Маттай 13 - Сыйлы Инжил бла Забур

Себилген урлукъну юсюнден таурух

¹ Ол кюн Исса, юйден чыгъып, кёл жагъасына барып олтурду.

² Анга кёп халкъ жыйылды, алай бла Ол къайыкъгъа минип олтурду, битеу халкъ а жагъада тохтады.

³ Ол алагъа оюм берген таурухла бла кёп затла айтды: «Ма, урлукъ себиучю себерге чыкъды.

⁴ Ол сепген заманда, бир бёлеги жол жанына тюшдю, къанатлыла, учуп келип, аны чёпледиле.

⁵ Бир бёлеги, анда топуракъ аз болгъан ташлы жерлеге тюшдю, жер терен болмагъаны себепли терк окъуна зыгыт этди.

⁶ Кюн чыкъгъан заманда уа, зыгытла мууал болдула да, терен тамырлары болмагъаны себепли, къурудула.

⁷ Бир бёлеги чыгъана ичине тюшдю, чыгъана ёсюп, зыгытланы басды.

⁸ Бир бёлеги ахшы топуракъгъа тюшюп, къайсысы жюз, къайсысы алтмыш, къайсысы отуз кере тирлик берди.

⁹ Эшитирге къулакълары болгъан адам эшитсин!» – деди.

¹⁰ Сохталары, келип, Анга: «Алагъа оюм берген таурухла бла нек айтаса?» – дедиле.

¹¹ Ол, алагъа жууапха: «Кёклени Патчахлыгъыны сырлары сизге ачылгъандыла, алагъа уа ачылмагъаны ючюн.

¹² Нек десегиз кимде бар эсе, анга берилир эм кёбейир; кимде жокъ эсе уа, андан неси бар эсе да сыйырылыр;

¹³ Ол себепден алагъа оюм берген таурухла бла айтама; ала, къарасала да, кёрмейдиле, тынгыласала да, эшитмейдиле, ангылагъан да этмейдиле;

¹⁴ Иешая файгъамбарны: „Хапарын эшитирсиз, ангылагъан а этмезсиз; кёзлеригиз бла къарарсыз, кёрлюг’а тюйюлсюз.

¹⁵ Нек десегиз бу халкъны жюреклери сезимсиз болгъанды, къулакълары бла да кючден эшитедиле, кёзлерин да къысхандыла; алайсыз кёзлери бла кёрюр эдиле, къулакълары бла да эшитир эдиле, жюреклери бла да ангылар эдиле эмда къайтышыр эдиле, Мен а аланы сау этер эдим“ деп алгъындан айтханы аланы юсюнде толады.

¹⁶ Сизни уа кёзлеригиз кёргенлери ючюн къулакъларыгъыз да эшитгенлери ючюн насыплысыз.

¹⁷ Нек десегиз кертисин айтама сизге, кёп файгъамбарла бла тюзлюклюле сиз кёргенлени кёрюрге сюйгендиле, кёрмегендиле, сиз эшитгенлени эшитирге да сюйгендиле, эшитмегендиле.

¹⁸ Сиз а урлукъ себиучюню юсюнден оюм берген таурухну магъанасына тынгылагъыз:

¹⁹ Кёклени Патчахлыгъыны юсюнден сёзге тынгылап, ангыламагъан хар адамгъа, хыйлачы келип, аны жюрегине себилгенни алып кетеди: жол жанына себилген ма аны кёргюзтеди.

²⁰ Ташлы жерлеге себилген а, сёзню эшитип, олсагъат аны къууанып къабыл этген,

²¹ Алай а кесинде тамыры болмагъан эм бир акъылда турмагъан, сёз амалтын къыйынлыкъ неда зулмулукъ келген заманда, олсагъат тайгъан адамны кёргюзтеди.

²² Чыгъана ичине себилген а, сёзню эшитген, алай а бу ёмюрню къайгъысы эм байлыкъгъа алданыулукъ сёзню кючлеп, ол сёз тирлик бермеген адамны кёргюзтеди.

²³ Ахшы жерге себилген да, сёзню эшитип, ангылагъанны, ол битимли болгъанны, алай бла бир бёлеги жюз, бир бёлеги алтмыш, бир бёлеги уа отуз кере тирлик бергенни кёргюзтеди», – деди.

Аман хансланы юсюнден таурух

²⁴ Ол алагъа дагъыда башха оюм берген таурухну айтды: «Кёклени Патчахлыгъы, кесини сабанына ахшы урлукъ сепген адамгъа ушайды;

²⁵ Адамла жукълагъан заманда уа, аны душманы, келип, будай арасында аман хансла себип кетди.

²⁶ Будай ёсюп баш къусхан заманда, аман хансла да кёрюндюле.

²⁷ Юйню иесини къуллары келип анга: „Жюйюсхан! Сен сабанынга ахшы урлукъ сепмегенми эдинг? Анда уа аман хансла къайдан чыкъгъандыла?“ дедиле.

²⁸ Ол а алагъа: „Душман адам этгенди аны“ деди. Къулла уа анга: „Сюе эсенг, биз барып, аланы тартып чыгъарайыкъ“ дедиле.

²⁹ Ол а: „Угъай, аман хансланы чыгъара туруп, сиз ала бла бирге будайны да жулкъургъа боллукъсуз.

³⁰ Оракъла заманнга дери экисин да бирге ёсмеге къоюгъуз, сора оракъланы заманында мен оракъчылагъа: ,Алгъа аман хансланы, отда кюйдюрюр ючюн жыйып кюлте этип байлагъыз; будайны уа кюфюме жыйыгъыз‘, дерме“ деп айтды».

