Маттай 12 - Сыйлы Инжил бла Забур

Шабат кюнню юсюнден соруу

¹ Ол заманда Исса шабат кюн будай сабанланы ичи бла озуп келе эди; Аны сохталары уа, ач болуп, будай башланы юзюп, ашап башлагъан эдиле.

² Фарисейле, муну кёрюп, Анга: «Къара, Сени сохталарынг шабат кюн этерге жарамагъанны этедиле!» – дедиле.

³ Ол а алагъа: «Дауут кеси да, аны биргесине болгъанла да ач болгъан заманда ол не этгенин сиз окъумагъанмысыз?

⁴ Ол, Аллахны юйюне кирип, жаланда дин къуллукъчулагъа болмаса, аланы не анга, не аны биргесине болгъанлагъа ашаргъа тийишли болмагъан, анда салыннган ётмеклени ашагъанды.

⁵ Неда шабат кюнледе дин къуллукъчула табыныучу юйде шабатны жоругъун бузсала да, терс болмагъанларын сиз Тауратда окъумагъанмысыз?

⁶ Алай а, табыныучу юйден уллу Ким эсе, мындагъы Олду, деп айтама сизге;

⁷ Сиз: „Къурманны тюйюл, мархамат этиуню сюеме“ дегенни магъанасы не болгъанын билсегиз эди, сора айыпсызланы айыпламаз эдигиз;

⁸ Нек десегиз Адам Улу шабат кюнню да бийиди», – деди.

⁹ Исса, андан кетип, аланы синагогаларына кирди.

¹⁰ Анда къолу къурушхан бир адам бар эди. Иссаны терслер ючюн, Анга: «Шабат кюн сау этерге боллукъмуду?» – деп сордула.

¹¹ Ол а алагъа: «Сизден биригизни бир къою болуп, ол а шабат кюн уругъа тюшсе, андан аны чыгъармазмы?

¹² Адам а къойдан къаллай бир багъалыды! Алай бла шабат кюнледе ахшылыкъ этерге боллукъду», – деди.

¹³ Сора ол адамгъа: «Къолунгу узат!» – деди. Ол да узатды, узатханлай, аны къолу бирси къолуча сау болуп къалды.

¹⁴ Фарисейле уа чыгъып, Иссаны къалай жояйыкъ деп Анга къажау кенгеш этдиле. Ол а муну билип андан кетди.

Аллахны сайлап алгъан Къулу

¹⁵ Аны ызындан кёп халкъ барды, Ол да аланы барысын да сау этди

¹⁶ Эм Ким болгъанын белгили этмезге алагъа къаты буюрду.

¹⁷ Бу, Иешая файгъамбарны юсю бла:

¹⁸ «Ма, Мени сайлап алгъан Къулум, Мени жаным ыразы болгъан Сюйюлюннгеним; Мен Анга Кеси Нюрюмю саллыкъма, Ол миллетлеге тюз хукму билдирликди;

¹⁹ Даулашырыкъ тюйюлдю, къычырыкъ этерик тюйюлдю, бир киши да орамлада Аны ауазын эшитирик тюйюлдю;

²⁰ Сына башлагъан къамишни сындырлыкъ тюйюлдю, тютюн этген кендирни ёчюлтюрюк тюйюлдю эм ахырында тюз хукмугъа хорлау тапдырлыкъды.

²¹ Миллетле Аны атына ышанырыкъдыла», – деп айтылгъан сёз къабыл болур ючюн болду.

Исса эмда беелзебул

²² Ол заманда Анга бир сокъур, тилсиз жинли кишини келтирдиле; Исса аны сау этди, алай бла сокъур, тилсиз адам сёлешген да, кёрген да этип башлады.

²³ Битеу халкъ сейирсинип: «Дауутну Уланы Масих Бу болурму?», – дей эди.

²⁴ Фарисейле уа, муну эшитип: «Ол жинлени къыстагъаны жаланда жинлени бийи беелзебулну кючю блады», – дедиле.

²⁵ Исса уа, аланы ойлашыуларын билип, алагъа: «Кеси-кесинде юлешиннген хар патчахлыкъ халек боллукъду, кеси-кесинде юлешиннген хар шахар неда юй чыдарыкъ тюйюлдю.

²⁶ Шайтан шайтанны къыстай эсе уа, ол кеси-кесинде юлешиннгенди; сора аны патчахлыгъы къалай чыдарыкъды?

²⁷ Мен жинлени беелзебулну кючю бла къыстай эсем, сизни адамларыгъыз кимни кючю бла къыстайдыла? Ол себепден ала сизге сюдюле боллукъдула.

