Маттай 10 - Сыйлы Инжил бла Забур

Исса онеки сохтасын халкъгъа иеди

¹ Сора Исса, онеки сохтасын чакъырып, алагъа харам нюрлени къыстаргъа, хар тюрлю аурууну бла хар къарыусузлукъну сау этерге эркинлик бергенди.

² Онеки абустолну уа атлары быладыла: биринчиси Петер аталгъан Шимон, аны къарындашы Эндрей, Зебедейни жашлары Якъуп бла Ахия,

³ Филип, Барталмай, Тома, жасакъ жыйыучу Маттай, Алфай улу Якъуп, Тадай аталгъан Лебей,

⁴ Къанай Шимон эм Иссаны сатхан Искариот Иуда.

⁵ Бу онекисин Исса ийип, алагъа фарыз этип: «Мажюсюлени жолуна бармагъыз, Самариялы шахаргъа да кирмегиз;

⁶ Алай а бегирек да Израильни юйюрюню жоюлгъан къойларына барыгъыз.

⁷ Кёклени Патчахлыгъы жууукълашханды деп ууаз берип жюрюгюз.

⁸ Ауругъанланы сау этигиз, келепенлени тазалагъыз, ёлгенлени тиргизигиз, жинлени къыстагъыз; хакъсыз алгъансыз, хакъсыз беригиз.

⁹ Биргегизге не алтын, не кюмюш, не белибауугъузгъа багъыр,

¹⁰ Жолгъа не артмакъ, не эки къат кийим, не аякъ кийим, не таякъ алмагъыз. Нек десегиз уруннган ашаргъа тийишлиди.

¹¹ Сиз къайсы шахаргъа неда къайсы элге кирсегиз да, анда ким тийишли болгъанын соруп билигиз да, кетгинчи, анда къалыгъыз.

¹² Юйге кире туруб’а, анга: „Бу юйге ырахатлыкъ!“ деп салам беригиз.

¹³ Ол юй тийишли болса, сизни тилеген ырахатлыгъыгъыз анга келсин; тийишли болмаса уа, сизни тилеген ырахатлыгъыгъыз кесигизге къайтсын.

¹⁴ Сизни къабыл этмеген эм сизни сёзлеригизге тынгыламагъан адамгъа уа, сора, ол юйден неда ол шахардан чыгъа туруп, аякъларыгъыздагъы букъуну къагъып тюшюрюгюз.

¹⁵ Кертисин айтама сизге: хукму кюн ол шахардан эсе Содомну бла Гомораны жерлерине тынчыракъ боллукъду».

Боллукъ термилиу

¹⁶ «Ма, Мен сизни, къойланы бёрюле ичине ийгенча, иеме: алай бла, жилянлача, акъыллы, кёгюрчюнлеча, хыйласыз болугъуз.

¹⁷ Адамладан а кесигизни сакълагъыз; нек десегиз ала сизни сюдлеге берликдиле, синагогаларында тюерикдиле.

¹⁸ Мени ючюн сизни оноучуланы бла патчахланы алларына элтирикдиле. Алай бла аланы эм миллетлени аллында шагъатлыкъ этериксиз.

¹⁹ Сизни тутуп берген заманларында уа, къалай неда не айтырбыз деп къайгъы этмегиз; нек десегиз не айтырыгъыгъыз сизге ол сагъатда берилликди.

²⁰ Ол себепден сиз айтырыкъ тюйюлсюз, алай а сизни Атагъызны Нюрю сизни ичигизде айтып турлукъду.

²¹ Къарындаш къарындашны, ата да сабийлерин ёлтюртюрге берликдиле; сабийле да, ата-аналарына къажау туруп, аланы ёлтюртюрюкдюле.

²² Мени атым ючюн сизни бары да кёрюп болмай къаллыкъдыла; ахырына дери тёзген а къутхарыллыкъды.

²³ Сизге бир шахарда зулму этген заманда, башхасына къачыгъыз. Нек десегиз кертисин айтама сизге: сиз Израильни битеу шахарларына айланып чыкъгъынчы, Адам Улу келликди.

²⁴ Сохта устаздан уллу тюйюлдю, къул да бийинден уллу тюйюлдю.

²⁵ Сохтагъа, устазыча болса, къулгъа да бийича болса, тамамды. Юйню иесине беелзебул атагъан эселе, аны юйюндегилеге уа не айтмазла!»

Кимден къоркъургъа керекбиз

²⁶ «Ол себепден аладан къоркъмагъыз; нек десегиз ачылмазлыкъ бир жашырын зат жокъду, билинмей къаллыкъ тасха да жокъду.

²⁷ Сизге къарангыда не айтханымы, жарыкъда айтыгъыз; къулагъыгъызгъа айтылып эшитгенигизни юй башладан билдиригиз.

²⁸ Чархны ёлтюрюучюледен, жанны уа ёлтюрюрге болалмагъанладан къоркъмагъыз; бегирег’а жанны да, чархны да жаханимде жояргъа болаллыкъ Аллахдан къоркъугъуз.

²⁹ Эки гитче къанатлы ассариягъа сатылмаймыдыла? Аладан бири да, сизни Атагъызны буйругъу болмай, жерге тюшерик тюйюлдю.

³⁰ Сизни уа башыгъызда битеу чач тюклеригиз да саналыпдыла.

³¹ Алай бла къоркъмагъыз: сиз кёп гитче къанатлыладан багъалысыз.

³² Манга ийнанып, адамланы аллында Мени ачыкъ къабыл этген ким болсада, Мен да аны Мени Кёкдеги Атамы аллында ачыкъ къабыл этерикме;

³³ Адамланы аллында Мени ким инкяр этсе да, аны уа Мен да Мени Кёкдеги Атамы аллында инкяр этерикме».

Иссагъа тийишли болуу

³⁴ «Мен жерге жарашыулукъ келтирирге келген сунмагъыз; Мен жарашыулукъ тюйюл, къылыч келтирирге келгенме.

³⁵ Нек десегиз Мен адамны атасындан, къызны да анасындан, келинни да къайын анасындан айырыргъа келгенме.

³⁶ Адамны душманлары кесини юйюндегилеридиле.

³⁷ Менден эсе, атасын неда анасын бек сюйген адам Манга тийишли тюйюлдю; Менден эсе, жашын неда къызын бек сюйген адам Манга тийишли тюйюлдю;

³⁸ Кесини къачын алып, мени ызымдан келмеген адам да Манга тийишли тюйюлдю.

³⁹ Кесини жанын сакълагъан аны жоярыкъды; Мени ючюн кесини жанын жойгъан а аны сакъларыкъды.

⁴⁰ Сизни къабыл этген адам, Мени къабыл этеди; Мени къабыл этген адам а, Мени Ийгенни къабыл этеди.

⁴¹ Файгъамбарны файгъамбарлыгъы ючюн къабыл этген адам файгъамбарны саугъасын аллыкъды; тюзлюклюню тюзлюклюлюгю ючюн къабыл этген адам да тюзлюклюню саугъасын аллыкъды.

⁴² Сохталыгъы ючюн бу гитчеледен бирине жаланда бир аякъ сууукъ суу ким ичирсе, кертисин айтама сизге, ол саугъасын алмай къалмаз», – деди.