Маттай 16 - Сыйлы Инжил бла Забур

Кёкден илишан изленеди

¹ Сора фарисейле бла садукейле, Иссагъа келип, Аны сынай, алагъа кёкден илишан кёргюзтюрюн тиледиле.

² Ол а алагъа жууапха: «Сиз ингирде: „Кёк къызаргъаннга кёре, кюн чууакъ боллукъду“ дейсиз.

³ Эрттенликде да: „Кёк къаралдым-къызгъыл болгъаннга кёре, бюгюн жауунлу боллукъду“ дейсиз. Эки бетлиле! Кёкню бетин айырып таный билесиз, заманланы илишанларын а билалмаймысыз?

⁴ Бузукъ эм зийначы тукъум илишан излейди, алай а Жюнюс файгъамбарны илишанындан башха, анга илишан бериллик тюйюлдю», – деди. Сора аланы къоюп кетди.

Фарисейлени бла садукейлени ачытхычлары

⁵ Ары жанына ётгенде, Аны сохталары ётмекле алыргъа унутхан эдиле.

⁶ Исса алагъа: «Къарагъыз, фарисейлени бла садукейлени ачытхычларындан кесигизни сакълагъыз!» – деди.

⁷ Ала уа, ичлеринден ойлашып: «Муну ётмек алмагъаныбыз ючюн айтады», – дей эдиле.

⁸ Аны билип, Исса алагъа: «Ётмек алмагъанбыз деп, ичигизден нек ойлашасыз, ийнаныулары азла?

⁹ Энтда да ангыламаймысыз, беш минг адамгъа берилген беш ётмекни эм сиз ненча четен жыйгъаныгъызны да унутупму къойгъансыз?

¹⁰ Тёрт минг адамгъа берилген жети ётмекни эм ненча четен жыйгъаныгъызны да унутханмысыз?

¹¹ Фарисейлени бла садукейлени ачытхычларындан кесигизни сакълагъыз деп, Мен сизге ётмеклени юсюнден айтмагъанымы къалай ангыламайсыз?» – деди.

¹² Ол заманда ала, Ол алагъа ётмек ачытхычдан тюйюл, фарисейлени бла садукейлени окъууларындан кеслерин сакъласынла деп айтханын ангыладыла.

Петер Масихни таныйды

¹³ Филипни Кесариясы тийресине келгенде уа, Исса Кесини сохталарына: «Мени, Адам Улун, адамла кимге санайдыла?» – деп сорду.

¹⁴ Ала: «Бир къауумла сууда Кёмюлдюрюучю Ахиягъа, башхала Илиясха, дагъыда башхала уа Иеремиягъа, неда файгъамбарладан бирине», – дедиле.

¹⁵ Ол алагъа: «Сиз а кимге санайсыз Мени?» – деди.

¹⁶ Шимон Петер, жууап эте: «Сен – жашау бериучю Аллахны Уланы Масихсе», – деди.

¹⁷ Сора Исса анга жууапха: «Жюнюс улу Шимон, сен насыплыса; нек десенг муну санга ачхан адамла тюйюл, Мени кёкледеги Атамды.

¹⁸ Мен да санга айтама: сен Петерсе эм бу ташны юсюнде Мен жамауатымы къурарыкъма; ахыратны къабакълары аны хорларыкъ тюйюлдюле.

¹⁹ Эмда Кёклени Патчахлыгъыны ачхычларын санга берликме; сен жерде не байласанг, ол кёкледе да байланырыкъды; эм жерде нени эркин этсенг, ол кёкледе да эркин этилликди», – деди.

²⁰ Ол заманда Исса сохталарына Кесини Масих болгъанын бир кишиге да айтмазгъа буюрду.

Исса ёлюп тиргизиллигин эрттеден билдиреди

²¹ Ол замандан башлап Исса сохталарына Кесини Иерусалимге барыргъа, анда таматаладан, баш дин къуллукъчуладан, дин алимледен кёп азап кёрюрге, ёлтюрюлюрге эм ючюнчю кюн тиргизилирге керекли болгъанын ачып башлады.

²² Сора Аны бир жанына чакъырып, Петер Анга: «Аллах сакъласын, Раббий! Бу иш Санга болмасын!» – деп сёз салып башлады.

²³ Ол а айланып Петерге: «Мени къатымдан кет, шайтан! Сен Мени терилтирге кюрешесе; нек десенг сен Аллах жанындан тюйюл, адам жанындан ойлайса», – деди.

²⁴ Андан сора Исса сохталарына: «Мени ызымдан келирге сюйген адам, кесин унутсун да, кесини къачын алып, Мени ызымдан келсин.

²⁵ Нек десегиз кесини жанын сакъларгъа сюйген адам, аны жояр; Мени ючюн жанын жойгъан адам а, аны табар.

²⁶ Адам битеу дунияны алса да, кесини жанына уа заран салса, анга не файда? Неда адам кесини жанын не берип жулалыр?

²⁷ Нек десегиз Адам Улу Кесини Атасыны аламатлыгъы бла, Кесини мёлеклери бла келликди; ол заманда хар кимге, ишлерине кёре, тийишлисин берликди.

²⁸ Кертисин айтама сизге: былайда тургъанладан бир къауумла ёлюм сынагъынчы, Адам Улуну Кесини Патчахлыгъында келгенин кёрлюкдюле», – деди.