Марк 9 - Сыйлы Инжил бла Забур

¹ Сора Исса алагъа: «Кертисин айтама сизге: былайда тургъанладан бир къауумла ёлюм сынагъынчы, Аллахны Патчахлыгъы кючю бла келгенин кёрлюкдюле», – деди.

Иссаны сыфаты тюрленеди

² Сора алты кюн озгъанлай, Исса Петерни, Якъупну, Ахияны алып кетип, жангыз аланы бийик таугъа чыгъарды, Ол анда аланы алларында тюрленди.

³ Аны кийимлери къар кибик, бек акъ, жер башында агъартыучу агъарталмагъан аллай жылтырагъан жарыкъ болдула.

⁴ Анда алагъа Илияс бла Муса кёрюнюп, Исса бла сёлеше эдиле.

⁵ Ол заманда Петер Иссагъа: «Устаз! Бизге мында турургъа игиди; юч чатыр этейик: Санга бирин, Мусагъа бирин, Илиясха да бирин», – деди.

⁶ Ол не айтыргъа да билмей эди, нек десегиз ала бек къоркъгъан эдиле.

⁷ Сора аланы булут келип жапды, булутну ичинден да: «Бу Мени сюйюлюннген Уланымды; Анга тынгылагъыз», – деп сёлешген ауаз чыкъды.

⁸ Ала билмей тургъанлай тёгереклерине къарагъанда, жангыз Иссадан башха, биргелерине бир киши да кёрмедиле.

⁹ Ала таудан энишге тюшгенде уа, Ол алагъа, кёргенлерин Адам Улу ёлгенледен тиргизилгинчи бир кишиге да айтмазгъа буйрукъ этди.

¹⁰ Ала бу сёзню эслеринде тутуп: «Ёлгенледен тиргизилирге деген неди», – деп, бир-бирлерине сора эдиле.

¹¹ Сора Анга: «Алгъа Илияс келирге керекди деп, дин алимле нек айтадыла да?» – деп сордула.

¹² Ол алагъа жууапха: «Илияс, алгъа келип, барын да жарашдырлыгъы кертиди; алай а Адам Улу кёп азап чегерикди эм сансыз этилликди деп нек жазылгъанды?

¹³ Алай а сизге айтама: Илияс да аны юсюнден жазылгъаныча келгенди, анга да сюйгенлерича этгендиле», – деди.

Жинли жаш сау этиледи

¹⁴ Къалгъан сохталарына къайтып, аланы къатларында кёп халкъны эм ала бла даулаша тургъан дин алимлени кёрдю.

¹⁵ Олсагъатдан, Иссаны кёрюп, битеу халкъ сейирсинди эм чабып аллына барып, Аны бла саламлашдыла.

¹⁶ Ол дин алимлеге: «Была бла нени юсюнден даулашасыз?» – деп сорду.

¹⁷ Халкъны ичинден биреулен жууапха: «Устаз! Мен Санга тилсиз нюр тутхан жашымы келтирген эдим.

¹⁸ Къайда тутса да, ол аны жерге аудурады, жашым аууз кёмюклерин иеди эм тишлерин къыжылдатып, къурушуп къалады; ол нюрню къыстагъыз деп, Сени сохталарынга айтхан эдим, ала уа болалмадыла», – деди.

¹⁹ Исса, анга жууап эте: «Эй иймансыз тукъум! Сизни бла къачаннга дери турлукъма? Сизге къачаннга дери тёзерикме? Жашны Манга келтиригиз», – деди.

²⁰ Сора жашны Анга келтирдиле. Олсагъатдан, Иссаны кёргенлей, жин жашны къалтыратды; жаш жерге аууп, аууз кёмюклерин ийип, аунап жатды.

²¹ Сора Исса жашны атасына: «Мынга не замандан бери былай болады?» – деп сорду. Ол а: «Сабийликден;

²² Кёп кере нюр, аны жояр ючюн, аны отха да, суугъа да атханды, алай а бир зат эталлыкъ эсенг, бизге жазыкъсынып, бизге болуш!» – деди.

²³ Исса анга: «Эталлыкъ эсенг дейсе; ийнаннганнга хар нени да этерге боллукъду», – деди.

²⁴ Сора олсагъат жашны атасы жиляп: «Ийнанама, Раббий! Ийнаныусузлугъуму хорларгъа манга болуш!» – деп къычырды.

²⁵ Исса, халкъны чабып басыннганын кёрюп, харам нюрню тыйып, анга: «Тилсиз эм сангырау нюр! Мен санга буйрукъ этеме, чыкъ бу жашдан эм мындан арысында анга кирме!» – деди.