²⁸ Мен жинлени Аллахны Нюрю бла къыстай эсем а, ишексиз сизге Аллахны Патчахлыгъы жетгенди.

²⁹ Неда биреу кючлю адамны юйюне кирип, аны хапчукларын тонаргъа къалай болалыр, алгъа кючлюню байламаса? Сора ол заманда аны юйюн тонар.

³⁰ Мени бла болмагъан, Манга къажауду; Мени бла жыймагъан, чачады.

³¹ Ол себепден сизге айтама: адамла этген хар гюнях да, аман айтыу да кечирилирле; Сыйлы Нюрге аман айтыу а кечириллик тюйюлдю;

³² Адам Улуна къажау сёз ким айтса да, анга кечилликди; Сыйлы Нюрге къажау ким айтса уа, анга не бу ёмюрде, не боллукъ ёмюрде кечиллик тюйюлдю.

³³ Неда терекни ахшыгъа, аны кёгетин да ахшыгъа санагъыз; неда терекни аманнга, аны кёгетин да аманнга санагъыз; нек десегиз терек кёгетинден танылады.

³⁴ Жилянны балалары! Огъурсуз болгъаныгъызлай, сиз огъурлуну айтыргъа къалай болалырсыз? Нек десегиз аууз жюрекдегин айтады.

³⁵ Огъурлу адам ичиндеги огъурлу хазнасындан огъурлулукъ чыгъарады; огъурсуз адам а ичиндеги огъурсуз хазнасындан огъурсузлукъ чыгъарады.

³⁶ Адамла бошуна айтхан хар бир сёзлери ючюн да хукму кюн жууап берликдиле деп айтама сизге.

³⁷ Нек десенг кесинги сёзлеринг бла ариуланырыкъса эм кесинги сёзлеринг бла терсленириксе», – деди.

Жюнюсню илишаны

³⁸ Ол заманда дин алимледен бла фарисейледен бир къаууму: «Устаз! Биз Сенден илишан кёрюрге сюе эдик», – дедиле.

³⁹ Ол а алагъа жууапха: «Бузукъ эм зийначы тукъум илишан излейди, алай а Жюнюс файгъамбарны илишанындан башха анга илишан бериллик тюйюлдю.

⁴⁰ Нек десегиз Жюнюс уллу чабакъны къарынында юч кюн бла юч кече тургъаны кибик, Адам Улу да жерни жюрегинде юч кюн бла юч кече турлукъду.

⁴¹ Нинебалыла хукму кюнде бу тукъум бла сюдге туруп, аны терслерикдиле, нек десегиз ала Жюнюсню ууазындан тобагъа къайтышхандыла. Мындагъы уа Жюнюсден уллуду.

⁴² Къыбыладагъы тиширыу патчах хукму кюнде бу тукъум бла сюдге туруп, аны терслерикди, нек десегиз ол, Сюлеменни акъылманлыгъына тынгыларгъа жерни этегинден келген эди. Мындагъы уа Сюлеменден уллуду.

⁴³ Харам нюр, адамдан чыкъгъанда, тынчлыкъ излей, суусуз жерледе айланады, алай а тапмайды;

⁴⁴ Сора: „Мен чыкъгъан юйюме къайтайым“ дейди. Къайтханлай аны сыйпалып, жасалып, бош тургъанлай табады.

⁴⁵ Сора барып, кесинден да огъурсуз башха жети харам нюрню биргесине алып келип, ары кирип анда жашайдыла; ол адамны артдагъы халы алгъыннгыдан да аман болады. Бу огъурсуз тукъумгъа да алай боллукъду», – деди.

Иссаны анасы бла къарындашлары

⁴⁶ Ол халкъгъа сёлеше тургъан заманда уа, Аны анасы бла къарындашлары, Аны бла сёлеширге излеп, юйден тышында тура эдиле.

⁴⁷ Сора биреу Анга: «Ма, Сени ананг да, Сени къарындашларынг да, Сени бла сёлеширге излеп, тышында турадыла», – деди.

⁴⁸ Ол а муну айтханнга жууапха: «Кимди Мени анам, кимдиле Мени къарындашларым?» – деди.

⁴⁹ Сора къолу бла Кесини сохталарын кёргюзтюп: «Ма, Мени анам, ма, Мени къарындашларым!

⁵⁰ Нек десегиз Мени Кёкдеги Атамы буйругъун ким толтурса, олду Манга къарындаш, эгеч, ана», – деди.