Маттай 17 - Сыйлы Инжил бла Забур

Иссаны кёрюнюую тюрленеди

¹ Сора, алты кюн ётгенлей, Исса Петерни, Якъупну эм аны къарындашы Ахияны алып кетип, жангыз аланы бийик таугъа чыгъарды.

² Ол анда аланы алларында тюрленди. Аны бети кюн кибик жарытды, Аны кийимлери уа чиммакъ акъ болдула.

³ Алайына алагъа Муса бла Илияс кёрюнюп, Исса бла сёлеше эдиле.

⁴ Ол заманда Петер Иссагъа: «Раббий! Бизге мында турургъа игиди; сюе эсенг, мында юч чатыр этейик: Санга бирин, Мусагъа бирин, Илиясха да бирин», – деп айтды.

⁵ Ол муну айта тургъан заманда, ма аланы жарыкъ булут жапды, сора булутдан бир ауаз: «Бу – Мени ыразылыгъым Анда болгъан, Мени Сюйюлюннген Уланымды; Анга тынгылагъыз», – деди.

⁶ Муну эшитгенде сохтала беттёбен аудула эм бек къоркъдула.

⁷ Исса уа, къатларына келип, алагъа тийип: «Туругъуз, къоркъмагъыз», – деди.

⁸ Кёзлерин кётюргенде уа, ала жангыз Иссадан башха бир кишини да кёрмедиле.

⁹ Сора ала таудан тюшгенде, Исса алагъа: «Адам Улу ёлюп тиргизилгинчиге дери, бу кёргенигизни бир кишиге да айтмагъыз», – деп буюрду.

¹⁰ Сора Аны сохталары Анга: «Алгъа Илияс келирге керекди деп, дин алимле нек айтадыла да?» – деп сордула.

¹¹ Исса алагъа жууапха: «Илияс алгъа келип, барын да жарашдырлыгъы кертиди;

¹² Мен а сизге айтама: Илияс да келгенди, алай а аны танымагъандыла, анга да сюйгенлерича этгендиле; Адам Улу да аладан алай азап кёрлюкдю», – деди.

¹³ Ол заманда сохталары Ол алагъа сууда Кёмюлдюрюучю Ахияны юсюнден айтханын ангыладыла.

Эпилептик жаш сау этиледи

¹⁴ Ала халкъгъа келген заманда, бир адам Иссаны къатына келип, Аны аллында тобукълана,

¹⁵ Анга: «Раббий! Мени жашыма жазыкъсын! Аны жангы ай сайын жин тутуп, бек къыйнайды, кёп кере отха да, кёп кере суугъа да секиртеди.

¹⁶ Мен аны Сени сохталарынга келтирген эдим, ала уа аны сау эталмадыла», – деди.

¹⁷ Исса уа жууап эте: «Эй иймансыз, бузукъ тукъум! Сизни бла къачаннга дери турлукъма? Сизге къачаннга дери тёзерикме? Жашны Манга бери келтиригиз!» – деди.

¹⁸ Келтиргенлей, Исса жиннге чыгъаргъа буюрду. Сора жин жашдан чыкъды, жаш да олсагъат сау болуп къалды.

¹⁹ Ол заманда сохталары, Иссаны къатына жангыз кеслери келип: «Жинни къыстаргъа биз нек болалмагъан эдик?» – дедиле.

²⁰ Исса алагъа: «Ийнаныуугъуз аз болгъаны себепли; нек десегиз кертисин айтама сизге: сизни, татыран бюртюк тенгли бир ийнаныуугъуз болуп, сиз бу таугъа: „Былайдан ары кёч“ десегиз, ол кёчер; эм сиз этерге болалмазлыкъ зат болмаз;

²¹ Бу тукъум жин а жаланда ораза тутуп тилек этиу бла къысталады», – деди.

Исса ёлюп тиргизиллигин дагъыда билдиреди

²² Ала Галилеяда болгъан заманда, Исса алагъа: «Адам Улу адамланы къолларына берилликди.

²³ Аны ёлтюрлюкдюле, Ол а ючюнчю кюн тиргизилликди», – деди. Сохтала бек мудах болдула.

Табыныучу юйге берилген жасакъ

²⁴ Ала Кафарнахумгъа келгенде уа, дидрахма жыйыучула Петерни къатына келип: «Сизни Устазыгъыз дидрахма бермезми?» – дедиле.

²⁵ Петер: «Берир», – деди. Ол юйге киргенде, Исса андан алгъа анга: «Сен къалай акъыл этесе, Шимон? Жерни патчахлары хакъны неда жасакъны кимден аладыла? Кеслерини уланларынданмы, огъесе башхаладанмы?» – деди.

²⁶ Петер Анга: «Башхаладан», – деди. Исса анга: «Алай бла кеси уланлары азатдыла;

²⁷ Алай а биз аланы чамландырмаз ючюн, кёлге барып, ыргъакъ ат эмда алгъа тюшген чабакъны ал; сора, аны ауузун ачып, статир табарса; аны алып, Мени ючюн да, кесинг ючюн да алагъа бер», – деди.