²⁶ Нюр къычырыкъ этип эм жашны бек къалтыратып чыкъды; жаш да ёлгенча болду, алай бла кёпле: «Ёлгенди ол», – дей эдиле.

²⁷ Исса уа, къолундан тутуп, аны къобарды; жаш турду.

²⁸ Сора Исса юйге киргенде, Аны сохталары Анга кеслери жангыз: «Нюрню къыстаргъа биз нек болалмагъан эдик?» – деп сордула.

²⁹ Исса алагъа: «Бу тукъум нюр жаланда ораза тутуп тилек этиу бла къысталады», – деди.

Исса ёлюп тиргизиллигин дагъыда билдиреди

³⁰ Андан чыгъып, Галилеяны юсю бла ётдюле; Исса биреу да муну билирин сюймеди.

³¹ Нек десегиз Ол Кесини сохталарын юйретип, алагъа: «Адам Улу адамланы къолларына берилликди. Аны ёлтюрлюкдюле, Ол а ёлтюрюлгенден сора ючюнчю кюн тиргизилликди», – дей эди.

³² Алай а ала бу сёзлени ангыламадыла, Анга сорургъа уа къоркъдула.

Эм уллу кимди?

³³ Исса Кафарнахумгъа келди эм бир юйде болгъан заманында, алагъа: «Жолда келе туруп сиз кеси арагъызда нени юсюнден сёлеше эдигиз?» – деп сорду.

³⁴ Ала зат айтмадыла; нек десегиз жолда келе туруп кеси араларында, «Ким уллуду?» – деп сёлешген эдиле.

³⁵ Исса, олтуруп, онекисин чакъырып, алагъа: «Биринчи болургъа ким сюе эсе да, эм артдагъы болсун эм барына да жумушчу болсун», – деди.

³⁶ Сора бир сабийни алып, аны аланы араларында сюеп, аны къучакълап, алагъа:

³⁷ «Быллай сабийледен бирин Мени атым ючюн ким къабыл этсе, ол Мени къабыл этеди. Мени къабыл этген адам а, Мени тюйюл, алай а Мени Ийгенни къабыл этеди», – деди.

Бизге къажау болмагъан бизни жанлыды

³⁸ Ол заманда Ахия Анга: «Устаз! Сени атынг бла жинлени къыстагъан, бизни ызыбыздан а жюрюмеген бир адамны кёрдюк да, ол бизни ызыбыздан жюрюмегени себепли аны тыйдыкъ», – деди.

³⁹ Исса алагъа: «Тыймагъыз аны; нек десегиз бир киши да, Мени атым бла къудуретли иш этип, бираздан Манга аман айталлыкъ тюйюлдю.

⁴⁰ Нек десегиз сизге къажау болмагъан адам сизни жанлыды.

⁴¹ Эмда Мени атым ючюн, сиз Масихникилесиз деп, сизге бир аякъ суу ким ичирсе, кертисин айтама сизге, ол саугъасын алмай къалмаз».

Биреуню гюняхха тюшюргенни азабы

⁴² «Манга ийнаннган бу гитчеледен бирин гюняхха тюшюрген адамгъа уа, аны боюнуна тирмен ташны тагъып, аны тенгизге атсала, анга ол иги болур эди.

⁴³ Сора сени къолунг сени гюняхха тюшюре эсе, аны кесип ат: эки къолунг бла жаханимге, ёчюлмезлик отха баргъандан эсе, къолсуз болуп жашаугъа кирсенг игиди санга.

⁴⁴ Жаханимде уа аланы къуртлары да ёлмейди, отлары да ёчюлмейди.

⁴⁵ Эмда сени аягъынг сени гюняхха тюшюре эсе, аны кесип ат: эки аягъынг бла жаханимге, ёчюлмезлик отха атылгъандан эсе, аякъсыз болуп жашаугъа кирсенг игиди санга.

⁴⁶ Жаханимде уа аланы къуртлары да ёлмейди, отлары да ёчюлмейди.

⁴⁷ Эм сени кёзюнг сени гюняхха тюшюре эсе, аны чыгъарып ат: эки кёзюнг бла жаханимге атылгъандан эсе, бир кёзюнг бла Аллахны Патчахлыгъына кирсенг игиди санга.

⁴⁸ Жаханимде уа аланы къуртлары да ёлмейди, отлары да ёчюлмейди.

⁴⁹ Нек десегиз хар ким да от бла тузланырыкъды, хар бир къурман да туз бла тузланырыкъды.

⁵⁰ Туз иги затды; алай а, туз тузлу болмаса, сиз аны не бла тюзетириксиз? Кесигизде тузугъуз болсун эмда бир-биригиз бла жарашыулу жашагъыз», – деди.