Марк 8 - Сыйлы Инжил бла Забур

Исса тёрт минг адамны тойдурады

¹ Ол кюнледе, бек кёп халкъ жыйылып, аланы ашаргъа затлары болмагъанда, Исса Кесини сохталарын чакъырып, алагъа:

² «Халкъгъа жаным ауруйду, ала энди юч кюнню Мени къатымда турадыла, ашаргъа затлары уа жокъду.

³ Ашатмагъанлай аланы юйлерине ийсем, жолда къарыусуз болуп къалырла; аладан бир къаууму узакъдан келгендиле», – деди.

⁴ Аны сохталары Анга: «Аланы тойдурурча, мында адам болмагъан жерде ётмек къайдан табылыр?» – деп жууап этдиле.

⁵ Исса алагъа: «Сизни ненча ётмегигиз барды?» – деп сорду. Ала: «Жети», – дедиле.

⁶ Сора Ол халкъгъа жерге олтурургъа буюрду; эмда жети ётмекни алып, шукур этип, сындырып, халкъгъа юлеширге сохталарына берди; ала да халкъгъа юлешдиле.

⁷ Аланы бираз чабакъчыкълары да бар эди; алгъыш этип, Ол, аланы да юлеширге буюрду.

⁸ Барысы да ашап тойдула; къалгъан кесекледен да жети четен жыйып толтурдула.

⁹ Ашагъанла уа тёрт минг чакълы бар эдиле. Исса аланы ийди

¹⁰ Эмда олсагъатдан сохталары бла къайыкъгъа минип, Далманута тийресине келди.

Фарисейлени бла Иродну ачытхычлары

¹¹ Фарисейле келип, Аны бла даулашып башладыла. Аны сынар ючюн, кёкден илишан кёргюзт деп даулай эдиле.

¹² Исса, терен ахтынып: «Бу тукъум илишан не ючюн даулайды? Кертисин айтама сизге, бу тукъумгъа илишан бериллик тюйюлдю», – деди.

¹³ Сора аланы къоюп, дагъыда къайыкъгъа минип, ары жанына кетди.

¹⁴ Ол заманда Аны сохталары ётмек алыргъа унутхан эдиле, аланы къайыкъда бир ётмекден башха биргелерине ётмеклери жокъ эди.

¹⁵ Ол а алагъа: «Къарагъыз, фарисейлени ачытхычларындан бла Иродну ачытхычындан кесигизни сакълагъыз», – деп къаты айтды.

¹⁶ Сора ала, кеси араларында ойлашып: «Муну, бизни ётмегибиз болмагъаны ючюн айтады», – дей эдиле.

¹⁷ Исса муну билип, алагъа: «„Ётмегибиз жокъду“ деп нек ойлашасыз? Энтдамы ангыламайсыз эм тюшюнмейсиз? Сизни жюрегигиз энтдамы таш кибикди?

¹⁸ Кёзлеригиз болгъанлай, кёрмеймисиз? Къулакъларыгъыз болгъанлай, эшитмеймисиз? Эм эсигизде тюйюлмюдю?

¹⁹ Мен беш ётмекни беш минг адамгъа сындырып юлешген заманда, сиз ётмек кесекледен ненча толу четен жыйгъан эдигиз?» – деди. Ала Анга: «Онеки», – дедиле.

²⁰ «Жети ётмекни тёрт минг адамгъа сындырып юлешген заманда уа, сиз къалгъан кесекледен ненча четен жыйып толтургъан эдигиз?» – деди. Ала: «Жети», – дедиле.

²¹ Исса алагъа: «Къалай ангыламайсыз?» – деди.

Бейтсайдада бир сокъур адам сау этиледи

²² Сора Исса Бейтсайдагъа келди. Анда Анга сокъурну келтирип: «Анга бир тий», – деп тиледиле.

²³ Ол, сокъурну къолундан тутуп, аны элден тышына чыгъарды эм аны кёзлерине тюкюрюп, аны юсюне къолларын салып, анга: «Зат кёремисе?» – деп сорду.

²⁴ Ол, ёрге къарап: «Озуп баргъан адамланы, тереклеча кёреме», – деди.

²⁵ Андан сора Исса дагъыда аны кёзлерине къолларын салып, анга: «Къара», – деди. Ол сау болуп, барын да ачыкъ кёрюп башлады.

²⁶ Сора Исса: «Элге да кирме, элде бир кишиге да айтма», – деп аны юйюне ийди.

Петер Масихни таныйды

²⁷ Сора Исса Кесини сохталары бла Филипни Кесариясыны эллерине кетди. Жолда бара туруп, Ол сохталарына: «Мени адамла кимге санайдыла?» – деп сорду.

²⁸ Ала: «Сууда Кёмюлдюрюучю Ахиягъа, башхала уа Илиясха, дагъыда башхала уа файгъамбарладан бирине», – деп жууап этдиле.

²⁹ Ол алагъа: «Сиз а Мени кимге санайсыз?» – деди. Петер Анга жууапха: «Сен Масихсе», – деди.

³⁰ Исса алагъа Кесини юсюнден муну биреуге да айтмазгъа буйрукъ этди.

Исса ёлюп тиргизиллигин алгъадан билдиреди

³¹ Сора Ол: «Адам Улу кёп азап чегерге керекди. Таматала, баш дин къуллукъчула эм дин алимле, Аны къабыл этмей къоярыкъдыла. Ол ёлтюрюллюкдю эм ючюнчю кюн тиргизилликди», – деп аланы юйретип башлады.

³² Ол муну юсюнден ачыкъ айтды. Петер а, Аны бир жанына чакъырып, Анга сёз салып башлады.

³³ Исса уа айланып, сохталарына къарап, Петерге: «Мени къатымдан кет, шайтан! Нек десенг сен Аллах жанындан тюйюл, адам жанындан ойлайса», – деп къаты айтды.

³⁴ Сора сохталарын бла халкъны Кесини къатына чакъырып, алагъа: «Мени ызымдан келирге сюйген адам, кесин унутсун да, кесини къачын алып, Мени ызымдан келсин.

³⁵ Нек десегиз кесини жанын сакъларгъа сюйген адам, аны жояр; Мени ючюн эмда Хайыр Хапар ючюн кесини жанын жойгъан адам а, аны сакълар.

³⁶ Адам битеу дунияны алса да, кесини жанына уа заран салса анга не файда?

³⁷ Неда адам кесини жанын не берип жулалыр?

³⁸ Нек десегиз бу зийначы эм гюняхлы тукъумну арасында Менден эм Мени сёзлеримден ким ыйлыкъсынса, Адам Улу да Кесини Атасыны аламатлыгъы бла, сыйлы мёлекле бла келгенинде, ол адамдан ыйлыкъсынырыкъды», – деди.