу таугъа да: „Кётюрюл да тенгизге атыл!“ десегиз, ол да болур.

²² Тилегигизде ийнанып, не тилесегиз да, аллыкъсыз», – деди.

Иссаны эркинлиги

²³ Сора Ол табыныучу юйге келип юйретген заманда, баш дин къуллукъчула бла халкъны таматалары Аны къатына келип: «Сен быланы кимни эркинлиги бла этесе? Быллай эркинликни Санга ким бергенди?», – дедиле.

²⁴ Исса алагъа жууапха: «Мен да сизге бир зат сорайым; аны Манга айтсагъыз, сора Мен да быланы кимни эркинлиги бла этгеними айтырма сизге.

²⁵ Ахияны сууда кёмюлдюрюую къайдан эди: кёкденми, огъесе адамладанмы?» – деди. Ала уа кеси араларында: «„Кёкден“ десек, Ол бизге: „Сора анга нек ийнанмагъан эдигиз?“ дер.

²⁶ „Адамладан“ деп айтыргъа уа, – халкъдан къоркъабыз, Ахияны ала бары да файгъамбаргъа санайдыла», – деп ойлаша эдиле.

²⁷ Сора Иссагъа жууапха: «Билмейбиз», – дедиле. Ол да алагъа: «Мен да бу ишлени кимни эркинлиги бла этгеними айтырыкъ тюйюлме сизге».

Эки жашны юсюнден таурух

²⁸ «Сизни кёлюгюзге къалай келеди? Бир адамны эки жашы болгъанды; ол, биринчисини къатына барып: „Жашым! Бар, бюгюн мени жюзюм бахчамда ишле“ дегенди.

²⁹ Ол а жууапха: „Бармам“ дегенди; артда уа сокъуранып, баргъанды.

³⁰ Сора экинчисини къатына барып, ол анга да алай айтханды. Бу анга жууапха: „Барайым, бийим“ дегенди; баргъан а этмегенди.

³¹ Аланы экисинден аталарыны буйругъун къайсы толтургъанды?» – деди. Анга: «Биринчи», – дедиле. Исса алагъа: «Кертисин айтама сизге, Аллахны Патчахлыгъына жасакъ жыйыучула бла саякъ тиширыула сизден эсе алгъа барадыла.

³² Нек десегиз Ахия сизге тюзлюклюлюк жол бла келгенде, сиз анга ийнанмагъансыз, жасакъ жыйыучула бла саякъ тиширыула уа анга ийнаннгандыла; сиз а, муну кёргенде да, артда сокъуранып анга ийнанмагъансыз!»

Жюзюмчюлени юсюнден таурух

³³ «Оюм берген башха таурухха да тынгылагъыз. Жер иеси бир адам болгъанды; ол жюзюм бахча орнатып, тёгерегине буруу этгенди, аны ичинде жюзюм эзиучю орун къазгъанды, къала ишлегенди, сора аны жюзюмчюлеге жалгъа берип, узакъгъа кетгенди.

³⁴ Кёгетлени заманы жетгенде уа, ол, кёгетлерин алыргъа жюзюмчюлеге кесини къулларын ийгенди.

³⁵ Жюзюмчюле, аны къулларын тутуп, кимин тюйгендиле, кимин ёлтюргендиле, кимин а ташла бла тюйюп ёлтюргендиле.

³⁶ Ол дагъыда алгъыннгыладан да кёп, башха къулларын ийгенди. Алагъа да алай этгендиле.

³⁷ Ахырында ол: „Уланымдан уялырла“ деп, алагъа кесини уланын ийгенди.

³⁸ Алай а жюзюмчюле уланын кёрюп, бир-бирлерине: „Бу, мюлкге ие боллукъду; барып, аны ёлтюрейик да аны мюлкюне ие болайыкъ“ дегендиле.

³⁹ Аны тутхандыла да, жюзюм бахчадан тышына чыгъарып, ёлтюргендиле.

⁴⁰ Алай бла, жюзюм бахчаны иеси келгенде, бу жюзюмчюлеге не этер?» – деди.

⁴¹ Ала Анга: «Ол аманлыкъчыланы аман ёлтюртюр, жюзюм бахчасын а, ала анга заманында кёгетлерин берип турлукъ башха жюзюмчюлеге берир», – дедиле.

⁴² Исса алагъа: «„Юй ишлеучюле къабыл этмей къойгъан таш, ма ол мюйюшню баш ташы болгъанды. Ол – Раббийденди, бизни кёзюбюзге сейир кёрюнеди“ деп Китапда жазылгъанны сиз бир заманда да окъумагъанмысыз?

⁴³ Ол себепден сизге айтама, Аллахны Патчахлыгъы сизден сыйырыллыкъды да аны битимин берлик халкъгъа берилликди;

⁴⁴ Ол ташха ким жыгъылса да, ууалыр; ол таш кимни юсюне ауса да, аны эзер», – деди.

⁴⁵ Аны оюм берген таурухларын эшитип, баш дин къуллукъчула бла фарисейле, Ол аланы юслеринден айтханын ангыладыла.

⁴⁶ Сора Аны тутаргъа сылтау излей эдиле; алай а халкъдан къоркъуп къойдула; нек десегиз халкъ Аны файгъамбаргъа санай эди.