Маттай 15 - Сыйлы Инжил бла Забур

Адамны харам этиучю неди?

¹ Ол заманда Иерусалимден дин алимле бла фарисейле, Иссагъа келип:

² «Сени сохталарынг буруннгуланы адетлерин нек бузадыла? Ала аш ашардан алгъа къолларын жуумайдыла», – дедиле.

³ Ол а алагъа жууапха: «Адетигиз ючюн сиз да Аллахны фарызын нек бузасыз?

⁴ Нек десегиз Аллах: „Атанга бла ананга хурмет эт“ эм „Атасына неда анасына аман айтхан ёлтюрюлюрге керекди“ деп фарыз этгенди.

⁵ Сиз а: „Атасына неда анасына: ,сен менден хайырланырыкъ зат, Аллахха къурманды‘ деп айтхан адам,

⁶ Атасына неда анасына къарамазгъа да боллукъду“ дейсиз; алай бла сиз Аллахны фарызын кесигизни адетигиз бла кетергенсиз.

⁷ Эки бетлиле! Сизни юсюгюзден Иешая файгъамбар тюз айтханды:

⁸ „Бу халкъ Манга ауузу бла жууукълашады, Манга тили бла хурмет этеди, аланы жюреклери уа Менден узакъды.

⁹ Манга бошуна табынадыла; ала юйретген затла жаланда адамланы фарызларыдыла“ деп айтханды», – деди.

¹⁰ Сора, халкъны чакъырып, алагъа: «Тынгылагъыз эмда ангылагъыз:

¹¹ Адамны харам этген, ауузуна кирген зат тюйюлдю; алай а, ауузундан чыкъгъан харам этеди адамны», – деди.

¹² Ол заманда Аны къатына сохталары келип, Анга: «Бу сёзню эшитип, фарисейлени кёллери чыкъгъанын билемисе?» – дедиле.

¹³ Ол а жууапха: «Мени Кёкдеги Атам орнатмагъан хар ёсюмлюк, тамыры бла къоратыллыкъды;

¹⁴ Къоюгъуз аланы, ала – сокъурланы жюрютюучю сокъурладыла; сокъур сокъурну элте эсе уа, сора экиси да уругъа жыгъыллыкъдыла», – деди.

¹⁵ Петер а, жууап эте, Анга: «Бу оюм берген таурухну бизге айтып ангылат», – деди.

¹⁶ Исса: «Сиз энтда ангыламаймысыз?

¹⁷ Энтдамы тюшюнмейсиз, битеу ауузгъа кирген къарыннга баргъанын эм андан аякъ жолгъа чыкъгъанын?

¹⁸ Аууздан чыкъгъан а – жюрекден чыгъады; адамны харам ол этеди.

¹⁹ Нек десегиз аман ниетле, адам ёлтюрюуле, зийна этиуле, тос туруула, урлаула, жалгъан шагъатлыкъла, аман айтыула жюрекден чыгъадыла.

²⁰ Адамны харам бу затла этедиле; къолларын жуумай ашагъан а – адамны харам этмейди», – деди.

Кенанлы тиширыуну ийнаныуу

²¹ Сора Исса андан чыгъып, Тир бла Сидон жанларына кетди.

²² Анда бир Кенанлы тиширыу, ол жерледен чыгъып, Анга: «Дауут Улу, Раббий! Манга жазыкъсын! Мени къызымы жин къаты азапландырады», – деп къычыра эди.

²³ Исса уа анга бир сёз да айтмады. Сора сохталары Аны къатына келип: «Ий аны, бизни ызыбыздан къычырып келеди», – деп Андан тиледиле.

²⁴ Ол а жууапха: «Мен жаланда Израильни юйюрюню жоюлгъан къойларына ийилгенме», – деди.

²⁵ Ол тиширыу, келип, Анга сежда эте: «Раббий! Болуш манга!» – деди.

²⁶ Ол а жууапха: «Ётмекни сабийледен алып, итлеге атхан иги тюйюлдю», – деди.

²⁷ Ол тиширыу: «Алайды, Раббий! Алай а итле да иелерини столларындан тюшген бурхуланы ашайдыла», – деди.

²⁸ Андан сора Исса анга жууапха: «Эй тиширыу! Сени ийманынг бек уллуду; сени тилегенингча санга болсун» – деди. Сора аны къызы олсагъат сау болуп къалды.

Исса беш минг адамны тойдурады

²⁹ Андан кетип, Исса Галилея кёлге келди эм, таугъа чыгъып, анда олтурду.

³⁰ Анда Аны къатына кёп халкъ келди; биргелерине акъсакъланы, сокъурланы, тилсизлени, къыяулуланы эм кёп башхаланы келтирип, аланы Иссаны аякъ жанына салдыла. Ол аланы сау этди;

³¹ Алай бла халкъ тилсизлени сёлешгенлерин, къыяулуланы сау болгъанларын, акъсакъланы жюрюгенлерин, сокъурланы да кёргенлерин кёрюп сейирсинди эм Израильни Аллахына махтау салды.

³² Исса уа, сохталарын чакъырып, алагъа: «Халкъгъа жаным ауруйду, ала энди юч кюнню Мени къатымда турадыла, ашаргъа затлары уа жокъду. Ашатмагъанлай иерге уа сюймейме; алайсыз ала жолда къарыусуз болуп къалырла», – деди.

³³ Аны сохталары Анга: «Бош жерде биз быллай бир халкъгъа тойдурурча аллай бир ётмек къайдан алайыкъ?» – дедиле.

³⁴ Исса алагъа: «Сизни ненча ётмегигиз барды?» – деди. Ала уа: «Жети эм бираз ууакъ чабакъ барды», – дедиле.

³⁵ Сора Исса халкъгъа жерге олтурургъа буюрду.

³⁶ Кеси жети ётмекни бла чабакъланы алып, шукур этип, сындырып, сохталарына берди, сохтала уа халкъгъа бердиле.

³⁷ Барысы да ашап тойдула, къалгъан кесекледен да жети толу четен жыйдыла.

³⁸ Ашагъанла уа, тиширыуланы бла сабийлени санамай, тёрт минг адам бола эдиле.

³⁹ Сора, халкъны ийгенлей, Исса, къайыкъгъа минип, Магдал тийрелерине келди.