Татыран бюртюкню бла ачытхычны юсюнден таурухла

³¹ Ол алагъа дагъыда башха оюм берген таурухну айтды: «Кёклени Патчахлыгъы, аны адам алып сабанына сепген татыран бюртюкге ушайды.

³² Ол битеу урлукъладан ууакъ болсада, алай а ёсген заманында, битеу бахча ёсюмлюклени озуп, терек болады, алай бла кёкдеги къанатлыла, учуп келип, аны бутакъларында бугъунадыла», – деди.

³³ Ол алагъа дагъыда оюм берген башха таурухну айтды: «Кёклени Патчахлыгъы, бир тиширыу алып битеу тылыны ачытыр ючюн, юч ёлче ун бла къатышдыргъан ачытхычха ушайды», – деди.

³⁴ Быланы барын да Исса халкъгъа оюм берген таурухла бла айта эди, таурухсуз алагъа айтмай эди.

³⁵ Бу, файгъамбарны юсю бла: «Оюм берген таурухла бла сёзюмю башларма; дуния жаратылгъандан жашырын тургъанны айтырма», – деп айтылгъан сёз толур ючюн болду.

Аман хансланы юсюнден таурухну магъанасы

³⁶ Ол заманда Исса, халкъны ийип, юйге кирди. Сора Аны сохталары, Аны къатына келип: «Сабандагъы аман хансланы юсюнден таурухну бизге айтып ангылат», – дедиле.

³⁷ Ол а алагъа жууапха: «Иги урлукъ себиучю – Адам Улуду.

³⁸ Сабан – дунияды. Иги урлукъ – Кёклени Патчахлыгъыны уланларыдыла, аман хансла уа – хыйлачыны уланларыдыла.

³⁹ Аланы сепген душман – ибилисди. Оракъла заман – бу ёмюрню ахырыды, оракъчыла уа – мёлекледиле.

⁴⁰ Ол себепден, аман хансланы жыйып, отда къалай кюйдюре эселе да, бу ёмюрню ахырында да алай боллукъду:

⁴¹ Адам Улу Кесини мёлеклерин иерикди, ала Аны Патчахлыгъындан битеу терилтиучюлени бла законсузлукъ этиучюлени жыярыкъдыла да,

⁴² Аланы от жаннган печьге атарыкъдыла. Анда жиляу бла тишлени къыжылдатыу боллукъду.

⁴³ Ол заманда тюзлюклюле кеслерини Аталарыны Патчахлыгъында кюн кибик жарып турурла. Эшитирге къулагъы болгъан эшитсин!»

Букъдурулгъан хазнаны бла инжи бюртюкню юсюнден таурухла

⁴⁴ «Кёклени Патчахлыгъы дагъыда, сабанда букъдурулгъан хазнагъа ушайды; аны уа бир адам табып жашырады, анга къууаннганындан барып, битеу болгъан затын сатып, ол сабанны сатып алады.

⁴⁵ Кёклени Патчахлыгъы дагъыда, иги инжи бюртюкле излеген саудюгерге ушайды.

⁴⁶ Ол, бир багъалы инжи бюртюкню табып, битеу болгъан затын сатып, аны сатып алды».

Чабакъ ауну юсюнден таурух

⁴⁷ «Кёклени Патчахлыгъы дагъыда, тенгизге атылгъан, кёп тюрлю чабакъ тутхан чабакъ аугъа ушайды.

⁴⁸ Ол толгъан заманда, аны жагъагъа чыгъардыла, сора, олтуруп, игисин сауутлагъа жыйдыла, аманын а тышына атдыла.

⁴⁹ Бу ёмюрню ахырында да алай боллукъду: мёлекле, келип, тюзлюклюлени арасындан огъурсузланы айырлыкъдыла да,

⁵⁰ Аланы от жаннган печьге атарыкъдыла. Анда жиляу эм тишлени къыжылдатыу боллукъду», – деди.

⁵¹ Сора Исса алагъа: «Ангыладыгъызмы сиз быланы барын да?» – деп сорду. Ала Анга: «Ангыладыкъ, Раббий!» – дедиле.

⁵² Ол а алагъа: «Ол себепли, Кёклени Патчахлыгъына юйреннген хар алим, кесини хазнасындан жангыны бла эскини чыгъаргъан мюлк иесине ушайды», – деди.

Халкъ Иссаны къабыл этмейди

⁵³ Сора Исса, бу оюм берген таурухланы бошагъанлай, андан кетди.

⁵⁴ Эмда Кесини ата журтуна келип, аланы синагогаларында халкъны юйретди, алай бла ала сейирсине эдиле: «Муну быллай акъылманлыгъы бла къудуретли ишлери къайданды?

⁵⁵ Ол агъач устаны жашы тюйюлмюдю? Аны анасыны аты Мариям тюйюлмюдю, Якъуп да, Юсюп да, Шимон да, Яхуда да Аны къарындашлары тюйюлмюдюле?

⁵⁶ Аны эгечлери бары да бизни арабызда тюйюлмюдюле? Бу затла бары да Анга къайдандыла?» – деп,

⁵⁷ Кёллери чыгъып, Анга ийнанмай эдиле. Исса уа алагъа: «Файгъамбар, кесини ата журтундан бла кесини юйюнден башха жерде сансыз этилмейди», – деди.

⁵⁸ Эмда аланы ийнанмагъанлары себепли анда къудуретли ишле кёп этмеди.